ព័ត៌មានជាតិ

កម្ពុជាជាប្រទេសដំបូងគេ នៅអាស៊ី លើកិច្ចការអនុវត្តន៍ជាគំរូ ក្នុងកម្មវិធីភាពជាដៃគូប្រចាំប្រទេស

បានផុស

៤ years មុន

នៅ

ថ្ងៃសុក្រ ១១ ធ្នូ ២០២០

ដោយ

ជាមោទនភាពបំផុតសម្រាប់កម្ពុជា ត្រូវបានជ្រើសរើសជាប្រទេសទទួលបានការអនុវត្តជាគំរូលើកម្មវិធីភាពជាដៃគូប្រចាំប្រទេស (PCP) ដំបូងគេបង្អស់នៅតំបន់អាស៊ីនិងប៉ាស៊ីហ្វិក ពីអង្គការអភិវឌ្ឍន៍ឧស្សាហកម្មរបស់អង្គការសហប្រជាជាតិ(UNIDO)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាការលើកឡើងរបស់លោកកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រីរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានថ្លែងក្នុងពិធីចុះហត្ថលេខាតាមប្រព័ន្ធ Online ស្តីពីកម្មវិធីភាពជាដៃគូប្រចាំប្រទេស (PCP) សម្រាប់ប្រទេសកម្ពុជានិងកម្មវិធីស្តារសហគ្រាសកសិ-ចំណីអាហារវិស័យទេសចរណ៍ជាមួយអង្គការ អភិវឌ្ឍន៍ឧស្សាហកម្មរបស់អង្គការសហប្រជាជាតិ (UNIDO)នាថ្ងៃម្សិលម៉ិញនៅទីស្តីការក្រសួង។

លោកកិត្តិសេដ្ឋាបណ្ឌិត ចម ប្រសិទ្ធ បានថ្លែងថា នេះជាមោទនភាពធំធេងមួយដែលកម្ពុជា ត្រូវបានជ្រើសរើសជាប្រទេសទទួលបានការអនុវត្តជាគំរូលើកម្មវិធីភាពជាដៃគូប្រចាំប្រទេស (PCP) ដំបូងគេនៅតំបន់អាស៊ីនិងប៉ាស៊ីហ្វិក ពីអង្គការអភិវឌ្ឍន៍ឧស្សាហកម្មរបស់អង្គការសហប្រជាជាតិ(UNIDO)។ ភាពជោគជ័យនេះ កើតឡើងតាមរយៈដំណើរទស្សនកិច្ចស្វែងរកការពិតរបស់ ឯកឧត្តម លី យ៉ុង អគ្គនាយកអង្គការ (UNIDO) នៅកម្ពុជាកាលពីកំឡុងខែមេសា ឆ្នាំ២០១៧ ហើយមានជំនួបសវនាការប្រកបដោយផ្លែផ្កាជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងបន្ទាប់មក នៅទីក្រុង VIENNA ប្រទេសស្វីស។

លោកកិត្តិសេដ្ឋាបណ្ឌិតទេសរដ្ឋមន្ត្រី បានបន្ថែមថា ការដាក់ឲ្យដំណើរការជាផ្លូវការនៃ PCP នេះ គឺមានភាពទាន់ពេលវេលានិងចាំបាច់នៅពេលដែលយើងត្រូវរួមកម្លាំងនិងកៀរគរប្រភពធនធាន ដើម្បីកាត់បន្ថយផលប៉ះពាល់នៃជំងឺរាតត្បាត Covid-19 និងដើម្បីទ្រទ្រង់កំណើនសេដ្ឋកិច្ចរបស់យើងក្នុង“ ភាពប្រក្រតីថ្មីឡើងវិញ” ។ ឆ្លៀតក្នុងឱកាសនោះ លោកកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ ក៏បានថ្លែងអំណរគុណដល់ម្ចាស់ជំនួយរួមមានមកពីសហគមន៍អឺរ៉ុប រដ្ឋាភិបាលកូរ៉េ-ចិន-ទីភ្នាក់កិច្ចសហប្រតិបត្តិការអភិវឌ្ឍន៍នៃប្រទេសស្វីស (SDC) និងអង្គការបរិស្ថានសកល (GEF) ដែលបានផ្តល់ជំនួយអភិវឌ្ឍន៍ និងបច្ចេកទេស លើវិស័យអាទិភាពជាច្រើន ក្រោមក្របខណ្ឌ PCP នេះ។

លោក លី យ៉ុង អគ្គនាយកអង្គការ UNIDO បានថ្លែងនូវចំណាប់អារម្មណ៍ពីវាគ្មិនបរទេសសំខាន់ៗ ជាបន្តបន្ទាប់ ដោយបានបង្ហាញពីការមើលឃើញនៃផលរីកចម្រើននៃសេដ្ឋកិច្ចកម្ពុជា និងបានបង្ហាញការប្តេជ្ញាចិត្ត ក្នុងកិច្ចសហការពង្រឹងក្នុងភាពជាដៃគូសម្រាប់ការចូលរួមអនុវត្តន៍ឲ្យបានជោគជ័យនៃកម្មវិធី PCP ដ៏មានសារៈសំខាន់នេះរួចមក អង្គពិធីបានរៀបចំពិធីចុះហត្ថលេខាតាមប្រព័ន្ធ Online រវាងលោកកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ ជាមួយលោកពីទីក្រុង VIENNA ប្រទេសស្វីស និងរវាងលោកកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ ជាមួយលោកសុខ ណារិន ប្រធានតំណាងអង្គការ UNIDO កម្ពុជា នៅទីស្តីការក្រសួង ស្តីពីការអនុវត្តន៍កម្មវិធីភាពជាដៃគូប្រចាំប្រទេស (PCP) សម្រាប់ប្រទេសកម្ពុជា និងកម្មវិធីស្តារសហគ្រាសកសិ-ចំណីអាហារវិស័យទេសចរណ៍ ប្រកបដោយបរិយាកាសរីករាយបំផុតនាថ្ងៃម្សិលម៉ិញនេះ៕

អត្ថបទ៖ វិមាន

Related Topics:កិច្ចប្រជុំ