លោក ជិន ម៉ាលីន ៖ អនីតិជនមានអាយុចាប់ពី ១៤ឆ្នាំឡើង ត្រូវទទួលខុសត្រូវផ្នែកព្រហ្មទណ្ឌ នូវបទល្មើសដែលខ្លួនបានប្រព្រឹត្តិ

មន្ត្រីជាន់ខ្ពស់ក្រសួងយុត្តិធម៌ បានអះអាងថា​ តាមច្បាប់របស់កម្ពុជា ចំពោះអនីតិជនដែលមានអាយុចាប់ពី ១៤ឆ្នាំឡើងទៅ ត្រូវទទួលខុសត្រូវផ្នែកព្រហ្មទណ្ឌ នូវបទល្មើសដែលខ្លួនបានប្រព្រឹត្តិ តែការផ្តន្ទាទោសត្រូវទទួលបាន នូវការអនុ គ្រោះមួយចំនួនដែរ តាមផ្លូវច្បាប់។

ការអះអាងដូចនេះ បន្ទាប់ពីលោក Patrick Murphy ​ឯកអគ្គរដ្ឋទូតអាមេរិកប្រចាំកម្ពុជា បានបង្ហាញការ​សោក​ស្ដាយ ក្រោយពីសាលាដំបូងរាជធានីភ្នំពេញ បានកាត់ទោសកុមារម្នាក់ឲ្យជាប់ពន្ធនាគារ កាលពីពេលថ្មីៗនេះ ដោយលោកថា ពាក់ព័ន្ធនឹងហេតុផលនយោបាយ។ លោក Patrick Murphy បានលើកជាសំណួរថា តើការដាក់គុកកូនប្រុសជំទង់របស់អតីតបក្សប្រឆាំង បង្ហាញពីការគោរពសិទ្ធិមនុស្សយ៉ាងណា?

លោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ បានឲ្យដឹងនៅព្រឹកថ្ងៃទី២ ខែវិច្ឆិកានេះថា ផ្អែកលើទិដ្ឋភាពច្បាប់ជាតិរបស់កម្ពុជា អនីតិជនអាយុចាប់ពី ១៤ឆ្នាំឡើងទៅ ត្រូវទទួលខុសត្រូវផ្នែកព្រហ្មទណ្ឌចំពោះបទល្មើសដែលខ្លួនបានប្រព្រឹត្តិ។ ចំណែកឯការផ្តន្ទាទោស ត្រូវទទួលបាននូវការអនុគ្រោះមួយចំនួន តាមផ្លូវច្បាប់ ដូចជា ការបន្ថយទោសមកនៅត្រឹមពាក់កណ្តាល នៃអតិបរិមានៃទោស ចំពោះបទល្មើសដែលបានប្រព្រឹត្តិ និងការព្យួរទោសជាដើម។

លោក​ ជិន ម៉ាលីន ដែលជាអនុប្រធានគណៈកម្មាធិការសិទ្ធិមនុស្សកម្ពុជាផងនោះ បានឲ្យដឹងបន្តថា ការអនុវត្តច្បាប់តាមផ្លូវតុលាការ និងផ្អែកលើនីតិវិធីច្បាប់ជាតិ ដែលមានជាធរមាន មិនមែនជាការរំលោភសិទ្ធិមនុស្សនោះទេ តែជាការលើកស្ទួយសិទ្ធិមនុស្ស និងនីតិរដ្ឋក្នុងសង្គមប្រជាធិបតេយ្យ។ តែផ្ទុយទៅវិញ ការដែលសមត្ថកិច្ចប្រើប្រាស់អំពើហិង្សា និងបាញ់សម្លាប់ជនសង្ស័យក្រៅប្រព័ន្ធតុលាការ ដោយផ្អែកលើពណ៌សម្បុរទៅវិញទេ ទើបជាការរំលោភសិទ្ធិមនុស្សយ៉ាងពិតប្រាកដ និងធ្ងន់ធ្ងរ ពាក់ព័ន្ធនឹងការរើសអើងពូជសាសន៍៕