ព័ត៌មានជាតិ

ប្រធានមន្ទីរសាធារណការខេត្តព្រះវិហារ ណែនាំឲ្យការសាងសង់ស្ថានីយជញ្ជីងអចល័ត អូរពោធិ៍-ខេត្តព្រះវិហារ ស្របតាមគំនូសប្លង់ តាមបទដ្ឋានបច្ចេកទេស

បានផុស

៣ years មុន

នៅ

ថ្ងៃសុក្រ ២៤ កញ្ញា ២០២១

ដោយ

ព្រះវិហារ ៖ លោកសំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ អមដោយលោកអនុប្រធានមន្ទីរ២រូប និងមន្ត្រី២រូប កាលពីថ្ងៃទី២៣ ខែកញ្ញា ឆ្នាំ២០២១ បានអញ្ជើញចុះត្រួតពិនិត្យវឌ្ឍនភាពការងារសាងសង់ស្ថានីយជញ្ជីងអចល័ត អូរពោធិ៍-ខេត្តព្រះវិហារ លើកំណាត់ផ្លូវជាតិលេខ ៦២ ចន្លោះ គីឡូម៉ែត្រ៥២+០០០ ស្ថិតនៅភូមិអូរពោធិ៍ ឃុំរមណីយ ស្រុករវៀង ខេត្តព្រះវិហារ ខណៈដែលកំពុងដំណើរការសាងសង់ជាផ្លូវការ ក្រោយទទួលបានការឯកភាពពីលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន តាមសំណើរបស់អាជ្ញាធរខេត្ត និងមន្ទីរសាធារណការ និងដឹកជញ្ជូនខេត្តខេត្តព្រះវិហារនាពេលកន្លងមកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សំ លាងទ្រី ក្នុងឱកាសចុះពិនិត្យមើលវឌ្ឍនភាពនៃការសាងសង់ស្ថានីយអចល័ត អូរពោធិ-ព្រះវិហារ លោកបានណែនាំដល់ក្រុមការងារបច្ចេកទេស ត្រូវធ្វើការសាងសង់ស្ថានីយនេះ ស្របតាមគំនូសប្លង់ តាមបទដ្ឋានបច្ចេកទេស ប្រយោជន៍ដើម្បីឲ្យសំណង់នេះមានគុណភាពប្រើប្រាស់បានយូរអង្វែង។

លោកប្រធានមន្ទីរ បានបន្តថា អនុវត្តតាមការណែនាំពីលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងលោក ប្រាក់ សុវណ្ណ អភិបាលខេត្តព្រះវិហារ ក្រុមការងារជំនាញ នៃមន្ទីរសាធារណការ និងដឹកជញ្ជូនខេត្ត តែងចុះជាប់ជាប្រចាំតាមដងផ្លូវជាតិនានា ក្នុងទិសដៅត្រួតពិនិត្យមើលរថយន្ត ដែលដឹកជញ្ជូនលើសទម្ងន់ បណ្តាលឲ្យផ្លូវថ្នល់របស់យើងងាយនឹងរងខូចខាត។

លោក សំ លាងទ្រី បានថ្លែងបញ្ជាក់ថា ស្របពេលដែលស្ថានីយថ្លឹងរថយន្តអចល័តអូរពោធិ-ព្រះវិហារ នេះ បានសាងសង់រួចរាល់ នឹងដាក់ឲ្យដំណើរការជាផ្លូវការនោះ លោកសង្ឃឹមថា ការដឹកជញ្ជូនលើសទម្ងន់កំណត់ នឹងត្រូវការបន្ថយ ហើយមន្ត្រីរបស់យើងក៏មិនពិបាកដើរល្បាតឃ្លាំមើលតទៅទៀតដែរ។

លោក សំ លាងទ្រី ក៏បានថ្លែងអំពាវនាវឲ្យបងប្អូនប្រជាពលរដ្ឋ ត្រូវចូលរួមគោរពច្បាប់ចរាចរណ៍ផ្លូវគោកទាំងអស់គ្នា ដោយមិនត្រូវបើកបរលើសល្បឿនកំណត់ មិនត្រូវវ៉ាជែងទាំងប្រថុយប្រថាន មិនត្រូវដឹកលើស ទម្ងន់កំណត់ មិនត្រូវដឹកសំពីងសំពោង ពិសេសត្រូវពាក់ខ្សែក្រវាត់ជានិច្ចរាល់ពេលបើកបរ នឹងត្រូវចូលរួមអនុវត្តឲ្យបានទៀងទាត់តាមការណែនាំរបស់ក្រសួងសុខាភិបាល ការណែនាំរបស់រាជរដ្ឋាភិបាល «៣កុំ និង៣ការពារ» ដើម្បីការពារខ្លួនយើងក្រុមគ្រួសារ និងសហគមន៍ពីជំងឺកូវីដ១៩៕

ដោយ ៖ ស្រីរ័ត្ន