ក្រសួងសាធារណៈការ​ គ្រោង​សាងសង់​ស្ថានីយជញ្ជីង​អចល័ត​ថ្មី​ចំនួន​២ទីតាំង​បន្ថែមទៀត​

ក្រសួងសាធារណៈការ និងដឹកជញ្ជូន គ្រោងសាងសង់ស្ថានីយជញ្ជីងអចល័តថ្មីចំនួន ២ទីតាំងបន្ថែមទៀត នៅ ខេត្តមណ្ឌលគិរី និងខេត្តកោះកុង ក្នុងឆ្នាំ ២០២២ ខាងមុខនេះ ដើម្បីទប់ស្កាត់សកម្មភាពដឹកជញ្ជូនលើសទម្ងន់កម្រិតកំណត់ ខណៈបច្ចុប្បន្ននៅ ទូទាំងប្រទេសស្ថានីយជញ្ជីងអចល័តចំនួន៣៣ទីតាំង។ នេះបើតាមការបញ្ជាក់របស់ លោក ឯក រដ្ឋ អនុរដ្ឋលេខាធិការក្រសួងសាធារណៈការនិងដឹកជញ្ជូន នៅ ថ្ងៃទី ១០ ខែធ្នូ ឆ្នាំ២០២១នេះ។

លោក ឯក រដ្ឋ បានបន្តថា ដើម្បីទប់ស្កាត់សកម្មភាព ដឹកជញ្ជូនលើសទម្ងន់កម្រិតកំណត់ ក្រសួងសាធារណៈការ និងដឹកជញ្ជូន នឹងបន្តផ្សព្វផ្សាយ ពន្យល់ណែនាំដល់ម្ចាស់យានយន្ត ម្ចាស់អាជីវកម្មដឹកជញ្ជូន ការដ្ឋានអាជីវកម្មកិនថ្ម ដេប៉ូខ្សាច់ រណ្តៅ ដី និងសាធារណជនទាំងអស់ ឱ្យបានជ្រាបកាន់តែទូលំទូលាយ អំពីបទដ្ឋានច្បាប់នានា ហើយរំពឹងថាសកម្មភាពដឹកជញ្ជូនលើសទម្ងន់កម្រិតកំណត់ នឹងមានការថយចុះ។

យោងតាមរបាយការណ៍នៃការអនុវត្តការងារត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ដែលសម្រេចបានក្នុងរយៈពេល ១១ខែ ក្នុងឆ្នាំ២០២១ យានយន្តចំនួនជិត៧៤ម៉ឺនគ្រឿង ត្រូវបានក្រសួងសាធារណៈការ និងដឹកជញ្ជូន រកឃើញថា បានដឹកជញ្ជូនលើសទម្ងន់កម្រិតកំណត់ ក្នុងនោះយានយន្តផ្ទុកលើសក្នុងកម្រិតអនុគ្រោះមាន ចំនួន ៧៣៦ ៧៣៥ គ្រឿង និងយានយន្តលើសទម្ងន់កម្រិតកំណត់ដែលបានពិន័យមានចំនួន ២៨០៣គ្រឿង។

កាលពីឆ្នាំ២០២០ ក្រសួងសាធារណៈការ បានរកឃើញយានយន្តដឹកលើសទម្ងន់កម្រិតកំណត់ចំនួន៥៨៦ ១០៣គ្រឿង ក្នុងនោះយានយន្ត ផ្ទុកលើសទម្ងន់ក្រោម ៥ភាគរយមានចំនួន៥៨២ ៨១៤គ្រឿង យានយន្តផ្ទុកលើសទម្ងន់ពី ៥ភាគរយទៅ ១០ភាគរយ ចំនួន ៧៩គ្រឿង យានយន្តផ្ទុកលើសទម្ងន់ពី ១០0ភាគរយទៅ ២០ភាគរយ ចំនួន ២ ១៦៦ គ្រឿង និងយានយន្តផ្ទុកលើសទម្ងន់លើសពី ២០ភាគរយ ចំនួន ១ ០៤៤គ្រឿង៕