ពេលមេរោគបង្ខំាងយើងនៅផ្ទះ ស្ត្រេស? មានរឿងខ្លះយើងអាចធ្វើបាន!

នៅផ្ទះយូរពេកក៏កើតមានអារម្មណ៍ឆាប់ខឹង អផ្សុក ឬបាក់ទឹកចិត្ត ខ្សោយ​គំនិតច្នៃប្រតិដ្ឋ សកម្មភាព​ក៏យឺតយ៉ាវមិនស្វាហាប់។

ក្នុងពេលនេះ អ្នកខ្លះចាប់ផ្ដើមធុញទ្រាន់មិនដឹងថាធ្វើអ្វី ហើយក៏ដេកក្រោក អង្គុយអូសទូរសព្ទចុះឡើងអស់ថ្មក៏សម្រាកទៅ។ ផ្លូវចិត្ត​នៅតែមានបញ្ហា។

នេះជាវិធី ៩ យ៉ាងដែលអាចប្រើបាន​ខណៈពេលជាប់នៅផ្ទះឱ្យទៅជាប្រយោជន៍៖

១.​ ស្វែងរកទម្លាប់ថ្មី

ពីមុនមកអ្នកអាចជាមនុស្សដែលក្រោកយូរៗ រួចក៏ប្រញាប់ប្រញាល់ទៅធ្វើការ មិនបានហាត់ប្រាណ ហើយជួនកាលមិនទាំងបានញ៉ាំអាហាពេលព្រឹកផង។ ប៉ុន្តែពេលនេះអ្នកមិនអាចចេញក្រៅដូចពីមុនទេ ដូច្នេះវាជាពេលផ្លាស់ប្ដូរទម្លាប់មិនល្អខ្លះចេញ និងជំនួសដោយទម្លាប់ថ្មី។ កែទម្លាប់ថ្មីដោយព្យាយាមក្រោកពីដំណេកឲ្យទៀងទាត់ ចំណាយពេលទទួលអាហារពេលព្រឹកឲ្យបានស្រួលបួល និងចាប់ផ្ដើមធ្វើអ្វីដែលខ្លួនចូលចិត្តពេលព្រហាមឡើង។

២. រៀនជំនាញថ្មី

ភ្លាមៗនេះអ្នកកំពុងមានមានពេលទំនេរច្រើន តើអ្នកនឹងធ្វើអ្វី? ទាន់ឱកាសល្អមានពេលទំនេរ ​អ្នកអាចចុះឈ្មោះចូលរៀនវគ្គសិក្សាថ្មីតាមអ៊ិនធរណេតដូចជា រៀនយូហ្គា ឬរៀនភាសាថ្មីជាដើម។ បើមានសមាជិកក្នុងផ្ទះនៅជាប់ក្នុងផ្ទះជាមួយគ្នា អ្នកអាចអនុវត្តវគ្គថ្មីជាមួយគេបាន។

៣ មើលភាពយន្តឬកម្មវិធីទូរទស្សន៍ជាភាសាថ្មី

វាមានប្រយោជន៍សម្រាប់អ្នកដែលមើលភាពយន្តឬកម្មវិធីទូរទស្សន៍ជាភាសាថ្មី ជាពិសេសអ្នកដែលកំពុងរៀនភាសាបរទេសហើយចង់បង្កើនវាក្យសព្ទរបស់ខ្លួន។ មានខ្សែភាពយន្តភាសាបរទេសជាច្រើនដែលអាចរកបាននៅលើបណ្តាញស្ទ្រីម ឬគេហទំព័រ ហើយរឿងទាំងនោះភាគច្រើនថតបានល្អៗទៀតផង។

៤. ភ្ជាប់ទំនាក់ទំនងសង្គម

ទោះបីជាលើពិភពលោកកំពុងជឿនលឿនដោយបច្ចេកវិទ្យារួមមាន WhatsApp  Skype Facebook Instagram ​និងបណ្ដាញជាច្រើនទៀតក្ដី ប៉ុន្តែការរក្សាទំនាក់ទំនងបច្ចុប្បន្នហាក់មិនសូវជិតស្និទ្ធប៉ុន្មានឡើយ។ ក្នុងពេលនេះជាវេលាល្អដែលអាចឲ្យអ្នកភ្ជាប់ទំនាក់ទំនងជាមួយក្រុមគ្រួសារ និងមិត្តភក្ដិបានយូរជាងមុន និងល្អជាងមុនក៏ថាបាន ព្រោះអ្នកមានពេលនៅផ្ទះច្រើន។ មិនថាការហៅតាមទូរសព្ទឬវិធីណាក៏ដោយ អ្នកគួរភ្ជាប់បណ្តាញជាមួយមិត្តភក្តិសាលា ឬមិត្តរួមការងារចាស់ និងពិភពលោកជានិច្ច។

