ក្រសួងអប់រំ នឹងរៀបចំសន្និសីទ​សារព័ត៌មានស្តីពី ដំណើរការរៀបចំប្រឡងបាក់ឌុបនៅថ្ងៃទី២០ធ្នូ

ក្រសួងអប់រំ យុវជន និងកីឡា នឹងរៀបចំសន្និសិទសារព័ត៌មានស្តីពីដំណើរការរៀបចំការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា ឬបាក់ឌុប នៅថ្ងៃទី២០ខែធ្នូឆ្នាំ២០២១។ ការប្រឡងបាក់ឌុប នឹងធ្វើឡើងនៅថ្ងៃទី ២៧ ខែធ្នូ ២០២១ ខាងមុខ។

សេចក្តីប្រកាសព័ត៌មានរបស់ក្រសួងអប់រំ យុវជន និងកីឡា ចុះថ្ងៃទី១៧ ខែធ្នូនេះ បានឱ្យដឹងថា ក្រសួងអប់រំ យុវជន និងកីឡា នឹងរៀបចំសន្និសីទសារព័ត៌មាន ស្តីពីដំណើរការរៀបចំការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា សម័យប្រឡង៖ ២៧ ធ្នូ ២០២១ ក្នុងគោលបំណង ដើម្បីផ្តល់ព័ត៌មានពិស្ដារស្តីពីដំណើរការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា ។ បើតាមក្រសួងអប់រំ គឺសន្និសីទសារព័ត៌មាននេះ នឹងប្រព្រឹត្តទៅក្រោមអធិបតីភាពលោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួង អប់រំ​ និងយុវជន នៅអគារទីស្តីការក្រសួងអប់រំ យុវជន និងកីឡានៅថ្ងៃទី២០ ខែធ្នូ ឆ្នាំ២០២១ វេលាម៉ោង ៨ និង០០នាទី ព្រឹក។

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍ថា សម្រាប់ការប្រឡងបាក់ឌុបនៅឆ្នាំនេះ មានបេក្ខជនដាក់ពាក្យប្រឡងចំនួន ១១៥១៤៩ នាក់ បេក្ខនារី ៦០៦៨២នាក់ បេក្ខជនស្វៃរិន ៤៣៣៤នាក់ (នារី១៧៦២នាក់) បេក្ខជនបំពេញវិជ្ជា ៣៤៦១នាក់ (នារី១០៥៣នាក់) បេក្ខជនស្វៃរិន-បំពេញវិជ្ជា២០៤ ៣ នាក់ (នារី៤៦៨នាក់) ចែកជា ២០៤មណ្ឌល ស្មើនឹង ៤៦៥២បន្ទប់៕

អត្ថបទ ៖សំអឿន