លោកជំទាវ ម៉ែន សំអន ណែនាំស្រ្តីដែលបម្រើការងារលើវិស័យព័ត៌មាន ត្រូវពង្រឹងសមត្ថភាពរបស់ខ្លួនបន្ថែមទៀត

ក្នុងនាមជាប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៍ទូទាំងប្រទេស លោកជំទាវ ម៉ែន សំអន បានថ្លែងថា ស្ត្រីមានតួនាទីយ៉ាងសំខាន់ ក្នុងការជំរុញការអភិវឌ្ឍឲ្យវិស័យព័ត៌មាន ក្នុងប្រព័ន្ធផ្សព្វ​ផ្សាយ កាន់តែមានប្រសិទ្ធភាព និងទូលំទូលាយ។ ក្នុងនោះដែរ លោកជំទាវ ក៏បានណែនាំដល់ស្ត្រីដែលបម្រើការងារ ក្នុងវិស័យសារព័ត៌មាន ត្រូវបន្តពង្រឹងសមត្ថភាពរបស់ខ្លួន។

លោកជំទាវ ម៉ែន សំអន បានថ្លែងបែបនេះ ខណៈអនុញ្ញាតឲ្យលោកស្រី ខៀវទេព រង្ស៊ី កាញារីទ្ធ ប្រធានកិត្តិយសគណៈកម្មាធិការសាខា សមាគមនារីកម្ពុជា ដើម្បីសន្តិភាព និងអភិវឌ្ឍន៍ ក្រសួង ព័ត៌មាន ដឹកនាំសមាជិកាចូលជួបសម្ដែងការគួរសម នៅទីស្តីការក្រសួងទំនាក់ទំនង ជាមួយរដ្ឋសភា-ព្រឹទ្ធសភា និងអធិការកិច្ច ក្នុងឱកាសអបអរសាទរ ទិវាអន្តរជាតិនារី ៨ មីនា ខួបលើកទី ១១១ ឆ្នាំ២០២២ កាលពីរសៀលថ្ងៃទី ១ ខែមីនា ឆ្នាំ ២០២២។

លោកជំទាវ បានមានប្រសាសន៍ថា ប្រធានបទសមភាពយេនឌ័រថ្ងៃនេះ ដើម្បីចីរភាពនាពេលអនាគត បានឆ្លើយតបទៅនឹងបរិបទបច្ចុប្បន្ន ក្នុងគោលបំណងរំលេចតម្លៃនៃស្រ្តី ក្នុងកិច្ចអភិវឌ្ឍន៍គ្រប់កម្រិត គ្រប់វិស័យ និងគ្រប់កាលៈទេសៈ ដោយស្របតាមយុទ្ធសាស្រ្តចតុកោណ របស់រាជរដ្ឋាភិបាល ដែលបានចាត់ទុកថា ស្រ្តីជាឆ្អឹងខ្នង នៃសេដ្ឋកិច្ចជាតិ។

លោកជំទាវ ម៉ែន សំអន បានបញ្ជាក់ថា ការលើកកម្ពស់សមភាពយេនឌ័រ ជាពិសេសវប្បធម៌អហិង្សាដែលរាជរដ្ឋាភិបាលបាននិងកំពុងគាំទ្រ ជំរុញឲ្យមានការចូលរួមពីគ្រប់ស្ថាប័ន រួមទំាងបុរសទាំងស្រ្តី ដើម្បីវឌ្ឍនភាពសង្គម ឆ្ពោះទៅលើកកម្ពស់សិទ្ធិ ស្ថានភាព ជីវភាព ឋានៈ តួនាទីរបស់ស្ត្រី ក៏ដូចជាសុខុមាលភាពសង្គម ដោយធ្វើការទប់ស្កាត់ និងកាត់បន្ថយអំពើហឹង្សា ព្រមទាំងដោះស្រាយជម្លោះនានាដោយសន្តិវិធី។

ជាមួយគ្នានេះ លោកជំទាវក៏បានណែនាំដល់ស្រ្តី ដែលបម្រើការងារលើវិស័យព័ត៌មាន ត្រូវពង្រឹងសមត្ថភាពរបស់ខ្លួនបន្ថែមទៀត ក្នុងការចូលរួមកិច្ចការងារ សង្គមជាតិ និងធ្វើយ៉ាងណាឲ្យក្លាយខ្លួនជាអ្នកផ្តល់ព័ត៌មានពិតប្រាកដដល់ សាធារណជន ឲ្យបានយល់ដឹងកាន់តែច្បាស់ រាល់បញ្ហាវិជ្ជមាន និងអវិជ្ជមាន នៅក្នុងសង្គម ជាពិសេស គឺលុបបំបាត់ទាំងស្រុងរាល់ព័ត៌មានក្លែងក្លាយ។

លើសពីនេះទៀត លោកជំទាវ ម៉ែន សំអន ក៏បានផ្តាំផ្ញើឲ្យថ្នាក់ដឹកនាំ ជានារីក្រសួងព័ត៌មានត្រូវបន្ត៖

១. លើកកម្ពស់តួនាទីស្រ្តី ក្នុងការប្រយុទ្ធប្រឆាំងនឹងកូវីដ-១៩ និងជំងឺឆ្លងផ្សេងទៀត។

២. ជំរុញឲ្យស្ត្រីឈានមុខ លើការការពារខ្លួនពីជំរុញ និងការឆ្លងដល់កូនចៅ និងសមាជិកក្នុងគ្រួសារ។

៣. ជំរុញឲ្យស្រ្តីនាំកូនចៅ ទៅទទួលវ៉ាក់សាំង បង្ការជំងឺនានា និងវ៉ាក់សាំងប្រឆាំងកូវីដ-១៩ តែម្ដង៕

អត្ថបទ៖ វិមាន