ពូទីន បញ្ជាឲ្យយកជ័យជម្នះឲ្យបាន ត្រឹមថ្ងៃទី២ ខែមីនា

លោក Andrei Fedorov អតីតអនុរដ្ឋមន្ត្រីការបរទេសរុស្ស៊ី បានប្រាប់ Al Jazeera ថា ប៉ុន្មានថ្ងៃខាងមុខ គឺជាពេលដ៏សំខាន់ក្នុងការវាយលុករបស់រុស្ស៊ីលើអ៊ុយក្រែន ខណៈដែលបទបញ្ជាដំបូងរបស់លោកប្រធានាធិបតី Vladimir Putin គឺត្រូវបញ្ចប់ប្រតិបត្តិការយោធាជាមួយនឹងជ័យជម្នះឲ្យបានត្រឹមថ្ងៃទី២ខែមីនា។

លោក Fedorov បាននិយាយកាលពីថ្ងៃអាទិត្យទី២៧ខែកុម្ភៈថា លោកមានក្តីសង្ឃឹមក្នុងកិច្ចពិភាក្សាប្រកាសរវាងប្រទេសទាំងពីរ ទោះទីក្រុងមូស្គូនៅតែបន្តការវាយលុក ទៅលើប្រទេសជិតខាងរបស់ខ្លួនក៏ដោយ។

លោកនិយាយថា “គួរ​តែ​មានកិច្ច​ពិភាក្សា​ជាបន្ត​ដោយ​គ្មាន​លក្ខខណ្ឌ​ជាមុន។ ខ្ញុំដឹងពីជំហរមិត្តរបស់ខ្ញុំនៅទីក្រុង គៀវ និងការដឹកនាំរបស់អ៊ុយក្រែន។ ពួក​គេ​ត្រៀម​ខ្លួន​អង្គុយ​ជជែក ប៉ុន្តែត្រូវតែពិភាក្សា​ដោយ​គ្មាន​លក្ខខណ្ឌ”។

ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅមុននេះបន្តិចថា អ៊ុយក្រែន និងរុស្ស៊ីបានព្រមព្រៀងគ្នាធ្វើកិច្ចចរចារួចហើយ នៅទីកន្លែងមួយជិតព្រំដែនប្រទេសបេឡារុស។

យោងតាមមេដឹកនាំអ៊ុយក្រែន, កិច្ចពិភាក្សាដែលបានប្រកាសជាលើកដំបូងចាប់តាំងពីប្រទេសរុស្ស៊ីបានបើកការវាយលុកពេញទំហឹងលើអ៊ុយក្រែនកាលពីសប្តាហ៍មុនមក គឺនឹងត្រូវធ្វើឡើងដោយគ្មានលក្ខខណ្ឌជាមុន និងជាលទ្ធផលនៃកិច្ចសន្ទនាតាមទូរសព្ទរវាងលោក Zelenskyy និងសមភាគីបេឡារុស៕

ប្រែសម្រួល៖ Vann Vann

ប្រភព៖ Al​ Jazeera

ចុចអាន៖ ទាហានរុស្ស៊ីជាង ១ពាន់នាក់ហើយ បានស្លាប់ក្នុងការប្រយុទ្ធជាមួយ អ៊ុយក្រែន