កូវីដមិនទាន់ស្ងាត់ ជប៉ុនផ្ទុះជំងឺផ្តាសាយបក្សីទៀត

ក្រសួងកសិកម្មបាននិយាយនៅថ្ងៃអង្គារទី១ខែធ្នូនេះថា ជំងឺផ្តាសាយបក្សីត្រូវបានគេរកឃើញនៅក្នុងខេត្តទី៤របស់ប្រទេសជប៉ុនស្របពេលរលកនៃការឆ្លងរោគនៅឯកសិដ្ឋានចិញ្ចឹមសត្វបានបង្កជាការផ្ទុះឡើងដ៏អាក្រក់បំផុតរបស់ប្រទេសនេះក្នុងរយៈពេលជាងបួនឆ្នាំចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបាននិយាយនៅលើគេហទំព័ររបស់ខ្លួនថា គ្រុនផ្តាសាយបក្សីត្រូវបានគេរកឃើញនៅកសិដ្ឋានចិញ្ចឹមសត្វមួយកន្លែងក្នុងទីក្រុង Hyuga នៃខេត្ត Miyazaki លើកោះ Honshu ភាគនិរតីប្រទេសជប៉ុន។ ក្រសួងបាននិយាយថា មិនមានលទ្ធភាពដែលមនុស្សនឹងឆ្លងជំងឺផ្តាសាយនេះពីការបរិភោគបក្សីឬស៊ុតនោះទេ។

ការផ្ទុះឡើងដ៏អាក្រក់បំផុតរបស់ប្រទេសជប៉ុនចាប់តាំងពីឆ្នាំ២០១៦មក បានចាប់ផ្តើមកាលពីខែមុននៅក្នុងខេត្ត Kagawa លើកោះ Shikoku ដែលនៅជាប់នឹងកោះ Kyushu។

មាន់ចំនួន៤ម៉ឺនក្បាលនៅកសិដ្ឋាន Miyazaki នឹងត្រូវគេសម្លាប់និងកប់ខណៈការនាំចេញក្នុងរង្វល់ចម្ងាយ៣គីឡូម៉ែត្រជុំវិញកសិដ្ឋាននឹងត្រូវបានរឹតត្បិត។

សកម្មភាពថ្មីនេះមានន័យថា មាន់ជាង១.៨លានក្បាលនឹងត្រូវបានសម្លាប់ចាប់តាំងពីការផ្ទុះជំងឺចុងក្រោយបង្អស់បានចាប់ផ្តើម។

ការផ្ទុះជំងឺផ្តាសាយបក្សីចុងក្រោយរបស់ប្រទេសជប៉ុនគឺនៅខែមករាឆ្នាំ២០១៨ក្នុងខេត្ត Miyazaki ដដែលនេះនៅពេលមាន់ចំនួន៩១,០០០ក្បាលត្រូវបានសម្លាប់។

ការផ្ទុះដ៏ធំចុងក្រោយបំផុតគឺចន្លោះខែវិច្ឆិកាឆ្នាំ២០១៦ដល់ខែមីនាឆ្នាំ២០១៧នៅពេលមាន់សរុបចំនួន១.៦៧លានក្បាលត្រូវបានសម្លាប់ដោយសារតែជំងឺផ្តាសាយបក្សី H5N6៕

ប្រែសម្រួលដោយ៖ Vann Vann

ប្រភព៖ Reuters

ចុចអាន៖ កូរ៉េខាងត្បូងហាមឃាត់ការនាំចូលសត្វបក្សីពីប្រទេសហុល្លង់ បន្ទាប់ពីផ្ទុះជំងឺផ្តាសាយបក្សី

ចុចអាន៖ ​និមិត្ត​សញ្ញា​បក្សី​ទាំង ៥ តំណាង​ឲ្យ​ហុងស៊ុយ​ស្នេហា ​និង​ថាមពល​ខ្លាំងក្លា​ក្នុង​ផ្ទះ