ភ្ជុំបិណ្ឌ ៣ថ្ងៃ គ្រោះថ្នាក់ចរាចរណ៍សម្លាប់មនុស្ស១៤នាក់ និងរបួសធ្ងន់ស្រាល៦៤នាក់

រយៈពេល ៣ថ្ងៃឈប់សម្រាកបុណ្យភ្ជុំបិណ្ឌ ចាប់ពីថ្ងៃទី៥ ដល់ថ្ងៃ ទី៧ ខែតុលា ឆ្នាំ២០២១ គ្រោះថ្នាក់ចរាចណ៍ នៅទូទាំងប្រទេសបានកើតឡើង ៣៥ លើក បណ្តាលឱ្យមនុស្សស្លាប់ ១៤នាក់ របួសធ្ងន់ ៤៣នាក់ និងរបួសស្រាល ២១នាក់។

យោងតាមរបាយការណ៍របស់អគ្គស្នងការដ្ឋាននគរបាលជាតិបានឱ្យដឹងថា ចំនួនអ្នករបួស និងស្លាប់ ដោយគ្រោះថ្នាក់ចរាចរណ៍ឆ្នាំនេះ ប្រហាក់ប្រហែលនឹងឆ្នាំមុន ដែលកាលពីថ្ងៃទី១៦ ដល់ថ្ងៃទី១៨ ខែកញ្ញា ឆ្នាំ២០២០ គ្រោះថ្នាក់ចរាចរណ៍នៅទូទាំងប្រទេសសម្លាប់មនុស្ស ១៥នាក់ និងរបួស៦២នាក់។

បើតាមអគ្គស្នងការដ្ឋាននគរបាលជាតិ ក្នុងចំណោមគ្រោះថ្នាក់ចរាចរណ៍៣ថ្ងៃនោះក្នុងនោះ នៅថ្ងៃទី៥ ខែតុលា ត្រូវនឹងថ្ងៃទី១ នៃថ្ងៃឈប់សម្រាកបុណ្យភ្ជុំបិណ្ឌ នៅទូទាំងប្រទេសកើតមានគ្រោះថ្នាក់ចរាចរណ៍ផ្លូវគោក ចំនួន ៩លើក បណ្តាលឱ្យស្លាប់ ៥នាក់ និងរបួស ១៨នាក់។ នៅថ្ងៃទី៦ ខែតុលា មានគ្រោះថ្នាក់ចរាចរណ៍កើតឡើង ១១លើក បណ្តាលឲ្យស្លាប់ ៣នាក់ និងរបួស ២២នាក់។ ចំណែកថ្ងៃទី៧ តុលានេះ គ្រោះថ្នាក់ចរាចរណ៍កើតឡើង ១៥លើក បណ្តាលឱ្យមានមនុស្សស្លាប់ ៦នាក់ និងរបួស ២៤នាក់។

មូលហេតុដែលបណ្តាលឱ្យគ្រោះថ្នាក់ចរាចរណ៍កើតមានក្នុងពេលភ្ជុំបិណ្ឌនេះ បង្កឡើងច្រើនជាងគេដោយសារបើកបរលើសល្បឿកំណត់ បើកបរមិនគោរពសិទ្ធិ វ៉ាប្រជែង គ្រោះថ្នាក់បត់ គ្រោះថ្នាក់ និងដោយសារអ្នកបើកបរមានសារធាតុស្រវឹង៕

អត្ថបទ៖ សំអឿន