តួអង្គសំខាន់ៗនៅពីក្រោយលោក ពូទីន ក្នុងការវាយលុក អ៊ុយក្រែន (មានវីដេអូ)

ពិភពលោកកំពុងតែផ្តោតការយកចិត្តទុកដាក់យ៉ាងខ្លាំងទៅលើវិបត្តិជម្លោះរវាងរុស្ស៊ីនិងអ៊ុយក្រែន​ ហើយអ្វីដែលធ្វើឲ្យគេកាន់តែបារម្ភនោះគឺថា លោក ពូទីន​ ទើបតែបានប្រកាសត្រៀមបាញ់អាវុធនុយក្លេអ៊ែរទៀតផង។

អន្តរជាតិកំពុងតែថ្កោលទោស និងដាក់ទណ្ឌកម្មជាបន្តបន្ទាប់លើប្រទេស រុស្ស៊ី ដោយសារតែសកម្មភាពរបស់លោក ពូទីន។

ទោះបីជាយ៉ាងណាក៏ដោយ ក្រៅពីលោក ពូទីន គេនៅឃើញមានតួអង្គសំខាន់ៗមួយចំនួនទៀត ដែលពាក់ព័ន្ធនឹងការវាយលុក អ៊ុយក្រែន៖ តើពួកគេជានរណា?

ក្រុមអ្នកនយោបាយជាន់ខ្ពស់ Siloviki

ដំបូងគេគឺចាប់ផ្តើមជាមួយ Siloviki ជាក្រុមសន្តិសុខនៅជុំវិញលោក វ្ល៉ាឌីមៀរ ពូទីន ដែលភាគច្រើនដុះដាលចេញតាមរយៈភ្នាក់ងារសន្តិសុខ KGB ជាក្រុមមានផ្នត់គំនិតសង្រ្គាមត្រជាក់។

ពួកគេជឿជាក់លើខ្លួនឯងក្នុងការប្រយុទ្ធជាមួយលោកខាងលិច ហើយជឿជាក់ថា គោលដៅចុងក្រោយរបស់សហរដ្ឋអាមេរិកទល់នឹងរុស្ស៊ី គឺការផ្លាស់ប្តូររបប។

នេះ​ជា​មូល​ហេតុ​ដែលពួកគេលើកឡើងថា “ប្រតិបត្តិការ​យោធា​ពិសេស” នៅអ៊ុយក្រែន គឺ​មាន​ភាព​ត្រឹម​ត្រូវ​ក្នុង​ការ​ការពារ​រុស្ស៊ី និង​ប្រជាជន​រុស្ស៊ី។

ពួកគេចាត់ទុកអ៊ុយក្រែនជាលេសរបស់អាមេរិក ហើយមើលឃើញថា ការវាយលុករបស់រុស្ស៊ីជា ជំហានចាំបាច់ក្នុងការរារាំងសហរដ្ឋអាមេរិកពីការបំផ្លាញរដ្ឋរុស្ស៊ី។

ក្នុងរយៈពេលប៉ុន្មានឆ្នាំចុងក្រោយនេះ ឥទ្ធិពលរបស់ពួកគេបានកើនឡើងយ៉ាងខ្លាំង នៅពេលលោក ពូទីន បង្វែរការយកចិត្តទុកដាក់របស់លោកពីបញ្ហាសេដ្ឋកិច្ច និងសង្គម ទៅរកការគម្រាមកំហែងដែលទាក់ទងនឹងសន្តិសុខ រួមទាំងការបំផ្លាញសង្គមស៊ីវិល និងការមិនចុះសម្រុងផ្ទៃក្នុងវិញ។

លោក Nikolai Patrushev

បុរសម្នាក់នេះ ជាអ្នកមានឥទ្ធិពលបំផុតក្នុងចំណោមពួកគេទាំងអស់។ លោក Nikolai Patrushev គឺជាប្រធានក្រុមប្រឹក្សាសន្តិសុខរុស្ស៊ី។

លោកបានប្រាប់កាសែត Kommersant របស់រុស្ស៊ីក្នុងឆ្នាំ២០១៥ថា “សហរដ្ឋអាមេរិកមិនចង់ឲ្យរុស្ស៊ី គឺជាឈ្មោះប្រទេសមួយទាល់តែសោះ”។

កាលពីខែមករាឆ្នាំមុន ដោយសំដៅទៅលើមេដឹកនាំគណបក្សប្រឆាំងដែលជាប់ពន្ធនាគារឈ្មោះ Alexei Navalny, លោកបានអះអាងថា “ប្រទេសលោកខាងលិច ត្រូវការបុគ្គលម្នាក់នេះ ដើម្បីធ្វើឲ្យស្ថានការណ៍នៅក្នុងប្រទេសរុស្ស៊ីវឹកវរ, ឲ្យមានចលាចលក្នុងសង្គម, កូដកម្ម និងបង្កើតពួក Maidan ថ្មី”។

លោកក៏ត្រូវបានគេរាយការណ៍ថា ជាប្រតិភូក្រៅផ្លូវការរបស់វិមានក្រឹមឡាំងសម្រាប់តំបន់បាល់កង់ ហើយត្រូវបានគេគិតថា ដើរតួនាទីយ៉ាងសំខាន់ក្នុងការរៀបចំរដ្ឋប្រហារនៅម៉ុងតេណេក្រូឆ្នាំ ២០១៦ ដែលជាការប៉ុនប៉ង បញ្ឈប់ប្រទេសនេះមិនឲ្យចូលអង្គការណាតូ ផងដែរ។

