សម្ដេចតេជោ៖កម្ពុជា ត្រូវការចាក់វ៉ាក់សាំងទៅដល់មនុស្សចំនួន១០លាននាក់

ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានថ្លែងចំពោះមុខថ្នាក់ដឹកនាំ នៃបណ្ដាប្រទេស ទាំងប្រាំ ក្នុងកិច្ចប្រជុំ ACMEC លើកទី៩ នាព្រឹកថ្ងៃទី៩ ខែធ្នូ ឆ្នាំ២០២០នេះ ដោយជំរុញដល់ប្រទេសទាំងអស់ ត្រូវយកចិត្តទុកដាក់ទៅ​លើបញ្ហាវ៉ាក់សាំង គ្រាដែលប្រទេសវៀតណាម បានប្រកាសទិញវ៉ាក់សាំង ប្រទេសឡាវ និងថៃ ក៏បានប្រកាស​ទិញវ៉ាក់សាំងដែរ។

សម្ដេចតេជោ ហ៊ុន សែន នាយករដ្ឋមន្រ្តី ហ៊ុន សែន បានលើកឡើងថា កម្ពុជាគ្រោងនឹងទិញវ៉ាក់សាំង ចំនួនមួយ​លានដូស ហើយកម្ពុជាក៏ត្រូវការចាក់វ៉ាក់សាំងទៅដល់មនុស្សចំនួន១០លាននាក់ផងដែរ។

សូមបញ្ជាក់ថា នៅក្នុងកិច្ចប្រជុំ ACMEC លើកទី៩ ថ្នាក់ដឹកនាំបានពិភាក្សាគ្នាអំពីការធ្វើការគ្នារួមគ្នាក្នុងក្របខណ្ឌ ACMEC ដោយត្រូវឲ្យមានលេខាធិការដ្ឋាន ACMEC ដែលត្រង់ចំនុចនេះ សម្ដេចតេជោនាយករដ្ឋមន្ត្រីកម្ពុជា បានគាំទ្រ ខណៈថ្នាក់ដឹកនាំ ACMEC នឹងបង្កើតឲ្យមាន លេខាធិការដ្ឋាន ACMEC នេះ នាពេលខាងមុខផងដែរ។

នៅក្នុងកិច្ចប្រជុំនេះដែរ សម្ដេចនាយករដ្ឋមន្ត្រី បានមានប្រសាសន៍លើកឡើងពីការខិតខំប្រឹងប្រែងរបស់កម្ពុជា ក៏ដូចជាសមាជិកទាំងអស់ នៅក្នុងការជំរុញឲ្យប្រទេស ACMEC អនុវត្តសកម្មភាពទទួលបានជោគជ័យ ជាពិសេសគឺការជំរុញការតភ្ជាប់ និងការកសាងសហគមន៍ ACMEC ធ្វើយ៉ាងណាប្រែក្លាយឲ្យអនុតំបន់ ACMEC មានកំណើនសេដ្ឋកិច្ចខ្ពស់ និងជំរុញការបណ្ដុះបណ្ដាលធនធានមនុស្ស ជំរុញការតភ្ជាប់ ជំរុញឲ្យសេដ្ឋកិច្ចអនុតំបន់នេះកាន់តែលឿនទៅមុខ ជាពិសេសគឺការជំរុញការកាត់បន្ថយគំលាត និងការកាត់បន្ថយភាពក្រីក្រ៕