ក្រសួងអប់រំ ណែនាំដល់សាលារដ្ឋ និងឯកជននៅភ្នំពេញ ត្រូវត្រួតពិនិត្យសុខភាពសិស្ស គ្រូ និងបុគ្គលិកសិក្សាជាប្រចាំ

ក្រសួងអប់រំ យុវជន និងកីឡា បានណែនាំឱ្យគ្រឹះស្ថានសិក្សាសាធារណៈ និងឯកជន នៅរាជធានីភ្នំពេញត្រូវត្រួតពិនិត្យសុខភាព និងអាការៈរបស់គ្រូបង្រៀនបុគ្គលិកអប់រំ និងសិស្សានុសិស្ស ឱ្យបានជាប្រចាំដើម្បីទប់ស្កាត់ការឆ្លងរាលដាលជំងឺកូវីដ១៩ ពិសេស ជំងឺកូវីដ១៩បំប្លែងខ្លួនថ្មីប្រភេទអូមីក្រុង។

ការចេញសេចក្តីណែនាំ ស្តីពីការពង្រឹងវិធានការសុវត្ថិភាពសុខភាព នៅតាមគ្រឹះស្ថានសិក្សាសាធារណៈនិងឯកជន នៅរាជធានីភ្នំពេញនេះ បានធ្វើឡើងបន្ទាប់ពីថ្មីៗនេះ មានសាលាឯកជនមួយមានសិស្ស និងគ្រូបានឆ្លងជំងឺកូវីដ១៩ ក្នុងនោះ មានសិស្សម្នាក់ឆ្លងជំងឺកូវីដ១៩បម្លែងខ្លួនថ្មីប្រភេទអូមីក្រុង។

លោកបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួង អប់រំ យុវជន និងកីឡា បានមានប្រសាសន៍ក្នុងសេចក្តីជួនដំណឹងចុះថ្ងៃទី១៩ ខែមករាថា ដើម្បីចូលរួមទប់ស្កាត់ការរាតត្បាតយ៉ាងឆាប់រហ័សនៃវីរុសបំប្លែងខ្លួនប្រភេទដែលតា ឬអូមីក្រុង នៅក្នុងគ្រឹះស្ថានសិក្សាសាធារណៈ និងឯកជន ក្រសួងអប់រំ យុវជន និងកីឡាសូមធ្វើការណែនាំដល់មន្ទីរអប់រំ យុវជននិងកីឡារាជធានីភ្នំពេញ ការិយាល័យអប់រំ យុវជន និងកីឡានៃរដ្ឋបាលខណ្ឌ និងគ្រឹះស្ថានសិក្សាសាធារណៈនិងឯកជនត្រូវពង្រឹងការអនុវត្តវិធានការសុខាភិបាល ការពាក់ម៉ាស់ការពារឱ្យបានខ្ជាប់ខ្ជួននិងការគម្លាតឱ្យបានម៉ឹងម៉ាត់។

លោករដ្ឋមន្ត្រី បានបន្តថាលើសពីនេះត្រូវត្រួតពិនិត្យសុខភាព និងអាការៈ របស់គ្រូបង្រៀន បុគ្គលិកអប់រំ និងសិស្សានុសិស្ស ឱ្យបានជាប្រចាំ។ ក្នុងករណីមានកម្តៅលើសពី៣៧,៥អង្សាសេឬមានរោគសញ្ញាដូចជាក្អក ហៀរសំបោរ ឈឺបំពង់ក ពិបាកដកដង្ហើម ត្រូវណែនាំឱ្យទៅរកសេវាសុខាភិបាលសមស្រប និងអនុញ្ញាតឱ្យឈប់សម្រាករហូតបានធូរស្រាលសុខភាពជាប្រក្រតី ទើបត្រឡប់មកបំពេញភារកិច្ច និងបន្តការសិក្សាដោយផ្ទាល់នៅគ្រឹះស្ថានសិក្សាវិញ។

លោករដ្ឋមន្ត្រីបានណែនាំទៀតថាជាមួយគ្នានេះដែរត្រូវអនុវត្តការបង្រៀន និងរៀនតាមបង្តុំដោយដាក់សិស្សមិនលើសពី ២០ នាក់និងផ្លាស់វេន ចំពោះគ្រឹះស្ថានសិក្សាដែល មានចំណុះសិស្សច្រើន រួមជាមួយនឹងការបង្រៀននិងរៀនតាមអនឡាញ។ លោករដ្ឋមន្ត្រី បានណែនាំដល់មន្ទីរអប់រំ យុវជន និងកីឡារាជធានីភ្នំពេញ ត្រូវផ្សព្វផ្សាយឱ្យបានទូលំទូលាយ ដល់គ្រប់ការិយាល័យអប់រំ យុវជន និងកីឡានៃរដ្ឋបាលខណ្ឌ និងគ្រប់គ្រឹះស្ថានសិក្សាសាធារណៈនិងឯកជនដើម្បីចូលរួមអនុវត្តឱ្យមានប្រសិទ្ធភាពខ្ពស់៕

អត្ថបទ ៖ សំអឿន