វ៉ាក់សាំងជិត៣០ម៉ឺនដូសបន្ថែមទៀតជាជំនួយរបស់យន្តការកូវ៉ាក់នឹងដឹកមកដល់កម្ពុជានៅព្រឹកនេះ

លោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានមានប្រសាសន៍ថា វ៉ាក់សាំង អាស្ត្រាហ្សេណេកា ចំនួន ២៩០,៤០០ដូសបន្ថែមទៀតដែលជាជំនួយរបស់តាមយន្តការកូវ៉ាក់នឹងមកដល់ប្រទេសកម្ពុជានៅព្រឹកថ្ងៃ ទី១០ ខែធ្នូ ឆ្នាំ២០២១ វេលាម៉ោង ៩៖៣៥នាទីព្រឹក។

លោកស្រី Foroogh Foyouzat តំណាងអង្គការយូនីសេហ្វ ប្រចាំកម្ពុជា ធ្លាប់បានមានប្រសាសន៍ថា ការផ្តល់ជំនួយជាវ៉ាក់សាំង Moderna តាមរយៈយន្តការកូវ៉ាក់នេះ គឺស្ថិតក្នុងចំណោមការផ្តល់ជាបន្តបន្ទាប់កន្លងមករបស់យន្តការកូវ៉ាក់មកកាន់កម្ពុជា។ មកទល់ពេលនេះ ចំនួនវ៉ាក់សាំងដែលបានដឹកជញ្ជូនមកដល់កម្ពុជាតាមរយៈយន្តការកូវ៉ាក់ គឺមានចំនួនច្រើនជាង ៣លានដូស។

លោកស្រី Foroogh Foyouzat បានបន្តថា វ៉ាក់សាំងស៊ីណូវ៉ាក់ ឬអាស្ត្រាហ្សេនេកាជាជំនួយរបស់យន្តការកូវ៉ាក់ត្រូវបានរំពឹងថា នឹងមកដល់បន្ថែមទៀតប្រមាណ៩០ម៉ឺនដូសនៅចុងឆ្នាំនេះ ធ្វើឱ្យចំនួនវ៉ាក់សាំងកើនឡើងដល់ប្រមាណ៦០ភាគរយនៃចំនួនវ៉ាក់សាំងដែលយន្តការនេះបានសន្យាផ្តល់ឱ្យកម្ពុជាប្រមាណ៦,៦លានដូស។  លោកស្រី បានពន្យល់ថា យន្តការកូវ៉ាក់ គឺជាសម្ព័ន្ធភាពសកល​ក្រោមកិច្ចដឹកនាំរបស់សម្ព័ន្ធសកលសម្រាប់វ៉ាក់សាំង និងថ្នាំបង្ការ (GAVI) សម្ព័ន្ធនវានុវត្តន៍ ដើម្បីត្រៀមទប់ទល់នឹងការរាតត្បាតនៃជំងឺ (CEPI) អង្គការសុខភាពពិភពលោក រួមជាមួយនឹងមូលនិធិសហប្រជាជាតិដើម្បីកុមារ (យូនីសេហ្វ)។ ក្នុងនាមជាអ្នកទិញវ៉ាក់សាំងធំជាងគេតែមួយគត់នៅក្នុងពិភពលោក យូនីសេហ្វ គឺជាស្ថាប័នធ្វើលទ្ធកម្ម និងផ្គត់ផ្គង់ឈានមុខគេសម្រាប់យន្តការកូវ៉ាក់។

ចំណែក លោកស្រី វេជ្ជបណ្ឌិត យក់ សម្បត្តិវិញ បានមានប្រសាសន៍ថា កម្ពុជាគ្រោងនឹងទទួលបានវ៉ាក់សាំងជាបន្តបន្ទាប់នៅចុងឆ្នាំនេះរហូតដល់ឆ្នាំក្រោយ ខណៈមកដល់ពេលនេះកម្ពុជាទទួលបានវ៉ាក់សាំងទាំងជំនួយ និងការបញ្ជាទិញប្រមាណជាង៤០លាន៥២ម៉ឺនដូស រួមទាំង វ៉ាក់សាំងអាស្ត្រាហ្សេណេកា ចំនួន ២៩០,៤០០ដូស ដែលនឹងដឹកមកដល់ព្រឹកនេះ៕

អត្ថបទ៖ សំអឿន