អ្នកនាំពាក្យអំពាវនាវមាតាបិតារៀបចំកម្មវិធីបុណ្យចូលឆ្នាំចិន កុំឱ្យប៉ះពាល់ការសិក្សារបស់កូន

អ្នកនាំពាក្យ ក្រសួងអប់រំ យុវជន និងកីឡា បានធ្វើការអំពាវនាវដល់មាតាបិតាអ្នកអាណាព្យាបាល រៀបចំកម្មវិធីគ្រួសារនៅក្នុងពិធីបុណ្យចូលឆ្នាំប្រពៃណីចិន និងវៀតណាម ធ្វើយ៉ាងណាកុំឱ្យប៉ះពាល់ដល់ការសិក្សារបស់បុត្រធីតា។

លោក រស់ សុវាចា អ្នកនាំពាក្យ ក្រសួងអប់រំ យុវជន និងកីឡា បានមានប្រសាសន៍នៅព្រឹកថ្ងៃទី ៣១ មករា នេះថា បុណ្យចូលឆ្នាំចិន មិនស្ថិតក្នុងប្រតិទិនឈប់សម្រាកការងាររបស់មន្ត្រីរាជការ និយោជិក កម្មករ ប្រចាំឆ្នាំ ២០២២ ទេ។

អ្នកនាំពាក្យក្រសួងអប់រំ បានសូមបុគ្គលិកអប់រំ រៀបចំកម្មវិធីការងារឱ្យមានដំណើរការជាប្រក្រតី និងសូមមាតាបិតាអ្នកអាណាព្យាបាលរៀបចំកម្មវិធីគ្រួសារ កុំឱ្យប៉ះពាល់ដល់ការសិក្សារបស់បុត្រធីតា។

លោក រស់ សុវាចា សង្ឃឹមថា អាណាព្យាបាលមាតាបិតាសិស្សនឹងនាំកូនៗរបស់ខ្លួនមករៀនឱ្យបានគ្រប់ៗគ្នានៅក្នុងឱកាសពិធីបុណ្យចូលឆ្នាំប្រពៃណីជនជាតិចិន វៀតណាមនេះ ដើម្បីកុំឱ្យពួកគេខាតការសិក្សា ឬរៀនមិនទាន់គេជាដើម។

គួរបញ្ជាក់ថា ពិធីសែន និងបុណ្យចូលឆ្នាំចិន និងវៀតណាម នៅឆ្នាំនេះចាប់ពីថ្ងៃទី ៣១ ខែមករា ដល់ថ្ងៃទី ០៣ ខែកម្ភៈឆ្នាំ ២០២២ ហើយជាធម្មតានៅក្នុងពិធីនេះអាចមានគ្រូ និងសិស្សមួយចំនួនដែលមានជាប់ខ្សែស្រឡាយចិន សុំច្បាប់ឈប់សម្រាកក្នុងឱកាសនេះ៕

អត្ថបទ៖ សំអឿន