ព័ត៌មានជាតិ

ខេត្តព្រះសីហនុមានអ្នកជាប់ពាក់ព័ន្ធនឹងព្រឹត្តិការណ៍ «សហគមន៍២៨ វិច្ឆិកា»ចំនួន៤នាក់មានតេស្តអវិជ្ជមានទាំងអស់

បានផុស

៤ years មុន

នៅ

ថ្ងៃអាទិត្យ ៦ ធ្នូ ២០២០

ដោយ

ភ្នំពេញ ៖ ខេត្តព្រះសីហនុមានអ្នកជាប់ពាក់ព័ន្ធនឹងព្រឹត្តិការណ៍ «សហគមន៍២៨ វិច្ឆិកា»ចំនួន៤នាក់មានតេស្តអវិជ្ជមានទាំងអស់។ប៉ុន្តែត្រូវបន្តធ្វើចត្តាឡីស័ករយៈបេល១៤ថ្ងៃដើម្បីតាមដានសុខភាពជាបន្តទៀត។

លោកឃាង ភារម្យ អ្នកនាំពាក្យ សាលាខេត្តព្រះសីហនុបានមានប្រសាសន៍ថា«ខេត្តព្រះសីហនុមានអ្នកជាប់ពាក់ព័ន្ធនឹងព្រឹត្តិការណ៍ «សហគមន៍២៨ វិច្ឆិកា»ចំនួន៤នាក់ទេហើយបានបញ្ជូនសំណាកទៅធ្វើតេស្តនៅរាជធានីភ្នំពេញរួចហើយដែរដោយលទ្ធផលតេស្តអវិជ្ជមានទាំងអស់»។

លោកបានបន្តថា ពួកគេត្រូវបន្តធ្វើចត្តាឡីស័កដើម្បីធ្វើតេស្តជាលើកទី២និងទី៣ជាបន្តទៀត។បើលទ្ធផលអវិជ្ជមានទៀតនោះទើបអាចអនុញ្ញាតឲ្យចេញក្រៅបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្ថែមទៀតថា នៅខេត្តព្រះសីហនុបានត្រៀមរៀបចំសណ្ឋាគារនិងផ្ទះសំណាក់ចំនួន៣ទីតាំងសម្រាប់ធ្វើចត្តាឡីស័ករួចរាល់ហើយដែលស្ថិតនៅសង្កាត់លេខ៣ ក្រុងព្រះសីហនុ។លោកបានបញ្ជាក់ថា «យើងគិតថាចំនួន៣ទីតាំងនេះគឺគ្រប់គ្រាន់សម្រាប់ភ្ញៀវដែលគាត់អញ្ជើញហោះត្រង់ពីក្រៅប្រទេសចូលមកព្រលានយន្តហោះអន្តរជាតិខេត្តព្រះសីហនុហើយយើងបានត្រៀមទីតាំងផ្សេងៗទៀតដែរក្នុងករណីថា នៅពេលដែលវាមានកើនចំនួនការធ្វើចត្តាឡីស័កអាហ្នឹងយើងនឹងបង្កើនដែរ»។

ពាក់ព័ន្ធនឹងព្រឹត្តិការណ៍ «សហគមន៍២៨វិច្ឆិកា» ក្រសួងសុខាភិបាលបានបញ្ជាក់ថា គិតពីថ្ងៃទី២៩ ខែវិច្ឆិកាដល់ ថ្ងៃទី០៥ ខែធ្នូ ឆ្នាំ២០២០ ក្រសួងបានធ្វើតេស្តអ្នកប៉ះពាល់សរុបទាំងអស់ចំនួន ១០៧៧២សំណាក ដែលក្នុងចំនួននេះ មានអ្នកជំងឺវិជ្ជមានវីរុសកូវីដ១៩ ថ្មី ចំនួន៣០នាក់ ដែលកំពុងសម្រាកព្យាបាលនៅមន្ទីរពេទ្យមិត្តភាពខ្មែរ សូវៀត និងមណ្ឌលសុខភាពចាក់អង្រែ។

គួរបញ្ជាក់ថា គិតត្រឹមម៉ោង៧ព្រឹកថ្ងៃទី០៦ ខែធ្នូ ឆ្នាំ២០២០នេះ កម្ពុជាបានរកឃើញអ្នកឆ្លងកូវីដ១៩ សុរបចំនួន ៣៤៦នាក់ ក្នុងនោះព្យាបាលជាសះស្បើយ ៣០៦នាក់ និងកំពុងសម្រាកនៅមន្ទីរពេទ្យចំនួន៤០នាក់៕
ដោយ ៖ សំអឿន