ប្លន់សម្លាប់ស្ត្រីម្នាក់យកទ្រព្យសម្បត្តិជាច្រើន សមត្ថកិច្ចស្រាវជ្រាវចាប់ខ្លួនដល់ខេត្តក្រចេះ

ជនសង្ស័យម្នាក់ត្រូវបានកម្លាំងនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តមណ្ឌលគិរី សហការជាមួយកម្លាំងសមត្ថកិច្ចខេត្តក្រចេះធ្វើការស្រាវជ្រាវចាប់ខ្លួន ក្រោយធ្វើសកម្មភាពវាយនិងអាកសម្លាប់ស្ត្រីម្នាក់ប្លន់យកទ្រព្យសម្បត្តិរួចព្យាយាមគេចខ្លួន។

ករណីប្លន់សម្លាប់លើស្ត្រីនេះ បានកើតឡើងនៅថ្ងៃទី២៨ ខែកុម្ភៈ ឆ្នាំ២០២២ ស្ថិតក្នុងភូមិពូជ្រី ស្រុកពេជ្រាដា ខេត្តមណ្ឌលគិរី ។

តាមរបាយការណ៍សមត្ថកិច្ចបានឲ្យដឹងថា ជនសង្ស័យមានឈ្មោះ សិទ្ឋ ធាន ភេទប្រុស អាយុ២២ឆ្នាំ ជនជាតិខ្មែរ មានទីលំនៅភូមិពូជ្រី ស្រុកពេជ្រាដា ខេត្តមណ្ឌលគិរី ។ ចំណែកជនរងគ្រោះឈ្មោះ វេង ភា អាយុ៥១ឆ្នាំ ជនជាតិខ្មែរ មានទីលំនៅជាមួយគ្នាជនសង្ស័យ។

ក្នុងករណីនៃអំពើប្លន់សម្លាប់ទៅលើជនរងគ្រោះខាងលើនេះ តាមរបាយការណ៍របស់សមត្ថកិច្ចព្រហ្មទណ្ឌកម្រិតធ្ងន់បានបញ្ជាក់ថា ជនសង្ស័យបានប្រើអង្រែឈើ និងដែកជើងជ្រូកវាយ ដោយជនសង្ស័យខ្លាចជនរងគ្រោះមិនទាន់ស្លាប់ក៏យកកាំបិតប៉័ងតោអាកបន្ថែម។ សមត្ថកិច្ចបញ្ជាក់ថា តាមកាពិនិត្យនៅលើសពជនរងគ្រោះមានស្លាកស្នាមចំនួន១០កន្លែង។

ក្នុងករណីប្លន់នេះ ទ្រព្យសម្បត្តិដែលបាត់បងរួមមាន ខ្សែដៃមាស១ខ្សែទម្ងន់៥ជី , ជញ្ជៀនមាស១វង់ទម្ងន់៣ជី , ខ្សែដៃផ្លាទីន១ខ្សែទម្ងន់៥ជី ប្រាក់រៀល ៥.០០០.០០០រៀល , ទូរសព្ទ័១គ្រឿងម៉ាកOPO,  ចិញ្ចៀនស្នែងតេស១វង់។

ជនសង្ស័យត្រូវបានកម្លាំងសមត្ថកិច្ចការិយាល័យព្រហ្មទណ្ឌកំរិតធ្ងន់ នៃស្នងការនគរបាលខេត្តមណ្ឌលគិរី កសាងសុំណុំរឿងទៅតុលាការ ចាត់ការទៅតាមនីតិវិធី៕

អត្ថបទ៖ សុខុម