អូមីក្រុងបំបាំងកាយ កំពុងអុកឡុក ថៃ

លោក Yong Poovorawan អ្នកឯកទេសខាងមេរោគរបស់ថៃ បាននិយាយនៅក្នុងការបង្ហោះ ហ្វេសប៊ុក កាលពីថ្ងៃសៅរ៍ថា ករណីឆ្លងវីរុសអូមីក្រុងបំបាំងកាយ ឬ BA.2 កំពុងតែកើនឡើងយ៉ាងរហ័សនៅក្នុងប្រទេស ខណៈវីរុសថ្មីនេះអាចទម្លុះការការពាររបស់វ៉ាក់សាំង។

លោក Yong Poovorawan បញ្ជាក់ថា ខណៈពេលដែលប្រភេទ BA.1 នៅតែមានតួលេខខ្ពស់នៃករណីឆ្លងកូវីដ នៅក្នុងទីក្រុងបាងកក ករណី BA.2 កំពុងចាប់ផ្ដើមរាលដាលហើយ។

BA.2 ត្រូវបានគេឱ្យឈ្មោះ “វីរុសបំប្លែងខ្លួនបំបាំងកាយ” ព្រោះតែវាអាចគេចផុតពីការធ្វើតេស្ត PCR ខណៈអ្នកជំងឺប្រហែល ១៨.៥% នៃអ្នកឆ្លងមេរោគកូវីដសរុប នៅក្នុងប្រទេសថៃ គឺជាអ្នកជំងឺអូមីក្រុងបំបាំងកាយនេះឯង។ នេះបើយោងតាមក្រសួងសុខភាពសាធារណៈថៃបានរាយការណ៍។

ស្របពេលជាមួយគ្នាដែរ​ អ្នកជំនាញបានព្រមានថា ទោះបីជា BA.2 មិនបណ្តាលឱ្យមានអាការធ្ងន់ជាង BA.1 ប៉ុន្តែវារីករាលដាលលឿនណាស់ ហើយនៅទីបំផុតនឹងបណ្តាលឱ្យមានការឆ្លងកាន់តែច្រើន។

ទន្ទឹមនឹងនេះ ការពិសោធន៍នៅក្នុងប្រទេសជប៉ុន ថ្មីៗនេះ បង្ហាញថា BA.2 អាចទម្លុះការពារដែលបង្កើតឡើងដោយវ៉ាក់សាំង។ យ៉ាងណាមិញ ការចាក់វ៉ាក់សាំងដូសជំរុញ នឹងកាត់បន្ថយឱកាសឈឺធ្ងន់ ប្រហែល ៧៤ភាគរយ ប្រសិនបើឆ្លងវីរុសបំប្លែងខ្លួនបំបាំងកាយនេះ៕

ប្រែសម្រួល៖ សន្យា

ប្រភព៖ The Nation

ចុចអាន៖ ជប៉ុនរកឃើញថា អូមីក្រុងបំបាំងកាយ អាចបណ្តាលឲ្យឈឺធ្ងន់ និងពិបាកព្យាបាល (មានវីដេអូ)

ចុចអាន៖ អ្នកជំនាញ៖ អូមីក្រុង អាចរស់បានជិត ២០០ម៉ោង នៅលើប្លាស្ទិក