កោះដាច់បង្កើតកម្មវិធីប្រណាំងទូកសាកល្បងកម្លាំងគ្នារំលឹកក្នុងពិធីបុណ្យអុំទូក

នៅភូមិក្បាលកោះ ឃុំកោះដាច់មានធ្វើពិធីរំលឹកឡើងវិញក្នុងការប្រណាំង ដើម្បីសាកល្បងទូក។ ពិធីនេះ អ្នកភូមិក្បាលកោះធ្វើជាម្ចាស់ផ្ទះ ដែលមានទូកចែវសាមគ្គីសែនជ័យចំណុះ ៤៤ នាក់។

លោក ប៉ែន សំអាត គណៈកម្មការទូក បានឲ្យដឹងថា រយ:ពេល ២ឆ្នាំមកហើយ ដែលខកខាននៃពិធីបុណ្យអុំទូក អកអំបុក សំពះព្រះខែ។ លោកថា ការប្រណាំងទូកនាពេលនេះ គឺធ្វើឡើងក្នុងន័យបង្កើនសាមគ្គីភាព ដោយមិនគិតពីឈ្នះចាញ់ឡើយ។ លោក សំអាត សង្កត់ថា ការសាកល្បងប្រណាំងនេះ អាចនិយាយបានថា ជាការវឹកហាត់ ដើម្បីកែកុនទៅថ្ងៃក្រោយ ពេលដែលបើកឲ្យមានពិធីបុណ្យអុំទូកឡើងវិញ។

កញ្ញា ស្រីមុំ រស់នៅឃុំកោះដាច់ បានលើកឡើងថា «ក្រោយពីមានការរំលឹកឡើងវិញនៃពិធីបុណ្យ អុំទូក អក អំបុកសំពះព្រះខែ ពេលនេះទាំងប្រជាពលរដ្ឋ និងនឹងខ្ញុំក៏សប្បាយរីករាយរកអ្វីៗប្រៀបពុំបានទេ ព្រោះការធ្វើពិធីនេះឡើងវិញ គឺជាការដាស់សតិស្មារតីកូនខ្មែរយើងឲ្យស្គាល់ពីប្រពៃណីបុណ្យជាតិនៃពិធីបុណ្យ អុំទូករបស់ជាតិខ្មែរគឺកុំឱ្យបាត់បង់ប្រពៃណីជាតិអុំទូកនេះ»។

ដូចគ្នានេះដែរ លោក ចាំ សម្បូរ ជាពលរដ្ឋរស់នៅតំបន់នេះ បានលើកឡើងថា ការសាកល្បងទូកនេះ គឺមានទូកក្នុងខណ្ឌជ្រោយចង្វារ៣ មាន៣ទូក និងទូកនៅកោះឧកញ៉ាតីមួយចំនួន ទូករកាកោងមាន៥។​​ លោកបន្តដូច្នេះថា «ការបបង្កើតកម្មវិធីនេះ យើងនាំគ្នាលេងសប្បាយក្នុងភាតរភាពសាមគ្គីគ្នា ប៉ុន្តែប្រជាពលរដ្ឋយើងកុំភ្លេចការពាក់ម៉ាសបាញ់អាល់កុលលាងដៃដើម្បីចូលរួមថែសុខភាពទាំងអស់គ្នាផង៕ រុងរឿង