ក្រុមគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បន្តចុះអប់រំផ្សព្វផ្សាយជូនពលរដ្ឋ អំពីវិធានការការពារ និងទប់ស្កាត់កូវីដ

នៅថ្ងៃទី២៦ ខែកញ្ញា ក្រុមការងារគ្រូពេទ្យស័គ្រ្មចិត្តឯកឧត្ដម ហ៊ុន ម៉ានី ដឹកនាំដោយលោកបណ្ឌិត កែរ រដ្ឋា ប្រធា​នមន្ទីរសុខាភិបាលខេត្ត និងជាអនុប្រធានប្រតិបត្តិក្រុមការងារ គ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានបន្តចុះអប់រំផ្សព្វផ្សាយ ជូនដល់ប្រជាពលរដ្ឋចំនួន ៣០គ្រួសារ ដែលរស់នៅភូមិមេភ្លើង សង្កាត់ស្វាយរៀង ក្រុងស្វាយរៀង ខេត្តស្វាយរៀង ដើម្បី​ឲ្យពួកគាត់យល់ដឹងកាន់តែច្បាស់ អំពីវិធានការការពារ និងទប់ស្កាត់ការរីករាលនៃជំងឺកូវីដ-១៩ នៅក្នុងសហគមន៍។

ការបន្តចុះអប់រំផ្សព្វផ្សាយជូនប្រជាពលរដ្ឋ អំពីវិធានការការពារ និងទប់ស្កាត់ការរីករាលដាលជំងឺកូវីដ-១៩ របស់ក្រុមគ្រូពេទ្យស័្មគ្រចិត្តឯកឧត្តម ហ៊ុន ម៉ានី មានកិច្ចសហការជាមួយ នឹងក្រុមគ្រូពេទ្យមន្ទីរសុខាភិបាលខេត្ត អាជ្ញាធរ​មូលដ្ឋាន និងក្រុមយុវជន ស.ស.យ.ក សង្កាត់ស្វាយរៀង។

ក្រុមការងារគ្រូពេទ្យស្ម័គ្រចិត្តឯកឧត្ដម ហ៊ុន ម៉ានី ក៏បានណែនាំដល់ប្រជាពលរដ្ឋ ពីរបៀបលាងដៃនឹងអាល់កុល ឬ​សាប៊ូ ជាមួយនឹងការបង្រៀនពាក់ម៉ាស ដើម្បីធ្វើយ៉ាងណាការពារ និងទប់ស្កាត់មេរោគកូវីដ-១៩ចូលក្នុងខ្លួន រួមជា​មួយនឹងវិធី ទប់ស្កាត់មេរោគ ចូលក្នុងខ្លួនមួយចំនួនផ្សេងទៀតផងដែរ។

ក្នុងឱកាសនេះដែរ ក្រុមការងារគ្រូពេទ្យស័្មគ្រចិត្តឯកឧត្តម ហ៊ុន ម៉ានី បានផ្តល់អំណោយរបស់ឯកឧត្តម ហ៊ុន ម៉ានី ជូនប្រជាពលរដ្ឋចំនួន ៣០នាក់ និងយុវជន ស.ស.យ.ក ចំនួន ៥នាក់ ក្នុងម្នាក់ៗ ទទួលបាន ម៉ាស់១០, សាប៊ូ Protex១ និងជែលចំនុច ២៣០មីលីត្រចំនួន ១ដប, និងថវិកា ១៥០.០០០៛ ជូនដល់ក្រុមប្រឹក្សាសង្កាត់  និងមេភូមិផងដែរ។

លោកបណ្ឌិត កែរ  រដ្ឋា មានប្រសាសន៍ថា ដោយមានការណែនាំពីលោកសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល ដោយលោករដ្ឋមន្រ្តីសង្កេតឃើញថា បច្ចុប្បន្ននេះប្រជាពលរដ្ឋមួយចំនួនភ្លេចខ្លួន ដែលឃើញជំងឺកូវីដមានការថយចុះ និងបានចាក់វ៉ាក់សាំងគ្រប់ចំនួនផង ពួកគាត់មិនសូវអនុវត្តនូវវិធានការសុខាភិបាលត្រឹមត្រូវ ដូចមុនទេ លោករដ្ឋមន្ត្រីស្នើឲ្យគ្រប់ មន្ទីរសុខាភិបាលរាជធានីខេត្ត បន្តចុះអប់រំផ្សព្វផ្សាយអំពីវិធានការការពារ និងទប់ស្កាត់ការរីករាល ដាលជំងឺកូវីដ-១៩ ដូចមុន។  

លោកបណ្ឌិត កែរ រដ្ឋា សំណូមពរដល់ប្រជាពលរដ្ឋថា ស្ថិតក្នុងបរិបទជំងឺកូវីដ-១៩ កំពុងវាយលុក យើងទាំងអស់គ្នាត្រូវគោរពទៅតាមវិធានការសុខាភិបាល ៣ការពារ ៣កុំ និង២ចូលរួម ដើម្បីកុំឲ្យឆ្លងជំងឺកូវីដ-១៩ ចូលក្នុងសហគមន៍ និងគ្រួសារ ព្រមទាំងខ្លួនយើងផ្ទាល់ផង៕

អត្ថបទ៖ ភក្ដី