លោក គួច ចំរើន​ ​ឱ្យ​ដាក់បម្រាម​មិន​អនុញ្ញាត​ឱ្យទូក​ទេសចរ​ និងនេសាទ​ ចេញដំណើរ​ ក្នុង​លក្ខខណ្ឌ​កម្រិត​ខ្យល់​បក់​បោកខ្លាំង​

លោក គួច ចំរើន អភិបាលខេត្តព្រះសីហនុ បានឱ្យដឹងថា នៅថ្ងៃនេះមានខ្សល់បក់បោកខ្លាំង ដោយលោកស្នើឱ្យសមត្ថកិច្ចជំនាញអាជ្ញាធរបង្កើនការយកចិត្តទុកដាក់តាមដានគ្រប់គ្រងស្ថានការណ៍ទាក់ទងជាមួយនឹងរលកខ្យល់នៅក្នុងសមុទ្រ។

ម្យ៉ាងទៀត លោកក៏បានប្រាប់ឱ្យពិនិត្យស្ថានភាពជាក់ស្ដែងការធ្វើដំណើររបស់បងប្អូនអ្នកទេសចរណ៍ ត្រូវយកចិត្តទុកដាក់ ពង្រឹងលើការបំពាក់សម្ភារជួយសង្គ្រោះគ្រប់គ្រាន់ទើបអនុញ្ញាតឱ្យមានការធ្វើដំណើរ ដឹកជញ្ជូនអ្នកទេសចរណ៍ឆ្លងទៅឆ្លងមក។

ក្រៅពីនេះអាជ្ញាធរជំនាញ ក៏ត្រូវតាមដានកម្រិតខ្យល់ខ្ពស់បំផុតមិនអាចធ្វើដំណើរបាន ក៏សូមឱ្យមានការដាក់បម្រាមពន្យាពេលនៃការចេញដំណើរខ្លះ ដើម្បីធានាសុវត្ថិភាពរបស់បងប្អូនអ្នកធ្វើដំណើរតាមទូកសមុទ្រ។

លោក គួច ចំរើន បានបញ្ជាក់បន្ថែមថា ទាក់ទងនឹងបងប្អូនប្រជានេសាទទាំងអស់ ក៏ត្រូផ្សព្វផ្សាយជូនដំណឹងទៅតាមរយៈសហគមន៍នេសាទ ក្រុមគ្រួសារនៃបងប្អូនប្រជានេសាទ ដើម្បីបានទទួលដំណឹង ដល់អ្នកកំពុងស្ថិតនៅលម្ហសមុទ្រ ឱ្យពួកគាត់មានការប្រុងប្រយ័ត្ន។ ម្យ៉ាងទៀត ប្រាប់អ្នកនេសាទមិនទាន់ចេញដំណើរឱ្យផ្អាកការចេញនេសាទ ដើម្បីរង់ចាំតាមដានស្ថានភាពអាកាសធាតុ៕

សូមបញ្ជាក់ផងដែរថា អាជ្ញាធរក្រុងកោះរ៉ុង នៅព្រឹកថ្ងៃទី២៤ ខែកុម្ភៈនេះ ក៏បានបានចុះផ្សព្វផ្សាយជូនដំណឹងដល់បងប្អូនប្រជានេសាទក៏ដូចជាអ្នករត់ទូកដឹកភ្ញៀវ ឲ្យមានការប្រុងប្រយ័ត្នខ្ពស់ ពីខ្យល់និងរលកសមុទ្រ៕

អត្ថបទ៖ ស៊ុយ ចាន់ធា