គណបក្សហ៊្វុនស៊ិនប៉ិច ប្រកាសថា នឹងចាត់វិធានការតាមច្បាប់ ចំពោះបុគ្គលក្លែងបន្លំឋានៈ និងក្លែងឯក​សារនានារបស់គណបក្ស

គណបក្សហ៊្វុនស៊ិនប៉ិច នៅរសៀលថ្ងៃទី ១៤ ខែធ្នូ ឆ្នាំ ២០២១នេះ បានចេញសេចក្ដីប្រកាសព័ត៌មាន ដោយបានបញ្ជាក់ថា នឹងចាត់វិធានការតាមផ្លូវច្បាប់ ចំពោះបុគ្គលដែលបានក្លែងបន្លំឋានៈ និងក្លែងឯកសារនានារបស់គណបក្ស ដែលធ្វើឲ្យមានការភ័ន្តច្រឡំដល់សមាជិក-សមាជិកា គណបក្ស និងសាធារ​ណជន។

សេចក្ដីប្រកាសព័ត៌មាន បានបញ្ជាក់ដែរថា បច្ចុប្បន្នគណបក្សហ៊្វុនស៊ិនប៉ិច ស្ថិតនៅក្រោមការដឹកនាំគ្រប់គ្រងចាត់ចែង និងសម្រេចរាល់ការងារ របស់ព្រះអង្គម្ចាស់ នរោត្តម ចក្រាវុធ ព្រះប្រធានស្ដីទី ស្របតាមច្បាប់។ ក្នុងនោះ ក៏បានប្រកាសបដិសេធទាំងស្រុង ចំពោះសេចក្ដីប្រកាសព័ត៌មាន ស្ដីពី លទ្ធផលនៃអង្គប្រជុំវិសាមញ្ញ គណៈកម្មាធិការនាយកគណបក្សហ៊្វុនស៊ិនប៉ិច ចុះថ្ងៃទី ១៣ ខែធ្នូ ឆ្នាំ ២០២១ ដែ​ល​បានរៀបចំដោយបុគ្គលមួយចំនួនតូច ដែលបាត់បង់នីតិសម្បទា និងបាត់បង់សមាជិកភាព ពីគណបក្សរួចទៅហើយ៕

អត្ថបទ៖ ឃួន សុភ័ក្រ