UNDP៖ ការខាតបង់សេដ្ឋកិច្ច ដោយគ្រោះថ្នាក់ចរាចរណ៍​ក្នុង១ឆ្នាំប្រមាណ ៤៥០លានដុល្លារ

គ្រោះថ្នាក់ចរាចរណ៍ គឺជាជំងឺរ៉ាំរ៉ៃ ដែលបានឆក់យកជីវិតមនុស្សនៅលើដងផ្លូវជារៀងរាល់ថ្ងៃ។ តាមការវាយតម្លៃ ជាមធ្យមមានមនុស្សស្លាប់ ៥នាក់ក្នុង១ថ្ងៃ ដោយសារគ្រោះថ្នាក់ចរាចរណ៍។

យោងតាមការសិក្សារបស់កម្មវិធីអភិវឌ្ឍន៍សហប្រជាជាតិ (UNDP) បានបង្ហាញថា ផលប៉ះពាល់ និងការខាតបង់ផ្នែកសេដ្ឋកិច្ចក្នុងមួយឆ្នាំ ដោយសារគ្រោះថ្នាក់ចរាចរណ៍ រួមមាន ការចំណាយលើមន្ទីរពេទ្យ ទ្រព្យសម្បត្តិឯកជន ទ្រព្យសម្បត្តិជាតិ បានកើនឡើងដល់ ៤៥០លានដុល្លារអាមេរិកហើយ ដែលបញ្ហានេះ ជាការខាតបង់ដ៏ធំធេងសម្រាប់ប្រទេសជាតិយើង។ ​

ថ្លែងក្នុងកម្មវិធីសំណេះសំណាលជាមួយមន្ត្រីរាជការដែលជាអ្នកជិះម៉ូតូ និងចែកមួកសុវត្តិភាព កាលពីថ្ងៃទី ០២ ខែមករា ឆ្នាំ ២០២២ លោកទេសរដ្ឋមន្ត្រី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានជំរុញលើកទឹកចិត្តឱ្យមន្ត្រីរាជការក្រសួង ដែលជាអ្នកប្រើប្រាស់ផ្លូវថ្នល់ ចូលរួមធ្វើជាគំរូល្អសម្រាប់ប្រជាពលរដ្ឋក្នុងការប្រើប្រាស់យាន្តជំនិះ និងការគោរពច្បាប់ចរាចរណ៍ឱ្យបានម៉ឺងម៉ាត់។ លោករដ្ឋមន្រ្តីថ្លែងដូច្នេះថា« យើងជាអ្នកជួយតាក់តែងច្បាប់ កុំឱ្យគេនិយាយថា យើងជាអ្នកធ្វើច្បាប់ ប៉ុន្តែយើងជាអ្នករំលោភច្បាប់ខ្លួនយើង»។

ការវាយតម្លៃមួយបានបង្ហាញថា មានកត្តាចំនួន៤ ដែលនាំឲ្យមានការបាត់បង់ជីវិត ដោយគ្រោះថ្នាក់ចរាចរណ៍ រួមមាន ការប្រើប្រាស់គ្រឿងស្រវឹង និងគ្រឿងញៀន ការបើកបរល្បឿនលឿន ការមិនគោរពច្បាប់ចរាចរណ៍ និងការប្រើប្រាស់ទូរស័ព្ទពេលកំពុងបើកបរ។

យោងតាម​របាយការណ៍គ្រោះថ្នាក់ចរាចរណ៍របស់ក្រសួងមហាផ្ទៃ ក្នុងរយៈពេលពេញមួយឆ្នាំ២០២១ ករណីគ្រោះថ្នាក់ចរាចរណ៍នៅទូទាំងប្រទេសបានកើតឡើងចំនួន​ ២,៦៧០រកណី​ថយចុះចំនួន១៦ភាគរយ​ពីឆ្នាំ២០២០ ចំនួន ១,៦៤៦នាក់។ ក្នុងនោះ ចំនួនអ្នកបាត់បង់ជីវិតក្នុងហេតុការណ៍គ្រោះថ្នាក់ចរាចរណ៍មានចំនួន ១,៤៩៧នាក់ ថយចុះ ១៤៥នាក់​ ស្នើ ៩ភាគរយ និងអ្នករងបួសមានចំនួន ៣,៦១៥នាក់ ថយចុះ ១,០៧១នាក់ ធៀបនឹងឆ្នាំ២០២០៕

អត្ថបទ៖ ទួន សុផល