ព័ត៌មានជាតិ

រយៈពេល១១ខែ រកចំណូលពីការលក់ស្លាកលេខពិសេសបាន ៦១ពាន់លានរៀល

បានផុស

៣ years មុន

នៅ

ថ្ងៃសុក្រ ១០ ធ្នូ ២០២១

ដោយ

ការទិញស្លាកលេខពិសេសនិងលេខពិសេសផ្ទាល់ខ្លួនមានការកើនឡើងទោះស្ថិតក្នុងស្ថានភាពនៃជំងឺកូវីដ-១៩ ក៏ដោយ។ ជាក់ស្តែងក្នុងរយៈពេល ១១ ខែឆ្នាំ២០២១ ក្រសួងសាធារណការនិងដឹកជញ្ជូនបានលក់ស្លាកលេខពិសេសផ្ទាល់ខ្លួនបានចំនួន ៤,៨០២ លេខទទួលបានចំណូលថវិកាប្រមាណជាង ៣៤ ពាន់លានរៀលនិងលក់ផ្លាក លេខពិសេស រាជធានី-ខេត្តបាន ២៥,៣៦៤ លេខ ទទួលបានចំណូលថវិកាប្រមាណជាង ២៧ ពាន់លានរៀល។

លោកស្រី កុយ សុដានី រដ្ឋលេខាធិការក្រសួងសាធារណការនិងដឹកជញ្ជូននិងជាប្រធានគណៈកម្មការអន្តរក្រសួងគ្រប់គ្រងការលក់លេខចុះបញ្ជីរថយន្តបានឲ្យដឹងនៅក្នុង កិច្ចប្រជុំនៅពាក់កណ្តាលសប្តាហ៍នេះ ដើម្បីពិនិត្យកែសម្រួលក៏ដូចជាផ្តល់ធាតុចូលបន្ថែមលើរបាយការណ៍វឌ្ឍនភាពការងាររបស់គណៈកម្មការអន្តរក្រសួងស្តីពីការគ្រប់ គ្រងការចុះបញ្ជីរថយន្តមុននឹងលើកយកទៅដាក់ជូនសន្និបាតបូកសរុបការងារប្រចាំឆ្នាំ២០២១និងលើកទិសដៅការងារឆ្នាំ២០២២របស់ក្រសួងដែលគ្រោងនឹងប្រព្រឹត្តទៅនៅថ្ងៃទី ២៦-២៧ ខែមករា ឆ្នាំ២០២២ និងការពិនិត្យពិភាក្សាលើការរៀបចំអនុស្សរណៈយោគយល់រវាងក្រសួងសាធារណការនិងដឹកជញ្ជូននិងក្រសួងពាណិជ្ជកម្មស្តីពី ការតភ្ជាប់ប្រព័ន្ធចុះបញ្ជីលេខពិសេសផ្ទាល់ខ្លួន។

លោកស្រីប្រធានអង្គប្រជុំបានគូសបញ្ជាក់ថា និន្នាការនៃការទិញស្លាកលេខពិសេសនិងលេខពិសេសផ្ទាល់ខ្លួនពីសំណាក់បងប្អូនប្រជាពលរដ្ឋមានការកើនឡើងបើទោះបី ស្ថិតក្នុងស្ថានភាពនៃជំងឺកូវីដ-១៩ក៏ដោយ ។ ជាក់ស្តែងក្នុងរយៈពេល១១ ខែ ឆ្នាំ២០២១ ក្រសួងសាធារណការនិងដឹកជញ្ជូនបានលក់ស្លាកលេខពិសេសផ្ទាល់ខ្លួនបាន ចំនួន ៤,៨០២ លេខទទួលបានចំណូលថវិកាប្រមាណជាង ៣៤ ពាន់លានរៀល និងលក់ស្លាកលេខពិសេសរាជធានី-ខេត្តបាន២៥,៣៦៤ លេខទទួលបានចំណូលថវិកា ប្រមាណជាង២៧ ពាន់លានរៀលក្នុងរយៈពេល១១ខែ (មករា-វិច្ឆិកា) ឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីរដ្ឋលេខាធិការបានបន្តថា ក្រសួងបានប្តេជ្ញាបន្តធ្វើយ៉ាងណាជំរុញឱ្យការលក់លេខចុះបញ្ជីយានយន្តកាន់តែមានភាពល្អប្រសើរ និងកើនឡើងជាងមុនតាមរយៈ ការផ្សព្វផ្សាយនៅតាមបណ្ដាក្រុមហ៊ុនឯកជន និង បានស្នើផងដែរឱ្យក្រុមពាក់ព័ន្ធរបស់គណៈកម្មការអន្តរក្រសួងពិនិត្យនិងជួយណែនាំបន្ថែមដល់មន្ត្រីក្រោមឱវាទរបស់ ខ្លួនជាពិសេសមន្ត្រីឈានមុខដែលកំពុងបម្រើសេវាដោយផ្ទាល់ជាមួយប្រជាពលរដ្ឋធ្វើយ៉ាងណាឱ្យពួកគាត់បំពេញការងាររបស់ខ្លួនប្រកបដោយការទទួលខុសត្រូវខ្ពស់មាន តម្លាភាព ប្រសិទ្ធភាព ច្បាស់លាស់ ឆាប់រហ័សនិងគ្មានការចំណាយក្រៅផ្លូវការតាមអនុសាសន៍ណែនាំដ៏ខ្ពង់ខ្ពស់ពីលោកទេសរដ្ឋមន្ត្រី៕

ដោយ ៖ ណារី