រាជ​រដ្ឋាភិ​បាល​បង្កើត​គណៈ​កម្មការ​គ្រប់គ្រង​ និងអភិវឌ្ឍន៍​ទេសចរណ៍​សៀមរាប​-អង្គរ

រាជរដ្ឋាភិបាលកម្ពុជា បានសម្រេចបង្កើតគណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប-អង្គរ ដើម្បីដឹកនាំសម្របសម្រួល និងត្រួតពិនិត្យការអភិវឌ្ឍគោលដៅទេសចរណ៍ខេត្តសៀមរាប ដោយអនុវត្តតាមផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ២០២១-២០៣៥ ឱ្យមានប្រសិទ្ធភាពសំដៅ បង្កើនភាពប្រកួតប្រជែង និងធានាបាននូវនិរន្តរភាព។

អនុក្រឹត្យ ចុះហត្ថលេខាដោយសម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជាទទួលបាននៅថ្ងៃទី០៥ ខែមករា នេះបានបញ្ជាក់ថា ការគ្រប់គ្រង និងការអភិវឌ្ឍទេសចរណ៍ នៅតាមតំបន់ទេសចរណ៍អាទិភាព ត្រូវមានអង្គភាពគ្រប់គ្រងគោលដៅទេសចរណ៍ដោយឡែក ដែលស្ថិតក្រោមការគ្រប់គ្រងរបស់គណៈកម្មការ។

អង្គភាពគ្រប់គ្រងគោលដៅទេសចរណ៍ដោយឡែក ត្រូវបានបង្កើតឡើងតាមតំបន់ចំនួន៦ រួមមាន៖ តំបន់ឧទ្យានជាតិភ្នំគូលែន តំបន់ទេសចរណ៍ជុំវិញតំបន់ការពារប្រាសាទបន្ទាយស្រី តំបន់បេតិកភណ្ឌអង្គរ តំបន់ក្រុងសៀមរាប តំបន់បឹងទន្លេសាប និងតំបន់ទេសចរណ៍សៀមរាបថ្មី។

សមាសភាពគណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប-អង្គរ មានរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាប្រធាន និងមានតំណាងក្រសួង ស្ថាប័នមួយចំនួនទៀត ជាសមាជិកជាច្រើនទៀត។

តាមរបាយការណ៏របស់លោក ថោង ខុន រដ្ឋមន្រ្តីក្រសួងទេសចរណ៏បានឲ្យដឹងថា នៅក្នុងឳកាសឆ្លងឆ្នាំសកលរយៈពេល៣ ថ្ងៃ មានទេសចរជាង២លាននាក់ បានចេញកម្សាន្តនៅទូទាំងប្រទេស ហើយខេត្តសៀមរាបបានក្លាយជាគោលដៅទីមួយ នៃដំណើរកម្សាន្ត បន្ទាប់មក គឺខេត្តព្រះសីហនុ ហើយតាមតួលេខបង្ហាញថា ចំនួនភ្ញៀវទេសចរណ៏មានការកើនឡើងដល់ទៅ៦៣.៦៥ ភាគរយ ធៀបនឹងឱកាសឆ្លងឆ្នាំសកល២០២០ ឆ្លងចូល២០២១៕  

អត្ថបទ៖ កោះកែវ