លោក Alexander Bortnikov

លោក Alexander Bortnikov បច្ចុប្បន្នជានាយកទីភ្នាក់ងារចារកម្មរុស្ស៊ីហៅកាត់ FSB និងជាអ្នកស្នងតំណែងរបស់ទីភ្នាក់ងារចារកម្មសូវៀត KGB។

ក្នុងនាមជាប្រមុខនៃស្ថាប័នមានអំណាចបំផុតមួយនៅក្នុងប្រទេស, លោក Bortnikov បានប្រើប្រាស់កណ្តាប់ដៃដែកលើជីវិតរបស់ប្រជាជនរុស្ស៊ី ហើយទទួលខុសត្រូវចំពោះការឃុំខ្លួនមនុស្សរាប់ម៉ឺននាក់ និងការរឹតបន្តឹងយ៉ាងខ្លាំងលើសង្គមស៊ីវិល ជាពិសេសចាប់តាំងពីការជាប់ពន្ធនាគាររបស់លោក Alexei Navalny។

គឺជា FSB ដែលនៅពីក្រោយការបំពុលលោក Navalny ហើយអ្នកប្រឆាំងរបបផ្សេងទៀតដូចជា Vladimir Kara-Murza និង Bortnikov ត្រូវបានគេដាក់ទណ្ឌកម្មចំពោះតួនាទីរបស់ពួកគេក្នុងការបំពុល Navalny។

លោក Sergei Shoigu

លោក Sergei Shoigu គឺជារដ្ឋមន្ត្រីការពារជាតិរុស្ស៊ី និងជាសហការីជិតស្និទ្ធរបស់លោក ពូទីន។

ពួកគេចេញប្រមាញ់សត្វ និងការបាញ់ប្រហារជាមួយគ្នានៅតំបន់ ស៊ីបេរី។

Shoigu មិនមែនជាយោធាទទួលបានការហ្វឹកហ្វឺនទេ ប៉ុន្តែចាប់តាំងពីគាត់ត្រូវបានតែងតាំងឲ្យទៅកាន់ក្រសួងការពារជាតិក្នុងឆ្នាំ២០១២មក គាត់បានមើលការខុសត្រូវលើការកាត់បញ្ចូលឧបទ្វីបគ្រីមេជាឧបសម្ព័ន្ធក្នុងឆ្នាំ២០១៤ និងអន្តរាគមន៍របស់រុស្ស៊ី នៅក្នុងប្រទេសស៊ីរី។

លោក Valery Gerasimov

លោកឧត្តមសេនីយ៍ Valery Gerasimov គឺជាប្រធានអគ្គសេនាធិការ។

គាត់គឺជាឧត្តមសេនីយ៍សម័យសូវៀតវ័យចំណាស់ និងជាអ្នកយុទ្ធសាស្ត្រយោធាដែលមានបទពិសោធន៍ជោកជាំ។

ផែនការ​វាយលុក​អ៊ុយក្រែន ​ត្រូវ​បាន​ប្រគល់​ជូន​លោក Gerasimov ហើយ​រាល់​ការ​បរាជ័យ​នឹងធ្វើឲ្យគាត់មានគ្រោះថ្នាក់។

ប្រសិនបើសហរដ្ឋអាមេរិកជាសត្រូវ ហើយកងទ័ពណាតូ និងសព្វាវុធយុទ្ធសាស្ត្រត្រូវបានដាក់នៅអ៊ុយក្រែននោះ វាប្រហែលជាយុទ្ធសាស្ត្រដ៏សំខាន់ដែលគាត់នឹងត្រូវទទួលបន្ទុក។

លោក Anton Vaino

លោក Anton Vaino គឺជានាយសេនាធិការនៃការិយាល័យប្រតិបត្តិប្រធានាធិបតី ដូច្នេះហើយ គាត់បានចំណាយពេលយ៉ាងច្រើនជាមួយប្រធានាធិបតីរុស្ស៊ី។

លោក Vaino និងលោក Shoigu ត្រូវបាន EU ដាក់ទណ្ឌកម្ម នៅក្នុងទណ្ឌកម្មដំណាក់កាលទីមួយ បន្ទាប់ពីការលុកលុយរបស់រុស្ស៊ីលើអ៊ុយក្រែន។

លោក Sergei Lavrov

លោក Sergei Lavrov ជារដ្ឋមន្ត្រីការបរទេសចាប់តាំងពីឆ្នាំ ២០០៤មក។

ជាអ្នកការទូតដែលមានបទពិសោធន៍ម្នាក់ គាត់ត្រូវបានគេស្គាល់ថា ជាប្រតិបត្តិករដ៏ស្វិតស្វាញ និងជាអ្នកប្រឈមមុខនឹងកិច្ចខិតខំប្រឹងប្រែងការទូតរបស់រុស្ស៊ីពេញមួយវិបត្តិអ៊ុយក្រែន។

ជាមួយភាពលេចធ្លោជាអន្តរជាតិ គាត់គឺជាអ្នកនាំសារច្រើនជាងអ្នកមានឥទ្ធិពលសំខាន់ផ្សេងទៀតរបស់ប្រធានាធិបតីរុស្ស៊ី។

មាន​ពាក្យ​ចចាមអារ៉ាម​មិន​ឈប់ឈរ​​អស់​រយៈពេល​ជាច្រើន​ឆ្នាំមកហើយថា ​គាត់​ចង់​ចូល​និវត្តន៍​៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ SKY

ចុចអាន៖ មេដឹកនាំប្រទេសធំមួយ ចំអកឲ្យប្រធានាធិបតីអ៊ុយក្រែន