ម្ចាស់គម្រោងអចលនទ្រព្យភូមិមរតកជួយពលរដ្ឋចំនួន ២០០គ្រួសារ នៅក្នុងសង្កាត់ចេក ក្រុងស្វាយរៀង

ស្វាយរៀង៖ លោក សោម សុធា អគ្គនាយកគម្រោងអចលនព្រទ្យភូមិមរតក ក្រុងស្វាយរៀង និងលោក ដួង តារា ជំនួយការផ្ទាល់សម្ដេចតេជោ ហ៊ុន សែន បានផ្តល់អំណោយជូនពលរដ្ឋចំនួន ២០០គ្រួសារ ស្មើនឹង១០ភូមិ នៅសង្កាត់ចេក ក្រុងស្វាយរៀង ខេត្តស្វាយរៀង ថ្ងៃទី ១២ខែ ធ្នូ ឆ្នាំ ២០២១។

ថ្លែងក្នុងពិធីនេះ លោក សោម សុធា អគ្គនាយកគម្រោងភូមិមរតក អរគុណចំពោះ លោក ដួង តារា ជំនួយការផ្ទាល់សម្ដេចតេជោ ហ៊ុន សែន ដែលបានឆ្លៀតពេលមកចែកអំណោយដល់ប្រជាពលរដ្ឋក្រីក្រនៅសង្កាត់ចេក ក្រុងស្វាយរៀង ដោយលោកបា​នសង្កត់ធ្ងន់ថា ទាំងនេះបានឆ្លុះបញ្ចាំងអំពីការយកចិត្តទុកដាក់ចំពោះជីវភាពរស់នៅរបស់ប្រជាពលរដ្ឋក្នុងបរិបទជំងឺកូវីដ-១៩ រាលដាលនៅក្នុងសហគមន៍។

លោកថា គិតមកដល់ពេលនេះ គម្រោងអនទ្រព្យភូមិមរតក បានចូលរួមនៅក្នុងការងារសង្គម ដូចជាបានស្ថាបនាផ្លូវ និងផ្ដល់អំណោយដល់ប្រជាពលរដ្ឋប្រមាណជាង ៥០០គ្រួសារហើយ។ លោកអះអាងថា គម្រោងនឹងពង្រីកទីតាំងបន្ថែមទៀតនៅស្រុកស្វាយជ្រំ ដែលមានដីជាង១០០ហិកតា ដើម្បីចូលរួមអភិវឌ្ឍន៍ជាមួយរាជរដ្ឋាភិបាល ក៏ដូចជាអាជ្ញាធរដែនដី បង្កើតបានជាតំបន់អាជីវកម្មផ្សេងៗ និងធ្វើឲ្យតំបន់ខាងលិចក្រុងស្វាយរៀង ក្លាយទៅជាតំបន់ប្រជុំជនបែបស៊ីវីល័យ។​

នៅក្នុងឪកាសនោះដែរ លោក ដួង តារា បានថ្លែងអំណរគុណដល់គម្រោងអចនទ្រព្យភូមិមរតកដែលបានរៀបចំឲ្យមានកម្មវិធីចែកអំណោយនេះឡើង ក្នុងការចូលរួមចំណែកជាមួយរាជរដ្ឋាភិបាលគិតគូរអំពីសុខទុក្ខជីវភាព របស់ប្រជាពលរដ្ឋក្នុងវិបត្តិជំងឺកូវីដ-១៩។ លោក ដួង តារា ថ្លែងថា កត្តាដែលអាចវិនិយោគទៅលើវិស័យផ្សេងៗបាន ដោយសារប្រទេសជាតិយើងមានសុខសន្តិភាពពេញលេញ ដែលសន្តិភាពនេះមិនអាចកើតឡើងដោយឯកឯងបាននោះទេ បើគ្មានសម្ដេចតេជោហ៊ុន សែនជាអ្នកដឹកនាំដ៏ឆ្នើមនិងឈ្លាសវៃក្នុងការស្វែងរកសន្តិភាពជូនជាតិមាតុភូមិ ហើយបានប្រែក្លាយប្រទេសពីចំណុចសូន្យឲ្យមានការអភិវឌ្ឍន៍រីកចំរើនលើគ្រប់វិស័យ។

លោក សោម សុធា ក៏បានឧបត្ថម្ភដីឡូតិ៍ ជំហានដំបូងចំនួន ១០ឡូតិ៍ ដល់លោក ដួង តារា ដើម្បីទុកសម្រាប់ចែកជូនបន្ត ដល់ពលរដ្ឋខ្វះខាតផងដែរ៕ ដោយ:ភក្ដី