កម្ពុជា រចនានិមិត្តសញ្ញាអាស៊ាន ដោយបង្កប់នូវអត្ថន័យ«សន្តិភាព»នៃប្រទេសសមាជិកទាំង១០

ក្នុងនាមជាប្រធានផ្លាស់វេនរៀបចំកិច្ចប្រជុំកំពូលអាស៊ាននៅឆ្នាំ២០២២នេះ កម្ពុជា បានរចនានូវនិមិត្តសញ្ញាអាស៊ានថ្មីមួយ ដោយបានបង្កប់នូវអត្ថន័យនៃភាពរុងរឿង និងសន្តិភាពដែលប្រទេសសមាជិកអាស៊ានទាំង១០បានខិតខំបង្កើតឡើង។ នេះ បើតាមការរំលេចឲ្យដឹងរបស់លោកឧបនាយករដ្ឋមន្រ្តី ប្រាក់ សុខុន រដ្ឋមន្រ្តីការបរទេសកម្ពុជាកាលពីថ្ងៃទី០៣ ខែមករា ឆ្នាំ២០២២។

តាមរយៈទំព័រហ្វេសប៊ុក លោកឧបនាយករដ្ឋមន្រ្តី ប្រាក់ សុខុន បានសរសេរថា៖ « និមិត្តសញ្ញា៖ ត្របកឈូកគឺជាទម្រង់ក្បាច់ខ្មែរ តំណាងឱ្យភាពរុងរឿង និងភាពសុខដុមរមនានៃសន្តិភាពដែលប្រទេសសមាជិកអាស៊ានទាំង១០បានខិតខំបង្កើតឡើង។ ពណ៌ទាំងបីនៅលើស្រទាប់របស់វា គឺបានមកពីពណ៌នៃទង់ជាតិកម្ពុជា ចំណែកពណ៌មាសតំណាងឱ្យពណ៌ និង ភាពចម្រុះនៃអាស៊ាន»។

កិច្ចប្រជុំកំពូលអាស៊ាននៅឆ្នាំ២០២២ដែលកម្ពុជាជាម្ចាស់ផ្ទះនេះ ធ្វើឡើងក្រោមមូលបទ៖ «អាស៊ានរួមគ្នាធ្វើ៖ ដោះស្រាយបញ្ហាប្រឈមទាំងអស់គ្នា»។ លោក ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ បានគូសបញ្ជាក់កាលពីថ្ងៃចន្ទតាមរយៈទំព័រហ្វេសប៊ុកថា ស្មារតីនៃមូលបទនេះ គឺ ភាពរួបរួមគ្នា សាមគ្គីភាព និងភាពសុខដុមរមនា។ ចំណែក គោលបំណងសំខាន់វិញ គឺរក្សាឱ្យបាននូវមជ្ឈភាព និងសាមគ្គីភាពរបស់អាស៊ាន រួមគ្នាដោះស្រាយបញ្ហាប្រឈម ធានាឱ្យបាននូវវឌ្ឍនភាពការងាររួមដែលមានស្រាប់ និងលើកកម្ពស់ការផ្តោតសំខាន់ទៅលើមនុស្សជាតិ៕

អត្ថបទ ៖ វណ្ណ សុគន្ធា