ព្រោះតែបញ្ហាធំៗទាំងនេះ ធ្វើឲ្យតារា YouTube ល្បីឈ្មោះចិន បាត់មុខរាប់ខែ

អ្នកនិយមទស្សនាវីដេអូយូធ្យូប ​ប្រាកដជា​ស្គាល់​ច្បាស់តារាស្រីជនជាតិ​ចិន​នាង Li Ziqi ដែល​ជា Content Creator ល្បីល្បាញនៅលើ​បណ្ដាញសង្គម​យូធ្យូប ក្នុងប្រទេសចិន ក៏ដូចជាអន្តរជាតិ។ ​​នាងទទួលបានប្រជាប្រិយភាពលឿនបំផុត ​តាម​រយៈ​វីដេអូបង្ហាញពីការរស់នៅបែបជនបទ ការ​ធ្វើ​ម្ហូប​ ការច្នៃសម្លៀកបំពាក់ ​ការដាំដំណាំ គ្រឿង​សង្ហាររឹម​ផ្សេងៗ និងរបៀបរស់នៅបែបបុរាណខ្លះៗរបស់ជនជាតិចិនផងដែរ។

កាលពីឆ្នាំ ២០២០ កន្លងទៅ Vlogger រូបនេះ បានបំបែកឯកទគ្គកម្មកំណត់ត្រាពិភពលោក-Guinness World Record សម្រាប់មេដាយ “អ្នក Subscribe ច្រើនបំផុតលើឆានែលជាភាសាចិននៅលើ YouTube”។

ទោះយ៉ាងណា ថ្មីៗនេះ Li Ziqi ហាក់ស្ងប់ស្ងាត់សកម្មភាពនានានៅលើឆានែលរបស់នាង។ ប៉ុន្មានខែមកហើយ Li Ziqi បានបាត់មុខពីយូធ្យូប ខណៈទស្សនិកមិនបានរកឃើញវីដេអូថ្មីៗរបស់នាងទៀតឡើយ។

ទាក់ទិននឹងការបាត់មុខនេះដែរ ប្រភពពីសារព័ត៌មាន South China Morning Post បានឱ្យដឹងថា បច្ចុប្បន្ន Ziqi កំពុងមានបញ្ហាជាមួយអ្នកចូលហ៊ុនដែលបើកសិប្បកម្មផលិតមីរកស៊ីជាមួយគ្នា ព្រោះតែចម្រូងចម្រាសលើការបែងចែកភាគលាភ។

ក្រៅពីបញ្ហាបែងចែកភាគលាភ សេដ្ឋីនីចិនវ័យក្មេងរូបនេះ ក៏កំពុងមានបញ្ហាជាមួយនឹងការចេញវីដេអូនៅលើយូធ្យូបដូចគ្នា ដោយសារក្រុមប៉ូលិសរឹតបន្តឹងការបង្ហោះវីដេអូរបស់នាង ព្រមទាំងតែងតែរំខានដល់ដំណើរការផលិតវីដេអូថែមទៀតផង​ ពោលគឺខាងអាជ្ញាធរចិន មិនគាំទ្រនាងឱ្យផលិតវីដេអូយូធ្យូបនោះទេ។

ប្រភពដដែល បានបន្តថា តារាស្រីរូបនេះ ទំនងឈប់ផលិតវីដេអូយូធ្យូបទាំងស្រុង ដោយសារនាងចង់បន្តការសិក្សា ក៏ដូចជាមានពេលច្រើនសម្រាប់ថែទាំជីដូនផង៕

ប្រែសម្រួល៖ សន្យា

ចុចអាន៖ បៀបរកលុយខ្ទង់លានដុល្លាររបស់ YouTuber ស្រីដ៏ល្បីនៃប្រទេសចិន

ចុចអាន៖ ស្អាត​ហើយ​ពូកែ​ទៀត! មក​ដឹង​ជីវិត​ពិត​របស់ Youtuber ចិនល្បី​ឈ្មោះ Li Ziqi