ព្រះមេរុ កំពុងតម្លើងនៅមុខវត្តបទុមសម្រាប់ព្រះរាជទានភ្លើងព្រះសព សម្ដេចក្រុមព្រះ នរោត្តម រណឫទ្ធិ

ក្រុមការងារសាងព្រះមេរុ កំពុងរៀបចំតម្លើងព្រះមេរុ នៅបរិវេណវត្តបទុមវតីរាជវរារាមតាមទំនៀម សម្រាប់ប្រារឰព្រះរាជពិធីព្រះរាជទានភ្លើងព្រះសព សម្តេចក្រុមព្រះ នរោត្តមរណឫទ្ធិ ដែលនឹងប្រព្រឹត្តទៅនៅថ្ងៃទី ៨ ខែធ្នូ ឆ្នាំ២០២១ខាងមុខនេះ។

ព្រះសពសម្តេចក្រុមព្រះនរោត្ដម រណឫទ្ធិ ប្រធានក្រុមឧត្ដមប្រឹក្សាផ្ទាល់ព្រះមហាក្សត្រកម្ពុជា អតីតនាយករដ្ឋមន្ត្រីទី១ និងជាអតីតប្រធានរដ្ឋសភាដង្ហែរយាងមកពីប្រទេសបារាំង​យាងមកដល់រាជធានីភ្នំពេញ នៅវេលាម៉ោង ១២ ថ្ងៃទី ០៥ ខែធ្នូ ឆ្នាំ ២០២១។

ព្រះសពនឹងតម្កល់ធ្វើបុណ្យថ្វាយតាមព្រះរាជបវេណី តាមគន្លងព្រះពុទ្ធសាសនា នៅក្នុងព្រះដំណាក់សម្តេច នាវិថីសម្តេចប៉ាន រាជធានីភ្នំពេញ (ព្រះដំណាក់ចាស់)។

រាជរដ្ឋាភិបាលកម្ពុជា បានកំណត់យកថ្ងៃទី៨ខែធ្នូ ជាថ្ងៃកាន់ទុក្ខជាផ្លូវការសម្ដេចក្រុមព្រះ នរោត្ដម រណឫទ្ធិហើយបានឲ្យក្រសួង ស្ថាប័នរដ្ឋ សាលារៀនមន្ទីរពេទ្យរដ្ឋនិងឯកជនទាំងអស់និងមន្ត្រីរាជការកងកម្លាំងប្រដាប់អាវុធគ្រប់ប្រភេទគ្រប់វត្តអារាមព្រមទាំងប្រជាពលរដ្ឋទូទាំងប្រទេសត្រូវបង្ហូតទង់ជាតិត្រឹមពាក់កណ្តាលនៅថ្ងៃ៨ ខែធ្នូ ផងដែរ។

ជាមួយគ្នានោះដែរ គ្រប់ស្ថានីយ៍វិទ្យុ ទូរទស្សន៍រដ្ឋ និងឯកជនផ្អាកការសម្តែង និងចាក់ផ្សាយកម្មវិធីសប្បាយៗ ក្នុងលក្ខណៈគគ្រឹកគគ្រេង។

សម្តេច​ក្រុម​ព្រះ នរោត្តម រណឫទ្ធិ ទ្រង់​បាន​ចូលទិវង្គត នៅថ្ងៃអាទិត្យទី ២៨ ខែវិច្ឆិកា វេលាម៉ោង ៩៖៤០នាទីព្រឹក នៅប្រទេសបារាំង ត្រូវនឹងម៉ោង ៣៖៤០ នាទីរសៀល ម៉ោងនៅកម្ពុជាក្នុង​ព្រះជន្ម​៧៧​ព្រះវស្សា ​ដោយព្រះរោគាពាធ៕