ទីបំផុត ចិន អនុម័តថ្នាំព្យាបាលកូវីដជាលើកដំបូង ឯប្រសិទ្ធភាពមានដល់ ៨០ ភាគរយ

អាជ្ញាធរឱសថរបស់ប្រទេសចិនបានអនុម័តថ្នាំព្យាបាលជំងឺកូវីដ ១៩ ផលិតក្នុងប្រទេសជាលើកដំបូង បន្ទាប់ពីបានរកឃើញថា វាអាចកាត់បន្ថយការចូលសម្រាកព្យាបាលនៅ មន្ទីរពេទ្យ និងការស្លាប់យ៉ាងច្រើនក្នុងការសាកល្បងព្យាបាលក្នុងចំណោមអ្នកជំងឺដែលមានហានិភ័យខ្ពស់ ។

ទន្ទឹមនោះ ការអនុម័តនេះកើតឡើង នៅ ពេលដែលនិយតករជុំវិញពិភពលោកផ្តល់ភ្លើងខៀវឲ្យប្រើប្រាស់ថ្នាំព្យាបាលកូវីដមួយនេះ ជាពិសេសសម្រាប់ក្រុមដែលមានហានិភ័យខ្ពស់ ចំពេលមានការព្រួយបារម្ភអំពីវីរុសកូវីដបំប្លែងខ្លួនថ្មី Omicron ។

ស្របពេលជាមួយគ្នានេះ វាក៏កើតឡើង ខណៈការសិក្សារបស់ប្រទេសចិនកំពុងរកឃើញថា វ៉ាក់សាំងរបស់ខ្លួនមានអត្រាប្រសិទ្ធភាពទាបជាងវ៉ាក់សាំងជាច្រើនផ្សេងទៀតដែលផលិតនៅ បរទេស ។

ថ្នាំព្យាបាលកូវីដផលិតដោយក្រុមហ៊ុនពហុប្រទេស Brii Biosciences សហការជាមួយសាកលវិទ្យាល័យ Tsinghua និងមន្ទីរពេទ្យ Shenzhen គឺជាប្រភេទថ្នាំព្យាបាលអង់ទីគ័រ Monoclonal ដែលជាប្រូតេអ៊ីនភ្ជាប់ទៅ នឹង Spike ឬបន្លានៃមេរោគកូវីដ ១៩ ដោយកាត់បន្ថយសមត្ថភាពរបស់វាក្នុងការចូលទៅ ក្នុងកោសិការបស់រាងកាយ ។

អាជ្ញាធរឱសថបាននិយាយថា ថ្នាំនេះត្រូវប្រើរួមបញ្ចូលគ្នាជាមួយថ្នាំ ២ ប្រភេទទៀតសម្រាប់ព្យាបាលកូវីដ ហើយវាអាចប្រើដើម្បីព្យាបាលករណីមួយចំនួនដែលមានហានិភ័យនៃការវិវត្តទៅ ជាធ្ងន់ធ្ងរ ។

ទិន្នន័យសាកល្បងព្យាបាលបានបង្ហាញថា ការព្យាបាលដោយរួមបញ្ចូលគ្នានេះអាចកាត់បន្ថយហានិភ័យនៃការចូលសម្រាកព្យាបាលនៅ មន្ទីរពេទ្យ និងការស្លាប់ចំពោះអ្នកជំងឺកូវីដដែលមានហានិភ័យខ្ពស់ប្រហែល ៨០ ភាគរយ ៕

ប្រែសម្រួលដោយ ៖ ជីវ័ន្ត

ប្រភព ៖ RTE

ចុចអាន ៖ ចិន លាក់ប្រព័ន្ធមីស៊ីលយ៉ាងសម្ងាត់ក្នុងកុងតឺន័រសម្រាប់វាយប្រហារ គ្រប់ទីកន្លែង (មានវីដេអូ)