ដំណោះស្រាយ ទំនាស់ដីធ្លីទំហំ ៣០ហិកតា រវាងក្រុមហ៊ុន លី អ៊ុតនី ជាមួយឈ្មោះ តាំង សុខឃី ជិតបញ្ចប់ហើយ

លោក ប៉ាន់ ខែមប៊ុនថន នាយករងខុទ្ទកាល័យសម្ដេចតេជោ លោកឧត្តមសេនីយ៍ទោ សិទ្ធិ ​ឡោះ ស្នងការនគរបាលខេត្តបន្ទាយមានជ័យ លោកវរសេនីយ៍ឯក ម៉ែន​ ភិរម្យ មេបញ្ជាការរងកងរាជអាវុធហត្ថខេត្ត​ និងមន្ត្រីពាក់ព័ន្ធជាច្រើន​ទៀត បានខិតខំស្វែងរកដំណោះស្រាយជាច្រើន ដោយចុះទៅដោះស្រាលនៅកន្លែងដីទំនាស់ផង និងបើកកិច្ចប្រជុំដោះស្រាយ នៅសាលប្រជុំសាលាខេត្តផង អំពីរឿងទំនាស់ដីធ្លីដែលមានទំហំ ៣០ហិកតា របស់ក្រុមហ៊ុនលីអ៊ុតនី ជាមួយលោក តាំង សុខឃី ជិតឈានដល់បញ្ចប់រឿងហើយ នៅស្រុកម៉ាឡៃ ខេត្តបន្ទាយមានជ័យ។ កិច្ចប្រជុំស្វែងរកដំណោះស្រាយ បានធ្វើឡើងនៅសាលប្រជុំសាលាខេត្តបន្ទាយមានជ័យ នៅល្ងាចថ្ងៃទី២២ ខែតុលា ឆ្នាំ ២០​​២១។

លោក ប៉ាន់ ខែមប៊ុនថន មានប្រសាសន៍ក្នុងកិច្ចប្រជុំនេះថា ដីរបស់ក្រុមហ៊ុន លី អ៊ុតនី​ ដែលក្រុមហ៊ុនទិញពីអតីតយោធិនវរៈ ៦៧២ និង ៦៧៣ មានទំហំ ៧១ហិកតា ហើយត្រូវបានក្រុមជនខិលខូច ចូលទៅទន្ទ្រានកាន់កាប់ចាប់ពីពាក់កណ្ដាលខែកុម្ភះ ឆ្នាំ២០១៩ មកម្លេះ។ លោកបន្តថា សិទ្ធកាន់កាប់ដី របស់ក្រុមហ៊ុន លី អ៊ុតនី មានទំហំ ៣០ហិកតាពិតប្រាកដ ព្រោះបានទិញពីអតីតយោធិនវរៈ ៦៧២ និង៦៧៣ មានទំហំ ៧១ហិកតានេះ ត្រូវអនុវត្តន៍ជាបន្ទាន់ភ្លាមៗ​ បើមានអ្នករារាំង ត្រូវចាត់វិធានការណ៍តាមផ្លូវច្បាប់។ ក្នុងនោះ លោកបានណែនាំឲ្យមន្ត្រីរដ្ឋបាលសាលាខេត្តធ្វើរបាយការណ៍ជូន និងសុំការសហការពីខាងអយ្យការអមសាលាដំបូងខេត្ត ផងដែរ។

លោក ប៉ាន់ ខែមប៊ុនថន បានឲ្យដឹងបន្តទៀតថា ក្នុងកិច្ចប្រជុំរកដំណោះស្រាយនេះ ត្រូវបានលោក តាំង សុខឃីកំពុងក្លាយជាជនរងគ្រោះ ត្រូវបាត់បង់ដីអស់ ៣០ហិកតា​ ព្រោះតែជឿអាជ្ញាធរភូមិ​-ឃុំ និងចាញ់បោកជនខិលខូចនោះ បានព្រមទទួលយកដោយក្ដីសោមនស្សផងដែរ​ ព្រោះភាគីទំនាស់ទាំងពីរ (តាំងសុខឃី-ក្រុមហ៊ុនលី អ៊ុតនី)សុទ្ធតែទទួលស្គាល់ថា ចំណាត់ការរកដំណោះស្រាយ របស់លោក ប៉ាន់ ខែមប៊ុនថន​ ពិតជាមានតម្លាភាព​ ដែលទាំងអ្នកចាញ់ និងអ្នកឈ្នះ អាចទទួលយកបានដោយស្ងប់ចិត្ត។

បន្ទាប់ពីដោះស្រាយរឿងទំនាស់ដីធ្លី ៣០ហិកតានេះរួច លោកប៉ាន់ ខែមប៊ុនថន​ នឹងចុះទៅដោះស្រាយរឿងទំនាស់រវាងក្រុមហ៊ុន លី អ៊ុតនី​ និងក្រុមលោក គង់ ជា​ បន្តទៀតដល់ទីកន្លែងផ្ទាល់តែម្ដង​ ព្រោះរឿងពិតនៃទំនាស់នេះ ត្រូវបានលោក និងក្រុមការងារក្ដាប់បានអស់ហើយ គ្មានអ្វីជាអាថ៌កំបាំងទេ៕

អត្ថបទ៖ វ៉ាន់ ណាង