សម្តេច​តេជោ ហ៊ុន សែន ​នឹងអញ្ជើញចូលរួមកិច្ចប្រជុំ កំពូលពិសេសអាស៊ាន-ចិន នៅថ្ងៃទី​ ២២ ខែវិច្ឆិកានេះ

សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នឹងអញ្ជើញចូលរួមកិច្ចប្រជុំ កំពូលពិសេសអាស៊ាន-ចិន ដើម្បីរំលឹក ខួបអនុស្សាវរីយ៍លើកទី ៣០ នៃទំនាក់ទំនងដៃគូសន្ទនាអាស៊ាន-ចិន នៅថ្ងៃទី ​២២ ខែវិច្ឆិកា ឆ្នាំ ២០២១នេះ តាមប្រព័ន្ធវីដេអូ ដែល​ការអញ្ជើញចូលរួមប្រជុំនេះ ​តាមការ​អញ្ជើញរបស់​លោក ស៊ី ជីនពីង ប្រធានាធិបតី នៃសា​ធារណរដ្ឋប្រជាមានិតចិន ដែលជាសហប្រធាន និងជាអ្នករៀបចំកិច្ចប្រជុំនេះ។

បើតាមព័ត៌មាន​ពីក្រសួងការបរទេសកម្ពុជា បានឲ្យដឹងថា អញ្ជើញអម​សម្តេចតេជោនាយករដ្ឋមន្រ្តី នៅក្នុងកិច្ចប្រជុំ រួមមាន៖ ​លោកឧបនាយករដ្ឋមន្រ្តី ប្រាក់ សុខុន​ រដ្ឋមន្ត្រីការបរទេស និងសហប្រតិបត្តិការអន្តរជាតិ, លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម, លោកបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា, និងមន្រី្តជាន់ខ្ពស់ នៃរាជរដ្ឋាភិបាលកម្ពុជាមួយចំនួនទៀត។

នៅក្នុងកិច្ចប្រជុំនោះ ថ្នាក់ដឹកនាំអាស៊ាន និង​លោក ស៊ី ជីនពីង នឹងពិភាក្សាអំពីទិសដៅអនាគត និង​ការរិះរកមធ្យោបាយ ដើម្បីពង្រឹងពង្រីកទំនាក់ទំនងអាស៊ាន-ចិនបន្ថែមទៀត និងធ្វើការផ្លាស់ប្តូរយោបល់គ្នាលើបញ្ហាតំបន់ និងអន្តរជាតិ ដែលជាចំណាប់អារម្មណ៍ និងការបារម្ភរួម​៕​​

អត្ថបទ៖ កោះកែវ​