ថ្នាំគ្រាប់ព្យាបាលកូវីដ Molnupiravir គ្មានប្រសិទ្ធភាព ដូចការអះអាងពីមុនទេ

ជារឿងមួយដ៏គួរឲ្យខកចិត្ត ដែលថ្នាំគ្រាប់ព្យាបាលជំងឺកូវីដ១៩ របស់ក្រុមហ៊ុនផលិតឱសថ Merck មានប្រសិទ្ធភាពកាត់បន្ថយការចូលសម្រាកនៅមន្ទីរពេទ្យ និងការស្លាប់ តិចជាងសេចក្តីរាយការណ៍កាលពីលើកមុន។ ក្រុមហ៊ុនបាននិយាយបែបនេះ បន្ទាប់ពីបញ្ចេញការវិភាគពេញលេញនៃលទ្ធផលសាកល្បង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនដែលមានមូលដ្ឋាននៅសហរដ្ឋអាមេរិកមួយនេះ បាននិយាយកាលពីថ្ងៃសុក្រថា ថ្នាំលេប Molnupiravir បានបង្ហាញការថយចុះ៣០ភាគរយនៃការចូលព្យាបាលក្នុងមន្ទីរពេទ្យនិងការស្លាប់ បើប្រៀបធៀបជាមួយថ្នាំ Placebo ដោយផ្អែកលើទិន្នន័យពីអ្នកជំងឺជាង១,៤០០នាក់។

កាលពីខែមុន ក្រុមហ៊ុនបាននិយាយថា ទិន្នន័យពីអ្នកជំងឺចំនួន៧៧៥នាក់ បានបង្ហាញពីការថយចុះប្រហែល៥០ភាគរយ។

នៅក្នុងទិន្នន័យពីការសិក្សាដែលបានធ្វើបច្ចុប្បន្នភាព ការស្លាប់មនុស្សម្នាក់ ត្រូវបានគេរាយការណ៍នៅក្នុងក្រុមលេបថ្នាំ Molnupiravir បើធៀបទៅនឹង៩នាក់នៅក្នុងក្រុមលេបថ្នាំ Placebo។

ក្រុមហ៊ុន Merck បានដាក់ពាក្យស្នើសុំការអនុញ្ញាតពីសហរដ្ឋអាមេរិកចំពោះថ្នាំ Molnupiravir កាលពីថ្ងៃទី១១ខែតុលា បន្ទាប់ពីបង្ហាញទិន្នន័យបណ្តោះអាសន្ន។

ការចេញផ្សាយនៃការវិភាគពេញលេញនេះ បានកើតឡើងមុនពេលរដ្ឋបាលចំណីអាហារ និងឱសថអាមេរិក (FDA) បោះពុម្ពឯកសារមួយនៅថ្ងៃសុក្រ ដែលមានបំណងជូនដំណឹងដល់ក្រុមអ្នកជំនាញខាងក្រៅ ដែលនឹងត្រូវជួបប្រជុំនៅថ្ងៃអង្គារខាងមុខ ដើម្បីពិភាក្សាថាតើត្រូវផ្តល់យោបល់ផ្តល់សិទ្ធិឲ្យប្រើប្រាស់ថ្នាំគ្រាប់នេះដែរឬក៏អត់៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ ថ្នាំព្យាបាលកូវីដ Molnupiravir នឹងមានប្រសិទ្ធភាពខ្ពស់បំផុត បើប្រើតាមរបៀបនេះ