៧ ចំណុច គ្រប់គ្នាចង់ដឹងបំផុតអំពីថ្នាំគ្រាប់ព្យាបាលកូវីដ-១៩

កាលពីដើមខែតុលា កន្លងទៅ ក្រុមហ៊ុន Merck បានបញ្ចេញនិន្នន័យអំពីជោគជ័យលើការសាកល្បងថ្នាំគ្រាប់ថ្មីសម្រាប់ព្យាបាលជំងឺកូវីដ-១៩ ដែលនេះជាដំណឹងល្អធ្វើឱ្យពិភពលោកសាទរ​យ៉ាងខ្លាំង។

បន្ទាប់ពីសាកល្បងដោយជោគជ័យ ក្រុមហ៊ុនឱសថនេះបានដាក់ពាក្យស្នើសុំទៅរដ្ឋបាលចំណីអាហារនិងឱសថ អាមេរិក (FDA) សម្រាប់ការអនុញ្ញាតឲ្យប្រើប្រាស់នូវថ្នាំដែលមានឈ្មោះថា Molnupiravir។

បច្ចុប្បន្ន ប្រទេសមួយចំនួនលើពិភពលោក រួមទាំងកម្ពុជា បានបញ្ជារទិញថ្នាំ Molnupiravir ហើយក្រសួងសុខាភិបាលកម្ពុជាក៏បានចេញសេចក្តីប្រកាសអនុញ្ញាតឲ្យប្រើប្រាស់ថ្នាំព្យាបាលជំងឺកូវីដ-១៩ប្រភេទនេះ ក្នុងលក្ខខណ្ឌបន្ទាន់ផងដែរ។

ខាងក្រោមជាចំណុចសំខាន់ៗដែលគ្រប់គ្នាឆ្ងល់ និងគួរយល់ដឹងអំពីថ្នាំព្យាបាលកូវីដប្រភេទថ្មី៖

១. តើថ្នាំគ្រាប់ Molnupiravir ដំណើរការយ៉ាងដូចម្តេច?

ថ្នាំគ្រាប់នេះអនុញ្ញាតឱ្យប្រើប្រាស់ បន្ទាប់ពីចេញរោគសញ្ញានៃជំងឺកូវីដ-១៩។ នៅក្នុងការសាកល្បងព្យាបាល ថ្នាំ Molnupiravir ត្រូវបានផ្តល់ឱ្យអ្នកចូលរួមក្នុងការសិក្សាចំនួន៤គ្រាប់ និងលេបពីរដងក្នុងមួយថ្ងៃ ក្នុងរយៈពេលប្រាំថ្ងៃ រាប់ចាប់ពីថ្ងៃចេញរោគសញ្ញាដំបូងនៃកូវីដ-១៩។

វេជ្ជបណ្ឌិត Albert Shaw អ្នកឯកទេសជំងឺឆ្លងនៃគេហទំព័រ Yale Medicine ពន្យល់ថា នៅពេលអ្នកជំងឺលេបថ្នាំ វានឹងចូលទៅក្នុងចរន្តឈាម រួចរារាំងសមត្ថភាពរបស់មេរោគ SARS-CoV-2 ក្នុងការចម្លង។

២. តើថ្នាំគ្រាប់ Molnupiravir មានផលប៉ះពាល់ដែរឬទេ?

ដោយផ្អែកលើទិន្នន័យនៅក្នុងការចេញផ្សាយរបស់ក្រុមហ៊ុន ថ្នាំនេះផ្ដល់សុវត្ថិភាព ដោយមិនមានផលប៉ះពាល់ធ្ងន់ធ្ងរចំពោះអ្នកស្ម័គ្រចិត្តសាកល្បងនោះទេ។

ដោយសារតែថ្នាំ Molnupiravir ដំណើរការដោយប្រើហ្សែន RNA ដើម្បីរំខានមេរោគឆ្លង ដូចនេះវាអាចមានឥទ្ធិពល ក៏ដូចជាផលរំខានខុសគ្នាតិចតួចរវាងអ្នកជំងឺម្នាក់ទៅអ្នកជំងឺ អាស្រ័យតាម DNA ឬ RNA របស់ពួកគេ។ ក្រុមហ៊ុន Merck រាយការណ៍ថា ទិន្នន័យពីការសិក្សានៅមន្ទីរពិសោធន៍ថ្នាំ Molnupiravir មិនបង្កឱ្យមានការផ្លាស់ប្តូរអាក្រក់ណាមួយក្នុងរាងកាយនោះទេ។

យ៉ាងណាមិញ អ្នកឯកទេស មិនអនុញ្ញាតឱ្យប្រើថ្នាំនេះព្យាបាលអ្នកជំងឺដែលជាស្ត្រីមានផ្ទៃពោះឡើយ ព្រោះក្នុងការសាកល្បង ក្រុមហ៊ុន Merck មិនបានធ្វើតេស្តថ្នាំលើស្ត្រីពពោះនោះទេ។

៣. តើថ្នាំគ្រាប់ Molnupiravir ស្រដៀងនឹងថ្នាំផ្ដាសាយ Tamiflu ដែរទេ?

