នាយករដ្ឋមន្ត្រីក្មេង​បំផុត​ ៧ រូបលើលោក សុទ្ធសឹងជាប់​តំណែង​ដោយ​ការ​បោះឆ្នោត

ក្រោយការតែងតាំងនាយករដ្ឋមន្រ្តីនៃហ្វាំងឡង់ ប្រទេសនេះបាន​បំបែក​កំណត់ត្រា​ថ្មី​ដែលមានអ្នកដឹកនាំកំពូលក្មេងជាងគេ។ អ្នកស្រី Sanna Marin ​សមាជិក​នៃ​គណបក្ស​ប្រជាធិបតេយ្យ​សង្គម​បាន​ក្លាយ​ជានាយក​រដ្ឋមន្រ្តីក្មេង​ជាងគេ​ក្នុង​លោក នៅវ័យ ៣៤ ឆ្នាំ​ប៉ុណ្ណោះ។ ​ប៉ុន្តែមិនមែនមានតែអ្នក​ស្រីម្នាក់ទេដែលមានអាយុតិច ហើយក្លាយជានាយករដ្ឋមន្ត្រីក្មេងបំផុត ​ខាងក្រោមនេះជានាយករដ្ឋមន្ត្រីកំពុង​តែ​កាន់តំណែងក្មេងៗនៅលើលោក​ ដែល​បាន​ជាប់​ដោយ​ការ​បោះឆ្នោត​ទាំងអស់។

១. Sanna Marin នាយករដ្ឋមន្រ្តីវ័យក្មេងនៃប្រទេសហាំងឡង់ អាយុ ៣៤ ឆ្នាំ។ មុនពេលកាន់កាប់តួនាទី អ្នកស្រីធ្លាប់បម្រើការជារដ្ឋមន្រ្តីសាធារណការ និងដឹកជញ្ជូន។

២. Oleksiy Honcharuk នាយករដ្ឋមន្រ្តីវ័យក្មេងនៃប្រទេសអ៊ុយក្រែន អាយុ ៣៥ ឆ្នាំ ត្រូវបានតែងតាំងជានាយករដ្ឋមន្រ្តីនៃប្រទេសអ៊ុយក្រែននៅខែសីហាឆ្នាំ ២០១៩ ។ មុនពេលចូលកាន់តំណែង លោកធ្លាប់ដឹកនាំអង្គការក្រៅរដ្ឋាភិបាលផ្តោតលើកំណែទម្រង់សេដ្ឋកិច្ច។

៣. Nayib Bukele នាយករដ្ឋមន្រ្តីវ័យក្មេងនៃប្រទេសអែលសាវ៉ាឌ័រ អាយុ ៣៨ ឆ្នាំ បានឈរលើវេទិកាប្រឆាំងអំពើពុករលួយ និងធ្លាប់បម្រើការជាអភិបាលក្រុង អេលសាវ៉ាឌ័រ មុនពេលទទួលជោគជ័យក្នុងការបោះឆ្នោត​។

៤. Jacinda Ardern នាយករដ្ឋមន្រ្តីវ័យក្មេងនៃប្រទេសនូវែលសេឡង់ អាយុ ៣៩​ ឆ្នាំ បានឈ្នះឆ្នោតកាលពីឆ្នាំ ២០១៧។ លោកស្រីទទួលបានភាពលេចធ្លោជាសកលសម្រាប់ការអាណត្តិរបស់ខ្លួន បន្ទាប់ពីការបាញ់ប្រហារដ៏សាហាវនៅគ្រីសស្ទឺដែលបណ្តាលឱ្យមនុស្ស ៥០ នាក់មកពីសហគមន៍មូស្លីមស្លាប់។

៥. Fritz-William Michel នាយករដ្ឋមន្រ្តីនៃប្រទេសហៃទី អាយុ ៣៩ ឆ្នាំ ធ្លាប់បម្រើការជារដ្ឋមន្រ្តីក្រសួងហិរញ្ញវត្ថុមុនពេលចូលកាន់តំណែងជានាយករដ្ឋមន្រ្តីនៃប្រទេសនេះ បន្ទាប់ពីលោក Jean Michel Lapin បានលាឈប់ពីតំណែង។

៦. Xavier Espot Zamora នាយករដ្ឋមន្រ្តីនៃប្រទេសអង់ដូរ៉ា អាយុ ៤០ ឆ្នាំ ជាអតីតរដ្ឋមន្រ្តីក្រសួងយុត្តិធម៌ ហើយបានចូលកាន់តំណែងជាមេដឹកនាំកំពូលចាប់តាំងពីថ្ងៃទី ១៦ ខែឧសភា ឆ្នាំ ២០១៩ មក។

៧. Leo Varadkar នាយករដ្ឋមន្រ្តីនៃសាធារណរដ្ឋអៀរឡង់អាយុ ៤០ ឆ្នាំ បានជាប់ឆ្នោតកាលពីឆ្នាំ ២០១៧។ លោកជាបុរសស្រឡាញ់ភេទដូចគ្នាដោយបើកចំហជាលើកដំបូងរបស់ប្រទេសដែលត្រូវបានគេបោះឆ្នោតជ្រើសរើសជានាយករដ្ឋមន្រ្តី ៕

ប្រែសម្រួល៖ សន្យា

ចុចអាន៖ មេដឹកនាំរដ្ឋប្រហារនៅមីយ៉ាន់ម៉ា Min Aung Hlaing ជានរណា?

ចុចអាន៖ រឿងគួរឱ្យចាប់អារម្មណ៍ពីជីវិតដំបូងរបស់នាយករដ្ឋមន្ត្រីឥណ្ឌា មុនឡើងកាន់តំណែង