ហេតុផលសំខាន់ពីរនេះហើយ ទើបរឿង “ភរិយាខ្ញុំអាយុ ១៨ ឆ្នាំ” បោះពុម្ពម្ដងទៀត

“ភរិយាខ្ញុំអាយុ ១៨ ឆ្នាំ” ជាប្រលោមលោកមនោសញ្ចេតនា ស្នេហាខុសវ័យរវាងបុរសជ្រេអាយុ និងកញ្ញា ១៨ ប្លាយ ថ្មីៗនេះបានបង្ហាញខ្លួនជាលើកជាទី២នៅលើទីផ្សារ ដោយសារទទួលការគាំទ្រយ៉ាងក្រាស់ក្រែលពីមិត្តអ្នកអាន។

ម្ចាស់ស្នាដៃ កញ្ញ គឹម ឌីណា  បានលើកឡើងមូលហេតុពីរសំខាន់ៗដែលនាំឲ្យខ្លួនបោះពុម្ពប្រលោមលោកនេះជាថ្មីម្ដងទៀតដូច្នេះថា ១. ដោយសារការបោះលើកដំបូង មានចំនួនតិច និងដោយចង់ឱ្យអ្នកផ្សេងទៀតដែលមិនទាន់ក្លាយជាម្ចាស់កម្មសិទ្ធិ បានអានសៀវភៅនេះដែរ និង ២. វាជាការសន្យាតាំងពីដើមមកថា នឹងបោះម្តងទៀត ពីព្រោះអ្នកនិពន្ធចង់រក្សាស្នាដៃសៀវភៅដំបូងរបស់ខ្លួន។

ដោយឡែក អ្នកនិពន្ធ បានឲ្យដឹងពីមូលហេតុនៃការសរសេររឿងនេះដំបូងផងដែរថា ដោយសារខ្លួនចូលចិត្តស្នេហាបែបផ្អែមល្ហែម ទើបប្រលោមលោកមួយនេះលេចរូបរាងមក តាមបែបមនោសញ្ចេតនា។  អ្នកនិពន្ធបន្តថា ក្នុងជីវិតពិតកញ្ញាពិតជាមានភាពកក់ក្ដៅចំពោះមនុស្សប្រុសចិត្តធ្ងន់ ហើយពូកែថ្នមចិត្ត និងជាពិសេសខ្លួនផ្ទាល់ជាមនុស្សដែលគិតថា ស្នេហាពិតមិនគិតវ័យនោះទេ រួចក៏ប្រដូចចរិតបែបនេះទៅនឹងតួអង្គឯកប្រុស វិចិត្រ ។

ទន្ទឹមគ្នាដែរ កញ្ញា គឹម ឌីណា ក៏បានរំលេចពីផលលំបាកនៃការតាក់តែងប្រលោមលោក “ភរិយាខ្ញុំអាយុ ១៨ ឆ្នាំ”  នេះថា ខ្លួនពិបាកក្នុងការស្វែងរកអារម្មណ៍ ពេលខ្លះសរសេរក៏គាំង ហើយមិនដឹងបន្តទៅមុខទៀតយ៉ាងណា។ តែវាជាការពិបាកមួយដ៏មានន័យក្នុងការតស៊ូ ព្រោះវាជាកិច្ចការដែលអ្នកនិពន្ធស្រឡាញ់ពេញចិត្តនឹងធ្វើ។

រីឯបញ្ហាផ្សេងទៀត គឺការចែកចាយនៅលើទីផ្សារ។ កញ្ញាថា ពីមុនអាចថាខ្លួនពិបាកដោយសារសរសេរផង ហើយត្រូវលក់សៀវភៅដោយខ្លួនឯងផង ទាំងដែលមិនមានជំនាញខាងលក់ ហើយក៏រឹតតែមិនមានពេលសម្រាប់ការងារមួយនេះ។ ក្រោយមក កញ្ញា គឹម ឌីណា បានលក់ស្នាដៃទៅឱ្យខាងហាងសៀវភៅ Le Story ដែលគេចាត់ចែងបោះពុម្ព ធ្វើទីផ្សារ និងចែកចាយសៀវភៅ។ ដូច្នេះអាចនិយាយថា ពេលនេះម្ចាស់ស្នាដៃស្រួលច្រើន ព្រោះមានពេលគ្រប់គ្រាន់ចំណាយលើតែការនិពន្ធ៕

អត្ថបទ៖ សន្យា

ចុចអាន៖ សៀវភៅ«ពេលវេលា»បោះពុម្ពជាលើកទីពីរ

ចុចអាន៖ ប្រសិនចេះជ្រើសសៀវភៅ ឪពុកម្តាយ​អាចសម្រាលការស្តីប្រដៅកូនបានខ្លះ