អ្នកជំនាញបញ្ជាក់ថា ថ្នាំគ្រាប់ថ្មីនេះគឺស្រដៀងគ្នានឹងថ្នាំផ្ដាសាយដែរ ដោយមានមុខងារងាយស្រួលក្នុងការប្រើប្រាស់ ព្រមទាំងងាយរកទិញបាន។ អ្វីដែលគួរដឹងនោះគឺថ្នាំ Tamiflu ជាថ្នាំប្រឆាំងមេរោគ និងការពាររោគសញ្ញាធ្ងន់ធ្ងរនៃជំងឺផ្តាសាយ។ ដូចគ្នាដែរ ថ្នាំ Molnupiravir មិនមែនសម្លាប់វីរុសកូវីដ-១៩នោះទេ តែវាផ្ទុកមុខងារប្រឆាំង និងការពាររោគសញ្ញាធ្ងន់ធ្ងរ។  

៤. តើថ្នាំគ្រាប់ Molnupiravir ការពារការឆ្លងវីរុស ឬជំងឺធ្ងន់ធ្ងរ និងការស្លាប់ដែរឬទេ?

លោកវេជ្ជបណ្ឌិត Meyer ពន្យល់ថា គោលដៅនៃថ្នាំគ្រាប់ថ្មីរបស់ក្រុមហ៊ុន Merck គឺដើម្បីជួយអ្នកជំងឺកុំឱ្យចូលមន្ទីរពេទ្យ។ វាមានប្រសិទ្ធភាពការពារអាការធ្ងន់ធ្ងរ និងហានិភ័យស្លាប់ ក៏ដូចជាព្យាបាលអ្នកជំងឺកូវីដកម្រិតស្រាល និងមធ្យម។

៥. តើថ្នាំគ្រប់ Molnupiravir ប្រើបានចំពោះអ្នកណាខ្លះ?

ក្រុមហ៊ុន Merck បានឱ្យដឹងថា ថ្នាំគ្រាប់របស់ខ្លួនប្រើបានសម្រាប់មនុស្សពេញវ័យដែលមានហានិភ័យខ្ពស់។ នៅក្នុងការសាកល្បងព្យាបាល ថ្នាំ Molnupiravir ភាគច្រើនត្រូវបានផ្តល់ទៅឱ្យមនុស្សដែលមានអាយុលើសពី ៦០ឆ្នាំ ឬអ្នកដែលមានអាយុតិចជាងនេះ ប៉ុន្តែមានលក្ខខណ្ឌហានិភ័យខ្ពស់បណ្ដាលមកពីវីរុសកូវីដ-១៩ដូចជា ​អ្នកជំងឺទឹកនោមផ្អែម ជំងឺបេះដូង ឬជំងឺធាត់ និងមានតែបុគ្គលដែលមិនទាន់ចាក់វ៉ាក់សាំងប៉ុណ្ណោះ ដែលបានដាក់បញ្ចូលនៅក្នុងការសាកល្បង។

៦. តើថ្នាំគ្រាប់ Molnupiravir មានប្រសិទ្ធភាពលើកូវីដបំប្លែងខ្លួនប្រភេទ Delta​ និងវីរុសបំប្លែងដទៃទៀតដែរទេ?

ជាការពិត ថ្នាំគ្រាប់ថ្មីនេះ អាចសង្គ្រោះមនុស្សជាច្រើន។ ក្នុងការស្រាវជ្រាវដែលធ្វើឡើងនៅក្នុងសហរដ្ឋអាមេរិក និងបណ្តាប្រទេសផ្សេងទៀត បានបង្ហាញថា ថ្នាំ Molnupiravir មានប្រសិទ្ធភាពប្រឆាំងនឹងវីរុសបំប្លែងខ្លួនដូចជា Delta, Gamma, និង Mu។

៧. ប្រសិនមានថ្នាំ Molnupiravir ប្រើប្រាស់ហើយ តើយើងនៅតែត្រូវការវ៉ាក់សាំងដែរឬទេ?

ទោះបីជាថ្នាំ Molnupiravir ទទួលបានជោគជ័យ និងត្រូវបានអនុញ្ញាតក៏ដោយ ការចាក់វ៉ាក់សាំងនឹងនៅតែចាំបាច់សម្រាប់ការពារការចម្លងមេរោគ SARS-CoV-2 និងជាវិធានការបន្ថយការរីករាលដាលដ៏សំខាន់។ អ្នកដែលត្រូវបានចាក់វ៉ាក់សាំងពេញលេញនឹងមានឱកាសតិចតួចក្នុងធ្លាក់ខ្លួនឈឺ និងត្រូវបានការពារមិនឱ្យចូលពេទ្យផងដែរ។

វ៉ាក់សាំងជាឧបករណ៍ទីមួយរបស់មនុស្ស សម្រាប់ការពារវីរុសកូវីដបានល្អបំផុត មិនថាយើងមានថ្នាំ Molnupiravir ចរាចរណ៍ច្រើនប៉ុនណាក្ដី៕

ប្រែសម្រួល៖ សន្យា

ចុចអាន៖ ក្រុមមនុស្សមួយប្រភេទ ហាមលេបថ្នាំ Molnupiravir ដាច់ខាត

ចុចអាន៖ ថ្នាំព្យាបាលកូវីដ Molnupiravir នឹងមានប្រសិទ្ធភាពខ្ពស់បំផុត បើប្រើតាមរបៀបនេះ