ចរាចរណ៍

រថយន្តមួយគ្រឿង បុកបង្គោលភ្លើងបំភ្លឺផ្លូវបាក់អស់មួយ និងដើមឈើមួយដើម ទាំងព្រឹក

បានផុស

៣ years មុន

នៅ

ថ្ងៃសៅរ៍ ២៦ កុម្ភៈ ២០២២

ដោយ

គ្រោះថ្នាក់ចរាចរណ៍មួយបង្កឡើងដោយបុរសម្នាក់ ខណៈពេលកំពុងបើកបរតាមផ្លូវ ងោកមួយផាំងបណ្តាលឲ្យទៅបុកបង្គោលភ្លើងបំភ្លឺផ្លូវបាក់អស់ មួយដើម និងដើមឈើ មួយដើមផងដែរ។ ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង ៨ និង ២០ នាទីព្រឹក ថ្ងៃទី ២៦ ខែកុម្ភៈ ឆ្នាំ ២០២២ ដែលស្ថិតនៅមុខចំណុច ធនាគារស្ថាបនា តាមបណ្តោយមហាវិថីព្រះនរោត្តម សង្កាត់ផ្សារថ្មីទី ៣ ខណ្ឌដូនពេញ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពព័ត៌មានពីសន្តិសុខយាម នៅធនាគារខាងលើបានប្រាប់ឲ្យដឹងថា មុនពេលកើតហេតុ គាត់បានឃើញរថយន្ត មួយគ្រឿង ម៉ាកហាឡែនឌឺ ពណ៌ខ្មៅ ពាក់ស្លាកលេខ ភ្នំពេញ 2BC-5038 បើកបរក្នុងទិសដៅពីត្បូងមកជើង ដោយនៅក្នុងរថយន្តនោះមានមនុស្សរួមដំណើរចំនួន ៣ នាក់ ប្រុស ១ ស្រី ២ ខណៈពេលនោះស្រាប់តែរថយន្តខាងលើ បានរេចង្កូតចូលមកខាងឆ្វេងបើកទៅបុកនឹងខឿនផ្លូវរួចបន្តទៅបុកជាមួយបង្គោលភ្លើងបំភ្លឺផ្លូវសាធារណៈ បណ្តាលឲ្យបាក់អស់ មួយដើម និងដើមឈើ មួយដើមផងដែរ។

ក្រោយពីកើតហេតុ កម្លាំងអាជ្ញាធរមានសមត្ថកិច្ចបានចុះមកដល់ទីតាំងខាងលើ និងធ្វើការរាយការណ៍ទៅកម្លាំងសមត្ថកិច្ចជំនាញខណ្ឌ ដើម្បីចុះមកពិនិត្យនៅនឹងកន្លែងគ្រោះថ្នាក់ចរាចរណ៍។

ក្រោយមក កម្លាំងជំនាញខណ្ឌ បានចុះមកដល់ទីតាំងកើតហេតុ និងទាក់ទងទៅសមត្ថកិច្ចជំនាញការិយាល័យនគរបាលចរាចរណ៍ជើងគោក នៃស្នងការនគរបាលរាជធានីភ្នំពេញ ដើម្បីមកធ្វើការវាស់វែងយករថយន្តបង្កទៅរក្សាទុកនៅការិយាល័យ រង់ចាំធ្វើការដោះស្រាយគ្នាតាមផ្លូវច្បាប់៕

អត្ថបទ៖ រស្មី

Related Topics:គ្រោះថ្នាក់ចរាចរណ៍