GMAC ណែនាំឲ្យសមាជិករបស់ខ្លួន ជំរុញការចាក់វ៉ាក់សាំងដូសជំរុញ ជូនកម្មករក្នុងរាជធានីភ្នំពេញ

សមាគមរោងចក្រកាត់ដេរនៅកម្ពុជា (GMAC) បានណែនាំដល់ដល់សមាជិករបស់ខ្លួន អំពីការជំរុញការចាក់វ៉ាក់សាំងបង្ការជំងឺកូវីដ-១៩ ដូសជំរុញ ឬដូសទី ៣ និងដូសទី ៤ ជូនកម្មករ-និយោជិត នៅក្នុងភូមិសាស្ត្ររាជធានីភ្នំពេញ។

សេចក្ដីជូនដំណឹងរបស់ GMAC នៅថ្ងៃទី ២៧ ខែមករា ឆ្នាំ ២០២២នេះ បានឲ្យដឹងថា យោងតាមស្មារតី​ នៃកិច្ចប្រជុំស្តីពីការប្រយុទ្ធប្រឆាំង នឹងការរីករាលដាលនៃជំងឺកូវីដ-១៩ ជាពិសេសមេរោគកូវីដបំប្លែងខ្លួនថ្មី ប្រភេទអូមីក្រុង (Omicron) នៅតាមរោងចក្រ សហគ្រាស និងការជំរុញកម្មករ-និយោជិតឲ្យមកទទួលវ៉ាក់សាំងបង្ការជំងឺកូវីដ-១៩ រវាងសមាគមរោងចក្រកាត់ដេរនៅកម្ពុជា និងសាលារាជធានីភ្នំពេញ ក្រសួងការងារ និងបណ្តុះបណ្តាលវិជ្ជាជីវៈ ក៏ដូចជាភាគីដែលពាក់ព័ន្ធ ព្រមទាំងអាជ្ញាធរសុខាភិបាល ដែលបានប្រព្រឹត្តិទៅនៅថ្ងៃទី ២៧ ខែមករា ឆ្នាំ ២០២២។

ដូច្នេះសមាគមរោងចក្រកាត់ដេរនៅកម្ពុជា បានក្រើនរំលឹកដល់បណ្តារោងចក្រ-សហគ្រាស ដែលជាសមាជិកទាំងអស់ ឲ្យបង្កើនការយកចិត្តទុកបន្ថែមទៀត ទៅលើការចាក់វ៉ាក់សាំងបង្ការជំងឺកូវីដ-១៩៕