ក្មេងស្រីអាហ្វ្រិកឆ្លងមេរោគបណ្តាលឲ្យស្វិតដៃជើង ពេលនេះ WHO កំពុងចាត់វិធានការបន្ទាន់

ប្រទេសម៉ាឡាវី បានប្រកាសពីការផ្ទុះឡើងនៃជំងឺគ្រុនស្វិតដៃជើង បន្ទាប់ពីក្មេងស្រីអាយុ៣ឆ្នាំម្នាក់ ត្រូវបានគេធ្វើរោគវិនិច្ឆ័យឃើញថាមាន ផ្ទុកមេរោគនេះ។

នាយកអង្គការសុខភាពពិភពលោកប្រចាំតំបន់បាននិយាយថា នេះគឺជាករណីដំបូងនៃមេរោគ Poliovirus នៅទ្វីបអាហ្រ្វិក ក្នុងរយៈពេលជាងប្រាំឆ្នាំ។

ការវិភាគមន្ទីរពិសោធន៍បានបង្ហាញថា ជំងឺដែលរកឃើញនៅរដ្ឋធានី Lilongwe របស់ប្រទេសម៉ាឡាវីមួយនេះ ត្រូវបានផ្សារភ្ជាប់ទៅនឹងជំងឺមួយដែលកំពុងចរាចរណ៍ក្នុងប្រទេសប៉ាគីស្ថាន។

លោកវេជ្ជបណ្ឌិត Matshidiso Moeti បាននិយាយថា “ដោយសារតែវាជាករណីនាំចូលពីប្រទេសប៉ាគីស្ថាន ការរកឃើញនេះនឹងមិនប៉ះពាល់ដល់ឋានៈគ្មានមេរោគ Poliovirus ក្នុងតំបន់អាហ្រ្វិកទេ”។ លោក​បន្ថែម​ថា WHO កំពុង​ចាត់​វិធានការ​បន្ទាន់​ដើម្បី​ការពារ​ការ​រីក​រាល​ដាល​។

ក្មេងស្រីជនជាតិម៉ាឡាវី បានចាប់ផ្តើមបង្ហាញរោគសញ្ញាខ្វិននៅថ្ងៃទី១៩ខែវិច្ឆិកា ហើយសំណាកលាមកដើម្បីរកមើលមេរោគ ត្រូវបានបញ្ជូនទៅកាន់មន្ទីរពិសោធន៍នៅប្រទេសអាហ្វ្រិកខាងត្បូង និងសហរដ្ឋអាមេរិក ដែលជាផ្នែកនៃកិច្ចខិតខំប្រឹងប្រែងតាមដានជំងឺស្វិតដៃជើង។

គួរបញ្ជាក់ថា ជំងឺស្វិតដៃជើងត្រូវបានលុបបំបាត់ជាផ្លូវការនៅក្នុងទ្វីបអាហ្រ្វិកកាលពីឆ្នាំ២០១៦ ដោយករណីចុងក្រោយត្រូវបានរកឃើញនៅក្នុងប្រទេសនីហ្សេរីយ៉ា។

Polio គឺជាមេរោគឆ្លងខ្លាំង ដែលភាគច្រើនប៉ះពាល់ដល់កុមារអាយុក្រោម ៥ឆ្នាំ។

វាឆ្លងតាមរយៈការលាងដៃមិនស្អាតបន្ទាប់ពីបន្ទោបង់លាមកដែលមានមេរោគ ឬតាមរយៈអាហារ ឬទឹកដែលមានមេរោគស្រដៀងគ្នា។ វាក៏អាចឆ្លងតាមរយៈដំណក់ទឹកពីការក្អក និងកណ្ដាស់របស់អ្នកឆ្លងផងដែរ។

នៅពេល​ដែល​បាន​លេប​ចូល មេរោគ​នេះ​នឹង​កើន​ឡើង​ក្នុង​ពោះវៀន ហើយ​វា​អាច​បន្ត​ឆ្លង​ទៅ​ប្រព័ន្ធ​សរសៃប្រសាទ ដែល​អាច​បណ្តាល​ឲ្យ​ខ្វិនបាន។

ភាពខ្វិននេះអាចជាបណ្តោះអាសន្ន ឬជាអចិន្ត្រៃយ៍ ហើយអាចសម្លាប់មនុស្សបាន ប្រសិនបើវាទៅដល់សាច់ដុំដែលពួកគេប្រើដើម្បីដកដង្ហើម។

ជំងឺគ្រុនស្វិតដៃជើងត្រូវបានមនុស្សស្គាល់ច្រើន ដោយសារវាធ្វើឲ្យកុមាររាប់លាននាក់នៅជុំវិញពិភពលោកពិការជារៀងរាល់ឆ្នាំក្នុងទសវត្សរ៍ឆ្នាំ១៩៤០និង១៩៥០។

ជំងឺនេះអាចត្រូវបានការពារតាមរយៈការចាក់ថ្នាំបង្ការ ដោយវ៉ាក់សាំងដំបូងសម្រាប់មេរោគនេះត្រូវបានបង្កើតឡើងក្នុងឆ្នាំ១៩៥៤៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ WHO ប្រកាសបញ្ចប់ជំងឺដ៏កាចសាហាវមួយនេះនៅប្រទេសហ្វីលីពីន