អ៊ុយក្រែន ថា UN កំពុងឈឺ ដោយសារការវាយប្រហារវីរុសចេញពីវិមាន ក្រឹមឡាំង

ឯកអគ្គរដ្ឋទូតអង្គការសហប្រជាជាតិរបស់អ៊ុយក្រែនលោក Sergiy Kyslytsya បាននិយាយកាលពីល្ងាចថ្ងៃចន្ទថា អង្គការសហប្រជាជាតិ (UN) កំពុងឈឺ ព្រោះតែការវាយប្រហារដោយវីរុសដែលរីករាលដាលចេញពីវិមានក្រឹមឡាំង ។

លោក Kyslytsya បាននិយាយនៅក្នុងកិច្ចប្រជុំបន្ទាន់មួយរបស់ក្រុមប្រឹក្សាសន្តិសុខអង្គការសហប្រជាជាតិដើម្បីពិភាក្សាអំពីការសម្រេចចិត្តរបស់រុស្ស៊ីក្នុងការទទួលស្គាល់ឯករាជ្យនៃតំបន់កាន់កាប់ដោយក្រុមឧទ្ទាមចំនួនពីរគឺតំបន់ Donetsk និង Luhansk នៅភាគខាងកើតអ៊ុយក្រែនថា “តើ UN នឹងចុះចាញ់វីរុសនេះទេ?” ។

នៅក្នុងសុន្ទរកថាបើករបស់លោក បេសកជនអ៊ុយក្រែនរូបនេះបាននិយាយថា “លោកនិយាយបែបនេះ មិនមែនដោយសារវីរុសកូវីដ ១៩ ទេ ប៉ុន្តែវាគឺដោយសារតែមេរោគម្យ៉ាងដែលរហូតមកដល់ពេលនេះមិនទាន់មានវ៉ាក់សាំងនៅឡើយទេ ។ វាជាវីរុសដែលរីករាលដាលចេញពីវិមានក្រឹមឡាំង និងកំពុងវាយប្រហារអង្គការសហប្រជាជាតិ ។

នៅក្នុងសុន្ទរកថានោះលោក Kyslytsya ក៏បានថ្កោលទោសការបញ្ជារបស់ប្រធានាធិបតីរុស្ស៊ី Vladimir Putin ក្នុងការដាក់ពង្រាយទាហានរុស្ស៊ីបន្ថែមនៅក្នុងទឹកដីនៃប្រទេសអ៊ុយក្រែន ហើយលោកក៏​បានទាមទារ​ឲ្យរុស្ស៊ី​ដកទាហាន​ចេញ​ទាំងស្រុងផងដែរ​” ​។

គួរបញ្ជាក់ថា លោក ពូទីន បានប្រកាសពីការទទួលស្គាល់របស់រុស្ស៊ីចំពោះតំបន់ទាំងពីរនៅក្នុងសុន្ទរកថាកាលពីថ្ងៃចន្ទ ដែលក្នុងនោះលោកក៏បានវាយប្រហាររដ្ឋាភិបាលអ៊ុយក្រែន និងសហរដ្ឋអាមេរិក ហើយបានចោទប្រកាន់លោកខាងលិចថា មិនអើពើនឹងកង្វល់សន្តិសុខស្នូលរបស់ទីក្រុងមូស្គូផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ប្រធានាធិបតីអ៊ុយក្រែន ៖ យើងមិនខ្លាចនរណាទាំងអស់!