ទៅ​លេង​សៀមរាប ​កុំភ្លេច​​ចូល​ទស្សនា​ផែ​ទេសចរណ៍​ចុងឃ្នៀស​ ទើប​បើក​ដំណើរ​ការលក់​សំបុត្រតម្លៃសមរម្យ

គ្រឹះស្ថានអង្គរ បានប្រកាសចាប់ផ្ដើមបើកលក់សំបុត្រជិះទូកទស្សនាតំបន់បឹងទន្លេសាប នៅកំពង់ផែទេសចរ​ណ៍​ចុងឃ្នៀស ចាប់ពីថ្ងៃទី ១៥ ខែកុម្ភៈ ឆ្នាំ ២០២២ ក្នុងតម្លៃ ៧ ដុល្លារចំពោះភ្ញៀវទេសចរម្នាក់។

រាជរដ្ឋាភិបាលនៅដំណាច់ខែ កក្កដា ឆ្នាំ ២០២១ បានសម្រេចដកហូតការគ្រប់គ្រងផែទេសចរណ៍ ស៊ូ ជីង ដែលអភវឌ្ឍតំបន់ទេសចរណ៍ចុងឃ្នៀសបឹងទន្លេសាប។ រហូតដល់បច្ចុប្បន្ននេះ រដ្ឋបាលខេត្តសៀមរាប និងគ្រឹះស្ថានអង្គរ បានបើកឱ្យដំណើរការលក់សំបុត្រ ដែលមានកាណូតដឹកភ្ញៀវទេសចរណ៍ប្រមាណជាង ៣០០ ទូក។

លោក  ស៊ុន ចំណាន  នាយកទីចាត់ការរដ្ឋបាលខេត្តសៀមរាប់ ប្រាប់កម្ពុជាថ្មី នៅពុធទី ១៦ ខែកុម្ភៈ នេះថា ចាប់តាំងពីការប្រគល់ផែទេសចរណ៍ ស៊ូជីងមករដ្ឋបាលខេត្តសៀមរាប និងគ្រឹះស្ថាន​អង្គរ​គ្រប់​គ្រង ដំណើរការនៅផែចុងឃ្នៀសចាប់ដំណើរការធម្មតា ដែលភាគ​ច្រើនមានភ្ញៀវទេសចរ​ជាតិអញ្ជើញទៅទស្សនាបឹងទន្លេសាបច្រើនកុះករ។

លោកប្រាប់ថា អាជ្ញាធរបានរៀបចំកែលម្អរសោភ័ណភាព និងហេដ្ឋារចនាសម្ព័ន្ធផ្លូវមួយចំនួនៅតំបន់នេះ ដោយមានការរៀបចំល្អស្អាត ជាពិសេសសុវត្ថិភាពសម្រាប់ភ្ញៀវទេសចរក្នុងការជិះទូកកម្សាន្ត។

អភិបាលខេត្តសៀមរាប លោក ទៀ សីហា បានណែនាំដល់ក្រុមការងារចម្រុះ កែប្រែកំពង់ផែនេះឱ្យក្លាយ​ទៅជាតំ​បន់ទេសចរណ៍​វប្បធម៍ដែលមានភាពទាក់ទាញបំផុត។

យន្តការក្នុងការគ្រប់គ្រងកំពង់ផែចុងឃ្នៀសនេះ គឺគ្រប់គ្រងការងារសន្តិសុខ សណ្តាប់ធ្នាប់សាធារណៈ ការងារគ្រប់គ្រងអនាម័យបរិស្ថាន ការគ្រប់គ្រងបញ្ជីសារ​ពើភ័ណ្ឌនិងអតីតបុគ្គលិកក្រុមហ៊ុន ការផ្គត់ផ្គង់អគ្គីសនីនិងទឹក គ្រោងការចំណាយផ្សេងៗ៕