សេវាសុខាភិបាល​ឯកជន​ចង់ផ្តល់​សេវា​ចាក់វ៉ាក់សាំង​កូវីដ១៩​ ត្រូវ​សុំអនុញ្ញាត​ពី​ក្រសួងសុខា​ភិបាល​

មូលដ្ឋានសេវាសុខាភិបាលឯកជនដែលមានបំណងផ្តល់សេវាចាក់វាក់សាំងកូវីដ១៩ ជូនដល់ប្រជជនខ្មែរ និងជនបរទេស នៅក្នុងព្រះរាជាណាចក្រកម្ពុជា ត្រូវស្នើសុំលិខិតអញ្ញាតពីក្រសួងសុខាភិបាលជាមុនសិន។

សេចក្តីប្រកាសអន្តរក្រសួងរវាងក្រសួងសិខាភិបាល និងក្រសួងសេដ្ឋកិច្ច ចេញផ្សាយថ្មីៗនេះ បានឱ្យដឹងថា ត្រូវបានអនុញ្ញាតឱ្យក្រសួងសុខាភិបាលប្រមូលចំណូលពីកម្រៃសេវាផ្តល់បណ្ណចាក់វ៉ាក់សាំងកូវីដ-១៩ ពីម្ចាស់មូលដ្ឋានសេវាសុខាភិបាលឯកជនរួមមានមន្ទីរពេទ្យ មន្ទីរពហុព្យាបាល សម្រាកព្យាបាល និងសម្ភព ដែលទទួលបានលិខិតអនុញ្ញាតពីក្រសួងសុខាភិបាល លើការផ្តល់សេវាចាក់វាក់សាំងកូវីដវី១៩ នៅកម្ពុជា។

ជាមួយគ្នានេះដែរ ម្ចាស់មូលដ្ឋានសេវាសុខាភិបាលឯកជន ដែលមានបំណងផ្តល់សេវាចាក់វ៉ាក់សាំងកូវីដ១៩ ជូនជនជាតិខ្មែរ និងជនបរទេស នៅក្នុងព្រះរាជាណាចក្រកម្ពុជា ត្រូវស្នើសុំលិខិតអញ្ញាតពីក្រសួងសុខាភិបាល។ លក្ខខណ្ឌ បែបបទ នីតិវិធី និងលក្ខណៈបច្ចេកទេសវេជ្ជសាស្ត្រ នៃការផ្តល់លិខិតអនុញ្ញាតឱ្យផ្តល់សេវាចាក់វ៉ាក់សាំងកូវីដ ១៩ ត្រូវ កំណត់ដោយក្រសួងសុខាភិបាល។

ទន្ទឹមនឹនេះម្ចាស់មូលដ្ឋានសេវាសុខាភិបាលឯកជនដែលទទួលបានលិខិតអនុញ្ញាតឱ្យផ្ដល់សេវាចាក់វ៉ាក់សាំងកូវីដ១៩ ពីក្រសួងសុខាភិបាល ត្រូវដាក់ពាក្យស្នើសុំបណ្ណចាក់វាក់សាំងកូវីដ១៩ មកគណៈកម្មការចំពោះកិច្ចចាក់វ៉ាក់សាំង កូវីដ-១៩ ក្នុងក្របខណ្ឌទូទាំងប្រទេស។

ចំពោះបណ្ណចាក់វ៉ាក់សាំងកូវីដ-១៩ ដែលបោះពុម្ព និងបើកផ្ដល់ដោយក្រសួងសុខាភិបាល មានទម្រង់ឯកលក្ខណភាព ដែលមូលដ្ឋានសេវាសុខាភិបាលឯកជនត្រូវប្រើប្រាស់សម្រាប់ការបំពេញព័ត៌មាន ទិន្នន័យឱ្យបានត្រឹមត្រូវ និងពេញលេញ និងប្រគល់ជួនសាមីអតិថិជន ដែលបានចាក់វ៉ាក់សាំងកូវីដ១៩ នៅមូលដ្ឋានរបស់ខ្លួន។

បណ្ណចាក់វ៉ាក់សាំងកូវីដ-១៩ ត្រូវបានកំណត់តម្លៃ ៤០០០រៀល ក្នុងមួយបណ្ណ ដែលម្ចាស់មូលដ្ឋានសេវាសុខាភិបាលឯកជន ត្រូវបង់កម្រៃសេវាជូនក្រសួងសុខាភិបាល នៅពេលបានទទួលបណ្ណ។

រីឯប្រាកចំណូលពីកម្រៃសេវាផ្តល់បណ្ណចាក់វ៉ាក់សាំងកូវីដ១៩ ដែលក្រសួងសុខាភិបាលប្រមូលបាន ត្រូវកត់ត្រាជាសំណូលថវិកាជាតិ៕

អត្ថបទ៖ សំអឿន