ជប៉ុន លុបចោលជើងហោះហើររាប់រយឲ្យហើយ ខណៈព្យុះទីហ្វុងមួយខិតជិតមកដល់

អាកាសយានដ្ឋាន Haneda នៅទីក្រុងតូក្យូបានលុបចោលជើងហោះហើរចំនួន ៣៥៧ នៅថ្ងៃសុក្រនេះ ដោយសារព្យុះទីហ្វុងដ៏ខ្លាំងក្លា Mindulle ខិតជិតមកដល់ប្រទេស ។

ចាប់តាំងពីព្រឹកថ្ងៃសុក្រ ជើងហោះហើរចំនួន ២៦៤ ដែលចាកចេញពីអាកាសយានដ្ឋាន Haneda និង ៩៣ មកដល់អាកាសយានដ្ឋានមួយនេះត្រូវបានលុបចោល ខណៈជើងហោះហើរជាច្រើនទៀតត្រូវបានពន្យារពេល ។

ព្យុះទីហ្វុងទី ១៦ ដែលបានវាយប្រហារប្រទេសជប៉ុន កំពុងធ្វើដំណើរតាមបណ្ដោយឆ្នេរសមុទ្រប៉ាស៊ីហ្វិករបស់ប្រទេស ហើយត្រូវបានគេរំពឹងថានឹងបក់បោកទីក្រុងតូក្យូ និងខេត្ត Chiba នៅល្ងាចថ្ងៃសុក្រនេះ ។

បច្ចុប្បន្នព្យុះទីហ្វុងនេះកំពុងធ្វើដំណើរចម្ងាយ ១៥០ គីឡូម៉ែត្រភាគខាងត្បូងនៃកោះ Hachijo-jima ដែលមានចម្ងាយ ៣០០ គីឡូម៉ែត្រពីទីក្រុងតូក្យូ ។

ចំណែកសម្ពាធបរិយាកាសកណ្តាលរបស់ព្យុះទីហ្វុងនេះគឺ ៩៤៥ ហិកតាប៉ាស្កាល់ ហើយល្បឿនខ្យល់បក់គឺ ៤៥ ម៉ែត្រក្នុងមួយវិនាទី ខណៈល្បឿនខ្យលអាចឡើងរហូតដល់ ៦០ ម៉ែត្រក្នុងមួយវិនាទី ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ថ្នាំកូវីដលេបមួយថ្ងៃមួយគ្រាប់របស់ ជប៉ុន ឈានដល់ការសាកល្បងព្យាបាលជាសះស្បើយត្រឹម ៥ ថ្ងៃ