ធ្លាយត្រីងាប់ជាង ១០ម៉ឺនក្បាលពីនាវាអូសចៃរ៉ា អណ្តែតពេញមហាសមុទ្រអាត្លង់ទិក 

ការស៊ើបអង្កេតមួយត្រូវបានបញ្ជា បន្ទាប់ពីនាវាអូសចៃរ៉ាធំលំដាប់ទីពីររបស់ពិភពលោក បានទម្លាក់ត្រីងាប់ជាង១០០,០០០ក្បាល ចូលទៅក្នុងមហាសមុទ្រអាត្លង់ទិក ដែលជាហេតុបង្កឲ្យមានការអះអាងថា ត្រីទាំងនោះ ត្រូវបានបញ្ចេញចោលដោយចេតនា។

យោងតាមក្រុមឧស្សាហកម្មនេសាទ PFA ដែលតំណាងឲ្យម្ចាស់នាវា បានឲ្យដឹងថា ការធ្លាយចេញពីនាវា FV Margiris នៅឯឆ្នេរសមុទ្របារាំងគឺបណ្តាលមកពីការរហែកសំណាញ់។

វីដេអូ​នៃ​ត្រី​ងាប់​ក្នុងសមុទ្រដែលមើលទៅដូចជាកម្រាលព្រំយក្ស នៅ​ឈូង​សមុទ្រ Biscay ត្រូវ​បាន​ថតជាប់​ដោយ​ក្រុម​យុទ្ធនាការ​បរិស្ថាន Sea Shepherd France។

រដ្ឋមន្ត្រីដែនសមុទ្របារាំងលោកស្រី Annick Girardin បានពណ៌នារូបភាពទាំងនេះថា “គួរឲ្យតក់ស្លុត” ហើយនិយាយថា លោកស្រីបានស្នើសុំឲ្យអាជ្ញាធរឃ្លាំមើលការនេសាទជាតិរបស់ប្រទេសនេះ បើកការស៊ើបអង្កេត។

គួរបញ្ជាក់ថា ត្រី​នេះ​មាន​ពណ៌​ខៀវលាយ ស ជា​ពូជរបស់​ត្រី Cod ដែល​គេយកទៅផលិតជាប្រេង​ត្រី និង​អាហារ៕

សូមទស្សនាវីដេអូ៖ 

ប្រែសម្រួល៖ Vann Vann

ប្រភព៖ Sky

ចុចអាន៖ ត្រី Piranha ខាំស៊ីមនុស្សសុសសាច់ មានអ្នកស្លាប់ជាបន្តបន្ទាប់នៅ ប៉ារ៉ាហ្គាយ