សម្តេច ហ៊ុន សែន ៖ «កូវីដអត់មានអ្នកស្លាប់ តែបែរជាមានអ្នកស្លាប់ដោយគ្រោះថ្នាក់ចរាចរណ៍ជារៀងរាល់ថ្ងៃ»

នៅក្នុងពិធីសម្ពោធដាក់ឱ្យប្រើប្រាស់កំណាត់ផ្លូវជាតិលេខ៧ក្នុងខេត្តក្រចេះនាព្រឹកថ្ងៃចន្ទនេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានលើកឡើងថា អ្នកស្លាប់ដោយសារកូវីដ១៩លែងមានហើយ ប៉ុន្តែ អ្នកស្លាប់ដោយសារតែគ្រោះថ្នាក់ចរាចរណ៍បែរជាកើតមានជារៀងរាល់ថ្ងៃទៅវិញ។ ជាមួយគ្នានេះ សម្តេច ហ៊ុន សែន បានក្រើនរំលឹកឲ្យពលរដ្ឋមានការប្រុងប្រយ័ត្នខ្ពស់ចំពោះបញ្ហានេះ។

សម្តេចតេជោ ហ៊ុន សែន បានអះអាងថា ប្រជាពលរដ្ឋទាំងអស់ត្រូវប្រុងប្រយ័ត្ន ព្រោះគ្រោះថ្នាក់ចរាចរណ៍ គឺគ្មានអ្នកណាមករងគ្រោះជំនួសប្រជាពលរដ្ឋខ្លួនឯងបានឡើយ។ សម្តេចតេជោ នាយករដ្ឋមន្រ្តី បានលើកឡើងថា បើរងគ្រោះស្លាប់ ឫរបួស អាចបាក់ដៃ បាក់ជើង គឺវាហួសពេលទៅហើយ ពោល គឺបើទោះបីអង្គុយយំ ក៏មិនអាចកែប្រែអ្វីបាននោះដែរ។

ដូច្នេះហើយ ជាថ្មីម្តងទៀត សម្តេចប្រមុខរដ្ឋាភិបាលកម្ពុជា បានអំពាវនាវឲ្យប្រជាពលរដ្ឋទាំងអស់ គោរពច្បាប់ចរាចរណ៍ ដោយពាក់មួកសុវត្ថិភាព ក៏ដូចជា កុំនិយាយ ឬប្រើប្រាស់ទូរស័ព្ទពេលកំពុងធ្វើដំណើរជាដើម។ សូមបញ្ជាក់ថា កាលពីថ្ងៃអាទិត្យម្សិលមិញ គ្រោះថ្នាក់ចរាចរណ៍បានកើតឡើង១១ករណីនៅទូទាំងប្រទេស ក្នុងនោះ មានមនុស្សស្លាប់ចំនួន៨នាក់ និងរងរបួសធ្ងន់ស្រាលចំនួន១៤នាក់៕

ដោយ៖ វណ្ណ សុគន្ធា

សម្តេចតេជោ ហ៊ុន សែន អញ្ជើញ