ផ្សារគំរូព្រំដែនកម្ពុជា អនុញ្ញាត​ឲ្យ​​អាជីវករលក់ដូរ មិនគិតថ្លៃឈ្នួល ២ ឆ្នាំ​

លោក ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំបានអនុញ្ញាតឱ្យអាជីវករផ្សារគំរូព្រំដែនកម្ពុជា​(ផ្សារដារ)​លក់ដូររយៈពេល២ឆ្នាំ ដោយមិនគិតថ្លៃឈ្នួល និងធានាការចំណាយលើភ្លើងបំភ្លឺសាធារណៈ និងការថែទាំផ្សេងៗទៀតផង។

ការអនុញ្ញាតមិនគិតថ្លៃឈ្នួលតូបពីអាជីវករនេះបាន ធ្វើឡើងក្នុងពិធីបើកដំណើរការផ្សារគំរូព្រំដែនកម្ពុជា (ផ្សារដារ) កាលពីថ្ងៃម្សិលមិញ។

ផ្សារគំរូព្រំដែនកម្ពុជា (ផ្សារដារ) សាងសង់ក្នុងទុនទឹកប្រាក់ប្រមាណ ២លានដុល្លារលើផ្ទៃដី ១៩ ៦២៨ម៉ែត្រក្រឡា ស្ថិតនៅតំបន់សេដ្ឋកិច្ចពិសេសថារី នៃស្រុកមេមត់ ដោយរួមមានការសាងសង់ អគារតួផ្សារ អគាររដ្ឋបាលផ្សារ បង្គន់សាធារណៈ ឃ្លាំងស្តុកទំនិញ សួនច្បារ និងទីតាំងចំណតយានយន្ត មានតូបសរុបចំនួន ៦៨តូប រួមមាន តូបប្រភេទA 24តូប ប្រភេទB 24តូប ប្រភេទC 16តូប និងប្រភេទD 4តូប។

ផ្សារគំរូព្រំដែនកម្ពុជា (ផ្សារដារ) នឹង​បង្កើតការងារ បង្កើនប្រាក់ចំណូលសម្រាប់ប្រជាជននៅតាមព្រំដែន និងបង្កើនពាណិជ្ជកម្មទ្វេភាគីរវាងប្រទេសកម្ពុជា និងប្រទេសវៀតណាម ក៏ដូចជានឹងក្លាយជាផ្សារគំរូមួយ ក្នុងការដោះដូរទំនិញខេត្តដែលជាប់ព្រំដែនប្រទេសជិតខាង។

លោក អភិបាលខេត្ត បានមានប្រសាសន៍បន្តថា ផ្សារដារនេះ ជាផ្សារគំរូព្រំដែនកម្ពុជាទី១ ស្ថិតនៅមាត់ច្រកទ្វារព្រំដែនទ្វេភាគីដារ ជាប់នឹងព្រំដែនខេត្តតៃនិញ ប្រទេសវៀតណាម ដែលចំណាយការសាងសង់អស់ទឹកប្រាក់ប្រមាណ ២​លាន​ដុល្លារ​។

លោកអភិបាលខេត្តបានរំលឹកថា ផ្សារនេះត្រូវបានសម្ពោធដាក់ឲ្យប្រើប្រាស់ជាផ្លូវការ ក្រោមអធិបតីភាពដ៍ខ្ពង់ខ្ពស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីថ្ងៃទី២៤ ខែធ្នូ ឆ្នាំ២០១៩ តែដោយសារការរាតត្បាតជំងឺ​កូវីដ​១៩​បានអូសបន្លាយរហូតថ្ងៃនេះ ទើបបើកដំណើរការឲ្យអាជីវករលក់ដូរជាធម្មតា៕

ដើម្បីជួយពន្លឿនការលក់ដូរក្នុងផ្សារ ក៍ដូចជាជួយសម្រួលដល់អាជីវករ ដោយមិនគិតថ្លៃឈ្នួល រយៈពេល ២ឆ្នាំ គិតពីថ្ងៃដំណើរការផ្សារ។ បន្ថែមពីនេះរដ្ឋបាលខេត្តត្បូងឃ្មុំ ក៏​ទទួលបន្ទុកចំណាយលើភ្លើងបំភ្លឺសាធារណៈ និងការថែទាំផ្សេងៗ។

អត្ថបទ៖ សំអឿន