WHO ថា វាមិនទាន់ច្បាស់ទេថាតើវីរុស Omicron បង្កជំងឺធ្ងន់ធ្ងរជាង វីរុសបំប្លែងខ្លួនផ្សេងទៀត

អង្គការសុខភាពពិភពលោក (WHO) បាននិយាយកាលពីថ្ងៃអាទិត្យថា វាមិនទាន់ច្បាស់ទេថាតើវីរុសកូវីដបំប្លែងខ្លួនថ្មី Omicron អាចឆ្លងរហ័ស ឬបណ្តាលឲ្យមានជំងឺធ្ងន់ធ្ងរជាងនេះយ៉ាងណានោះ បើប្រៀបធៀបទៅនឹងវីរុសបំប្លែងខ្លួន SARS-CoV-2 ផ្សេងទៀត ។

WHO បាននិយាយថា “ទិន្នន័យបឋមបង្ហាញថា មានការកើនឡើងអត្រានៃការចូលសម្រាកព្យាបាលនៅមន្ទីរពេទ្យនៅអាហ្វ្រិកខាងត្បូង ប៉ុន្តែនេះអាចបណ្តាលមកពីការកើនឡើងនៃចំនួនមនុស្សឆ្លងវីរុសផ្សេង មិនមែនជាលទ្ធផលមកពីការឆ្លងវីរុស Omicron នោះទេ” ។

ទោះជាយ៉ាងណាក៏ដោយ នៅក្នុងសេចក្តីថ្លែងការណ៍មួយ ទីភ្នាក់ងារនេះបានរំលឹកឡើងវិញថា វានៅតែអាចមានហានិភ័យខ្ពស់នៃការឆ្លងពីវីរុសបំប្លែងខ្លួនមួយនេះ ។ បច្ចុប្បន្នមិនមានព័ត៌មានណាមួយដែលបង្ហាញថា រោគសញ្ញាដែលទាក់ទងនឹងវីរុសបំប្លែងខ្លួន Omicron មានភាពខុសប្លែកគ្នាពីវីរុសបំប្លែងខ្លួនផ្សេងទៀតនោះទេ ។

WHO បាននិយាយថា ខ្លួនកំពុងធ្វើការជាមួយអ្នកជំនាញបច្ចេកទេស ដើម្បីស្វែងយល់ពីសក្ដានុពលប៉ះពាល់នៃវីរុសបំប្លែងខ្លួន ដោយផ្អែកលើវិធានការទប់ទល់ដែលមានស្រាប់ប្រឆាំងនឹងជំងឺកូវីដ ១៩ រួមទាំងការចាក់វ៉ាក់សាំងផងដែរ ។

វាបាននិយាយថា “ករណីឆ្លងដែលត្រូវបានរាយការណ៍ដំបូងគឺស្ថិតក្នុងចំណោមការសិក្សានៅសកលវិទ្យាល័យ ប៉ុន្តែការស្វែងយល់ពីកម្រិតធ្ងន់ធ្ងរនៃវីរុស Omicron នឹងចំណាយពេលច្រើនថ្ងៃទៅច្រើនសប្តាហ៍ ហើយការសិក្សាកំពុងបន្តដើម្បីកំណត់ថាតើវីរុសនេះមានផលប៉ះពាល់ចំពោះការធ្វើតេស្តរហ័សឬអត់ ក្រៅពីការធ្វើតេស្តតាមម៉ាស៊ីនធំ PCR” ៕

ប្រែសម្រួលដោយ ៖ ជីវ័ន្ត

ប្រភព ៖ Tuoi Tre

ចុចអាន ៖ ចិន អួតថាអាចទប់ស្កាត់វីរុសបំប្លែងខ្លួន Omicron ដូចកាលធ្លាប់ធ្វើជាមួយ Delta