បិទខ្ទប់ផ្ទះពលរដ្ឋជាច្រើន​ខ្នង ក្រោយ​​រកឃើញ​មនុស្ស​ ៨ នាក់​ឆ្លង​កូវីដ

ខេត្តបាត់ដំបង: នៅថ្ងៃទី១៤ តុលា ម្សិលមិញនេះ អាជ្ញាធរស្រុកសំឡូត បានចុះបិទខ្ទប់ផ្ទះប្រជាពលរដ្ឋចំនួន ១៦ ខ្នង បន្ទាប់ពីក្រុមគ្រូពេទ្យបានពិនិត្យ និងរកឃើញមានអ្នកឆ្លងកូវីដ-១៩ សរុបចំនួន ៨ នាក់ ហើយក្នុងនោះក៏មានម្នាក់ផងដែរដែលផ្ទុកកូវីដបម្លែងខ្លួនដែលតា។

ការបិទខ្ទប់នេះគឺ នៅចំណុចចម្ការដូង ក្នុងភូមិកណ្ដាល ឃុំស៊ុង ស្រុកសំឡូត ខេត្តបាត់ដំបង ដោយមានករណីឆ្លងរីករាលដាលជំងឺកូវីដ-១៩ លើប្រជាពលរដ្ឋក្នុងមូលដ្ឋានគិតត្រឹមថ្ងៃទី ១៤ តុលា ឆ្នាំ២០២១ នេះ មានចំនួន ៨ នាក់ ស្រី ៥ នាក់ ក្នុងនោះរកឃើញករណីមេរោគបម្លែងថ្មី ប្រភេទ Delta ១ករណី លើឈ្មោះ អេង ចាន់ ភេទ ប្រុស អាយុ ៤០ ឆ្នាំ រស់នៅចំនុចខាងលើ។

ករណីនេះអាជ្ញាធរបានចុះណែនាំអ្នកពាក់ព័ន្ធអោយតាមដានសុខភាព បើមានរោគសញ្ញាត្រូវរាយការណ៍ដើម្បីធ្វើសំណាក និងបានបិទខ្ទប់ផ្ទះប្រជាពលរដ្ឋចំនួន ១៦ ខ្នងផ្ទះ។ ដោយឡែកក្នុងថ្ងៃដដែលនោះដែរ នៅចំណុចផ្លូវបំបែកស្ពានវែង ក្នុងក្រុមទី ៤ ភូមិកញ្ចាំង ឃុំស៊ុងស្រុកសំឡូត ក៏បានរកឃើញករណីប្រជាពលរដ្ឋឈ្មោះអុល វ៉ាន់នី ភេទប្រុស អាយុ ៣២ ឆ្នាំ មុខរបរ លក់បាយ មានវិជ្ជមានកូវី-១៩ មួយករណីថែមទៀត ដោយករណីនេះក្រុមការងារកំពុងស្រាវជ្រាវរកអ្នកពាក់ព័ន្ធ៕

អត្ថបទ៖ សោ និយមរ័ត្ន