ក្រោយរកឃើញ Omicron ច្រើនឡើងៗ ថៃ ពិចារណាដាក់ភ្ញៀវទេសចរ បរទេសធ្វើចត្តាឡីស័កជាថ្មី

រដ្ឋមន្ត្រីសុខាភិបាលសាធារណៈរបស់ប្រទេសថៃបាននិយាយនៅ ថ្ងៃចន្ទ ទី២០ ខែធ្នូនេះថា ក្រសួងរបស់លោកនឹងស្នើឲ្យដាក់ការធ្វើចត្តាឡីស័កសម្រាប់ភ្ញៀវបរទេសឡើងវិញ ដោយសារការព្រួយបារម្ភអំពីការរីករាលដាលនៃវីរុសកូវីដបំប្លែងខ្លួន Omicron ។

លោក Anutin Charnvirakul បានប្រាប់ទូរទស្សន៍ Inside Thailand ថា សំណើនេះនឹងលុបចោលការលើកលែងការធ្វើចត្តាឡីស័កនាពេលបច្ចុប្បន្នសម្រាប់អ្នកទស្សនាដែលបានចាក់វ៉ាក់សាំង ហើយត្រឡប់ទៅ កន្លែងធ្វើចត្តាឡីស័កក្នុងសណ្ឋាគារវិញ ។

លោកបាននិយាយថា សំណើនេះនឹងត្រូវធ្វើឡើងទៅ កាន់ក្រុមការងារកូវីដ ១៩ របស់រដ្ឋាភិបាលក្នុងពេលឆាប់ៗនេះ ដោយមិនចាំបាច់បញ្ជាក់លម្អិតបន្ថែមនោះទេ ។

លោក Anutin បាននិយាយថា មកទល់ពេលនេះ ប្រទេសថៃបានរកឃើញមនុស្សចំនួន ៦៣ នាក់ហើយដែលឆ្លង Omicron ដោយមានទាំងករណីឆ្លងក្នុងសហគមន៍ និងករណីនាំចូល ។

គួរបញ្ជាក់ថា ការកត់សម្គាល់របស់លោករដ្ឋមន្ត្រីធ្វើឡើងប៉ុន្មានសប្តាហ៍ប៉ុណ្ណោះ បន្ទាប់ពីថៃបើកប្រទេសឡើងវិញសម្រាប់ភ្ញៀវបរទេសក្នុងខែវិច្ឆិកា ដោយបញ្ចប់នូវគោលនយោបាយចូលប្រទេសដ៏តឹងរ៉ឹងជិត ១៨ ខែ ដែលបានរួមចំណែកដល់ការដួលរលំនៃវិស័យទេសចរណ៍ ដែលជាកត្តាជំរុញសេដ្ឋកិច្ច និងឧស្សាហកម្មដ៏សំខាន់ដែលបានទាក់ទាញភ្ញៀវទេសចរចំនួន ៤០ លាននាក់ក្នុងឆ្នាំ ២០១៩ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ទីបំផុត ថៃ មានអ្នកឆ្លង អូមីក្រុង ក្នុងសហគមន៍ហើយ! (មានវីដេអូ)