ព័ត៌មានជាតិ

ស្អែកនេះ សម្តេចតេជោ ហ៊ុន សែន នឹងអញ្ជើញសម្ពោធសណ្ឋាគារផ្កាយ៥ ថ្មីមួយទៀតនៅភ្នំពេញ

បានផុស

៣ years មុន

នៅ

ថ្ងៃអង្គារ ១៤ ធ្នូ ២០២១

ដោយ

ថ្ងៃស្អែក ទី ១៥ខែ ធ្នូ ឆ្នាំ ២០២១ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នឹងអញ្ជើញសម្ពោធសណ្ឋាគារ ហៃយ៉ាត់ រីជិនស៊ី ភ្នំពេញ ដែលបានដាក់ឲ្យដំណើរការកាលពីដើមឆ្នាំ ២០២១។ សណ្ឋាគារ ហៃយ៉ាត់ រីជិនស៊ី ភ្នំពេញ ជាសណ្ឋាគារផ្កាយប្រាំ ដែលជាការវិនិយោគរួមគ្នារវាងក្រុមហ៊ុនក្នុងស្រុក និង វិនិយោគទុនមកពីសហរដ្ឋអាមេរិក ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សណ្ឋាគារ ហៃយ៉ាត់ រីជិនស៊ី ភ្នំពេញ មានបន្ទប់ចំនួន ២៤៧បន្ទប់ មានភោជនីយដ្ឋានប្រណីត សាលប្រជុំដ៏ទំនើប បន្ទប់ស្ប៉ា ស្កាយបារ៍ ព្រមទាំងសេវាកម្មជាច្រើនទៀត ។ Market Café & Lounge ត្រូវបានរចនាឡើងដោយអនុញ្ញាតឲ្យពន្លឺព្រះអាទិត្យចាំងចូលមកយ៉ាងគ្រប់គ្រាន់និងមានបម្រើអាហារដ៏ឆ្ងាញ់ពិសា ។ The Attic បារ៍ ដែលស្ថិតនៅជាន់ទី ២ នៃវីឡាសម័យអាណានិគមបារាំងក៏ត្រូវបានរចនាយ៉ាងល្អឯកដោយផ្តល់ជូនបរិយាកាសនៃការច្របាច់បញ្ចូលគ្នានៃស្ថាបត្យកម្មសម័យទំនើប និងសម័យអាណានិគមបារាំង ។ ភោជនីយដ្ឋាន FiveFive Rooftop & Bar ដែលស្ថិតនៅជាន់ទី ១៤ អាចមើលឃើញទេសភាពដ៏ត្រកាលនៃទន្លេចតុមុខ ។ Metropole Underground គឺជាបារ៍ដែលស្ថិតនៅជាន់ក្រោមដី ។

សណ្ឋាគា ហៃយ៉ាត់ រីជិនស៊ី ភ្នំពេញ បានអភិរក្សវីឡាសម័យអាណានិគមបារាំង ដោយបានកែលម្អឲ្យមានភាពរឹងមាំ ដោយរក្សាទម្រង់ និងរចនាបថដើមទាំងស្រុង ដែលនេះ គឺជាផ្នែកមួយនៃការរក្សាអត្តសញ្ញាណក្នុងតំបន់ ។ ចំណុចសំខាន់បំផុតរបស់សណ្ឋាគារនេះ គឺអគារបេតិកភណ្ឌសម័យបារាំង ដែលត្រូវបានជួសជុលកែលម្អឡើងវិញយ៉ាងស្រស់ស្អាត ហៅជាទូទៅថា ខឡូញាលហោស។ មានពាក្យចចាមអារ៉ាមថា ភូមិគ្រឹះនោះ ត្រូវបានសាងសង់ឡើង ធ្វើជាព្រះរាជដំណាក់សម្រាប់ព្រះអង្គម្ចាស់ក្សត្រីយមួយអង្គនាដើមទសវត្សរ៍ឆ្នាំ១៩០០។ ស្ថាបត្យករ បានចំណាយពេលយ៉ាងច្រើន ដើម្បីជួសជុលកែលម្អភូមិគ្រឹះនេះឡើងវិញ ដែលបច្ចុប្បន្ននេះ ភូមិគ្រឹះនេះ គឺជាច្រកចូល និងជាកន្លែងទទួលភ្ញៀវរបស់សណ្ឋាគារ ។

គួររំលឹកជូនថា ការសម្ពោធសណ្ឋាគារនេះ ត្រូវបានលើកពេលម្តងហើយកាលពីខែកុម្ភៈ២០២១ ។ កម្មវិធីសម្ពោធសណ្ឋាគារ«ហៃយ៉ាត់ រីជិនស៊ី ភ្នំពេញ»ដែលជាសណ្ឋាគារវិនិយោគរវាងខ្មែរ និងសហរដ្ឋអាមេរិក ដំបូងគ្រោងធ្វើនៅថ្ងៃទី ២៦ ខែកុម្ភៈ ២០២១ ដោយសម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន អញ្ជើញជាអធិបតីសម្ពោធដាក់ដំណើរការសណ្ឋាគារ តែដោយសារបញ្ហាកូវីដ១៩ ក៏បានផ្អាកទៅវិញ៕

អត្ថបទ ៖ ណារី

Related Topics:សម្ដេចតេជោ ហ៊ុន សែន