៥. ស្វែងរករសជាតិថ្មីនៃពិភពលោក

ការសរសេរ ការអានសៀវភៅធ្វើដំណើរឬប្រលោមលោក សុទ្ធតែអាចនាំអ្នកទៅកាន់ពេលវេលានិងទីកន្លែងមួយផ្សេងទៀតដែលអ្នកចង់បាន។ ជ្រើសរើសសៀវភៅធ្វើដំណើរឬប្រលោមលោកដែលបំផុសគំនិតនៅក្នុងប្រទេសមួយដែលអ្នកមិនធ្លាប់ទៅ នោះអ្នកនឹងរកឃើញអ្វីថ្មីៗ ហើយប្លែកអារម្មណ៍មិនខាន។

៦. ចម្អិនអាហារ

រឿងល្អបំផុតមួយពីការនៅផ្ទះ គឺចូលផ្ទះបាយដោយគ្មានកំណត់។ បើអ្នកអាចចេញទៅហាងដើម្បីទិញអាហារ ហេតុអ្វីបានជាមិនរៀនធ្វើម្ហូបដោយខ្លួនឯងដោយស្រាវជ្រាវតិចតួចតាមអ៊ិនធរណេតឬក្នុងសៀវភៅធ្វើម្ហូប ឬសម្រាប់អ្នកចេះធ្វើម្ហូបស្រាប់អាចសាកល្បងរូបមន្តថ្មីៗ។ ថាមិនត្រូវអ្នកអាចក្លាយជាអ្នកចម្អិនអាហារជំនាញផងក៏មិនដឹង!

៧. បង្កើតសួនពណ៌បៃតង

បើមានកន្លែងទំនេរនៅខាងក្រៅ​ ព្យាយាមកុំទំនេរដៃដោយធ្វើការនៅសួនច្បារខ្លះ ហើយបង្វែរវាទៅជាសួនបន្លែ ឬសួនផ្កា ឬសួនអ្វីក៏បានឲ្យតែមានប្រយោជន៍។ បន្ទាប់ពីសួនចេញផ្លែផ្កានិងមានពណ៌បៃតង អ្នកនឹងទទួលអារម្មណ៍ល្អតាមរយៈវាមិនខាន។

៨. បិទអ៊ិនធើណេត

ពិភពអ៊ិនធរណេតអាចរំខានយើង​វិលវល់លើសលុបនៅពេលខ្លះ។ គួរកាត់បន្ថយពេលវេលាលើអេក្រង់ឬបិទវាមួយរយៈ។ សម្រាកពីព័ត៌មានឌីជីថលនិងប្រព័ន្ធផ្សព្វផ្សាយសង្គមក៏អាចធ្វើឲ្យសុខភាពផ្លូវចិត្តរបស់យើងប្រសើរដែរ។ អ្នកអាចទុកទូរសព្ទចោលសិន ហើយចេញក្រៅផ្ទះស្រូបខ្យល់អាកាសបរិសុទ្ធ នោះអ្នកនឹងមានអារម្មណ៍ធូរស្បើយនិងស្រស់ស្រាយមុនពេលចាប់ផ្ដើមធ្វើអ្វីផ្សេងទៀត។

៩. សម្រាក

ទោះបីជាអ្នកជាប់នៅផ្ទះ ក៏វាមិនមែនជាសម្ពាធអ្វីដែរ យើងអាចនិយាយបានថាវាជាពេលល្អសម្រាប់សម្រាកលំហែរពីភាពអ៊ូអរនៃសង្គម។ ជាពិសេសអ្នកអាចមានពេលស្ងាត់ពីការរំខានដើម្បីសមាធិឲ្យអារម្មណ៍ស្ងប់បានទៀតផង៕

ប្រែសម្រួល៖ សន្យា

ប្រភព៖​ ef.com

ចុចអាន៖ វិធី ៥ យ៉ាងដើម្បីបង្កើតផលិតភាពការងានៅផ្ទះឲ្យល្អដូចធ្វើការនៅការិយាល័យ

ចុចអាន៖ ទិញអីវ៉ាន់ ទិញដោយ​វិធី​ឆ្លាតវៃទំាងនេះ​ក្នុងរដូវកាលកូវីដ-១៩